டிஎன்பிஎல் 2021: திருச்சியை 8 விக்கெட் வித்தியாசத்தில் வீழ்த்தியது கோவை!

டிஎன்பிஎல் தொடரின் இன்றைய லீக் ஆட்டத்தில் லைகா கோவை கிங்ஸ் அணி 8 விக்கெட் வித்தியாசத்தில் ரூபி திருச்சி வாரியர்ஸ் அணியை வீழ்த்தி அபார வெற்றியைப் பெற்றது.

டிஎன்பிஎல் தொடரின் இன்று நடைபெற்ற 5ஆவது லீக் ஆட்டத்தில் லைகா கோவை கிங்ஸ் அணி, ரூபி திருச்சி வாரியர்ஸ் அணியை எதிர்கொண்டது. இப்போட்டியில் டாஸ் வென்ற திருச்சி அணி முதலில் பேட்டிங் செய்ய தீர்மானித்து விளையாடியது. 

அதன்படி களமிறங்கிய திருச்சி அணி சத்விக், ராஜகோபால் ஆகியோரது அதிரடியான ஆட்டத்தினால் 20 ஓவர்கள் முடிவில் 7 விக்கெட் இழப்பிற்கு 171 ரன்களை எடுத்தது. 

இதையடுத்து கடின இலக்கை நோக்கி களமிறங்கிய கோவை அணிக்கு தொடக்கம் முதலே கங்கா ஸ்ரீதர் ராஜு - சாய் சுதர்சன் இணை அதிரடியான ஆட்டத்தை வெளிப்படுத்தி அசத்தியது. 

இதில் இருவரும் அரைசதம் கடக்க, கோவை அணியின் வெற்றியும் ஏறத்தாழ உறுதியானது. பின்னர் 74 ரன்கள் எடுத்திருந்த நிலையில் கங்கா ஸ்ரீதர் ராஜூ ஆட்டமிழக்க, மறுமுனையில் தொடர்ந்து அதிரடியாக விளையாடிய சுதர்சன் இறுதிவரை ஆட்டமிழக்கமல் அணியை வெற்றிக்கு அழைத்து சென்றார்.

இதன் மூலம் லைகா கோவை கிங்ஸ் அணி 8 விக்கெட் வித்தியாசத்தில் ரூபி திருச்சி வாரியர்ஸ் அணியை வீழ்த்தி, இந்த சீசனில் தனது முதல் வெற்றியைப் பதிவுசெய்தது.