டிஎன்பிஎல் 2022: விஷால் வைத்தியா அதிரடியில் திண்டுக்கல் டிராகன்ஸ் அசத்தல் வெற்றி!

திருப்பூர் தமிழன்ஸ் அணிக்கெதிரான டிஎன்பிஎல் லீக் ஆட்டத்தில் திண்டுக்கல் டிராகன்ஸ் அணி 9 விக்கெட் வித்தியாசத்தில் வெற்றிபெற்று அசத்தியது.

TNPL 2022: Dindigul Dragons win by 9 wickets against IDream Tiruppur Tamizhans (Image Source: Google)

தமிழ்நாடு பிரீமியர் லீக் தொடரின் 6வது சீசன் விறுவிறுப்பாக நடந்துவரும் நிலையில், இன்றைய போட்டியில் திண்டுக்கல் டிராகன்ஸ் மற்றும் ஐட்ரீம் திருப்பூர் தமிழன்ஸ் அணிகள் விளையாடின. 

இந்த போட்டியில் டாஸ் வென்ற திண்டுக்கல் டிராகன்ஸ் அணி ஃபீல்டிங்கை தேர்வு செய்தது.  அதன்படி முதலில் பேட்டிங் ஆடிய திருப்பூர் தமிழன்ஸ் அணியின் தொடக்க வீரர்கள் சித்தார்த் (0) மற்றும் அனிருதா (8) ஆகிய இருவரும் ஏமாற்றமளித்தனர்.  

அதன்பின் 3ஆம் வரிசையில் களமிறங்கிய எஸ்.அரவிந்த் சிறப்பாக விளையாடி 32 ரன்கள் அடித்தார். மான் பஃப்னா 21 பந்தில் 21 ரன்கள் மட்டுமே அடித்தார். பின்வரிசையில் எம் முகமது 18 பந்தில் 27 ரன்களும், கிறிஸ்ட் 20 ரன்களும் அடிக்க, 20 ஓவரில் 145 ரன்கள் அடித்து, திண்டுக்கல் டிராகன்ஸுக்கு 146 ரன்களை இலக்காக நிர்ணயித்துள்ளது திருப்பூர் தமிழன்ஸ் அணி.

திண்டுக்கல் அணி சார்பில் அபாரமாக பந்துவீசிய சிலம்பரசன் 4 ஓவரில் 21 ரன்கள் மட்டுமே விட்டுக்கொடுத்து 3 விக்கெட்டுகளை வீழ்த்தினார். ஹரி நிஷாந்த் மற்றும் சுதேஷ் ஆகிய இருவரும் தலா 2 விக்கெட்டுகளை வீழ்த்தினர்.

அதன்பின் எளிய இலக்கை துரத்திய திண்டுக்கல் டிராகன்ஸ் அணிக்கு விஷால் வைத்தியா - கேப்டன் ஹரி நிஷாந்த் இணை அதிரடியான தொடக்கத்தைக் கொடுத்தனர். இதில் ஹரி நிஷாந்த் 25 ரன்களில் ஆட்டமிழந்தார்.

ஆனால் மறுமுனையில் அதிரடியாக விளையாடி வந்த விஷால் வைத்தியா அரைசதம் கடந்தார். அவருக்கு துணையாக மணி பாரதியும் சிரப்பாக விளையாட திண்டுக்கல் அணியின் வெற்றியும் உறுதியானது. 

இதன்மூலம் திண்டுக்கல் டிராகன்ஸ் அணி 18.1 ஓவர்களில் இலக்கை எட்டி, 9 விக்கெட் வித்தியாசத்தில் திருப்பூர் தமிழன்ஸ் அண்யை வீழ்த்தி வெற்றிபெற்றது. இதில் இறுதிவரை ஆட்டமிழக்காமல் இருந்த விஷால் வைத்தியா 84 ரன்களையும், மணி பாரதி 38 ரன்களையும் சேர்த்தனர்.

Win Big, Make Your Cricket Tales Now