டி20 உலகக்கோப்பை: அசலங்கா, ராஜபக்ஷ அதிரடியில் இலங்கை அசத்தல் வெற்றி!

வங்கதேச அணிக்கெதிரான டி20 உலகக்கோப்பை லீக் ஆட்டத்தில் இலங்கை அணி 5 விக்கெட் வித்தியாசத்தில் அபார வெற்றியைப் பெற்றது.

டி20 உலகக்கோப்பை தொடரில் இன்று நடைபெற்ற 15ஆவது லீக் ஆட்டத்தில் இலங்கை - வங்கதேச அணிகள் பலப்பரீட்சை நடத்தின. இப்போட்டியில் டாஸ் வென்ற இலங்கை அணி முதலில் பந்துவீச தீர்மானித்தது.

அதன்படி களமிறங்கிய வங்கதேச அணி முகமது நைம், முஷ்பிக்கூர் ரஹீம் ஆகியோரது அரைசதத்தால் 20 ஓவர்கள் முடிவில் 4 விக்கெட்டுகளை இழந்து 171 ரன்களைச் சேர்த்தது. 

இதில் அதிகபட்சமாக முகமது நைம் 62 ரன்களையும், முஷ்பிக்கூர் ரஹீம் 57 ரன்களையும் சேர்த்தனர். இலங்கை அணி தரப்பில் கருணரத்ன, ஃபெர்னாண்டோ, லஹிரு குமாரா தலா ஒரு விக்கெட்டை கைப்பற்றினர். 

இதையடுத்து கடின இலக்கை துரத்திய இலங்கை அணியில் குசால் பெரேரா, பதும் நிஷங்கா, அவிஷ்கா ஃபெர்னாண்டோ, வாநிந்து ஹசரங்கா ஆகியோர் சொற்ப ரன்களில் ஆட்டமிழந்து பெவிலியன் திரும்பினர். 

அதன்பின் ஜோடி சேர்ந்த சரித் அசலங்கா - பானுகா ராஜபக்ஷ இணை அதிரடியான ஆட்டத்தை வெளிப்படுத்தி அணியை வெற்றியை நோக்கி அழைத்துச் சென்றனர். மேலும் இருவரும் அரைசதம் கடந்தும் அசத்தினர். 

இதன்மூலம் 18.5 ஓவர்களிலேயே இலங்கை அணி இலக்கை எட்டி 5 விக்கெட் வித்தியாசத்தில் வங்கதேச அணியை வீழ்த்தி வெற்றிபெற்றது.