வர்ணனையின் போது சர்ச்சையில் சிக்கிய ரெய்னா; ரசிகர்கள் கொந்தளிப்பு!

இந்திய கிரிக்கெட் அணி வீரர் சுரேஷ் ரெய்னா கிரிக்கெட் வர்ணனையின் போது "நானும் பிராமணன் தான்" என்று ஜாதியை கூறி தன்னை அடையாளப்படுத்தி சர்ச்சையில் சிக்கியிருக்கிறார்.

தமிழ்நாட்டில் தற்போது நடந்து வரும் டிஎன்பிஎல் கிரிக்கெட் போட்டியில் லைக்கா கோவை கிங்ஸ் மற்றும் சேலம் ஸ்பார்டன்ஸ் அணிகளுக்கு இடையே திங்கட்கிழமை நடந்த முதல் லீக் ஆட்டத்தின்போது, இந்திய கிரிக்கெட் அணி வீரர் சுரேஷ் ரெய்னா  காணொளி வாயிலாக வர்ணனையில் ஈடுபட்டார்.

அப்போது போட்டி வர்ணனையாளர், சுரேஷ் ரெய்னாவிடம் தென்னிந்திய கலாசாரத்தை எப்படி தழுவுகிறீர்கள் என்று கேட்டார். அவர் வேட்டி, நடனம், விசில் அடிப்பது போன்ற கலாசாரத்தை கடைப்பிடிப்பதை பார்ப்பதால் இந்த கேள்வி எழுப்பப்படுவதாக வருணனையாளர் கூறினார். காரணம், சிஎஸ்கே அணியின் முழக்கமே "விசில் போடு" என்ற வாசகம்தான்.

இதைத்தொடர்ந்து பதிலளித்த சுரேஷ் ரெய்னா, "நான் நினைக்கிறேன். நானும் பிராமணன்தான். சென்னையில் 2004இல் இருந்து ஆடுகிறேன். இந்த கலாசாரத்தை நேசிக்கிறேன். எனது சக அணி வீரர்களை நேசிக்கிறேன். அனிருதா ஸ்ரீகாந்த், பத்ரி, பாலா பாய் (எல். பாலாஜி) ஆகியோருடன் விளையாடியிருக்கிறேன். 

இங்கிருந்து கற்பதற்கு சில விஷயங்கள் உள்ளன. நமக்கு சிறந்த நிர்வாகம் உள்ளது. நம்மை ஆழமாக பரிசோதித்துக் கொள்ளும் உரிமை நமக்கிருக்கிறது. சென்னை கலாசாரத்தை விரும்புகிறேன். சிஎஸ்கே அணியில் இருப்பது எனது அதிர்ஷ்டம். அங்கு மேலும் ஆட்டங்களில் பங்கெடுப்பேன் என நம்புகிறேன்," என்று கூறினார்.

ஆனால், சுரேஷ் ரெய்னா, தன்னை ஒரு பிராமணன் என அடையாளப்படுத்திக் கொண்டு பேசிய வார்த்தைகள் கிரிக்கெட் ரசிகர்கள் மற்றும் நெட்டிசன்கள் மத்தியில் பெரும் விவாதமாக மாறியுள்ளது.

இது தொடர்பான காணொளியை பகிர்ந்த பலரும், "சுரேஷ் ரெய்னா, இப்படி பேசுவதற்கு நீங்கள் வெட்கப்பட வேண்டும். சென்னை அணிக்காக நீங்கள் விளையாடியிருக்கலாம். ஆனால் சென்னை கலாசாரத்தை உண்மையில் நீங்கள் அனுபவித்திருக்கவே மாட்டீர்கள்," என்று தங்கள் எதிர்ப்பை தெரிவித்து வருகின்றனர்.

Win Big, Make Your Cricket Tales Now