விஜய் ஹசாரே கோப்பை: ஹாட்ரிக் சதம் விளாசி சாதனைப் படைத்து ருதுராஜ் கெய்க்வாட்!

விஜய் ஹசாரே கோப்பை தொடரில் மகாராஷ்டிரா அணியின் கேப்டன் ருதுராஜ் கெய்க்வாட் ஹாட்ரிக் சதத்தை விளாசி சாதனைப்படைத்தார்.

இந்தியாவின் உள்ளூர் ஒருநாள் கிரிக்கெட் தொடரான விஜய் ஹசாரே கோப்பை தொடர் விறுவிறுப்பாக நடைபெற்று வருகிறது. இதில் இன்று நடைபெற்று வரும் 3ஆவது சுற்று ஆட்டத்தில் மகாராஷ்டிரா - கேரளா அணிகள் பலப்பரீட்சை நடத்தி வருகின்றன.

இப்போட்டியில் டாஸ் வென்ற கேரள அணி முதலில் பந்துவீச தீர்மானித்தது. அதன்படி களமிறங்கிய மகாராஷ்டிரா அணியில் யாஷ் நாகர், அங்கித் பாவ்னே ஆகியோர் சொற்ப ரன்களில் ஆட்டமிழந்து வெளியேறினார். 

பின்னர் ஜோடி சேர்ந்த கேப்டன் கெய்க்வாட் - ராகுல் திரிபாதி இணை அதிரடியாக விளையாடி ஸ்கோரை மளமளவென உயர்த்தினர். இதில் ருதுராஜ் கெய்க்வாட் சதம் விளாசி அசத்தினார். 

மேலும் இத்தொடரில் ஹாட்ரிக் சதமாகவும் இது அமைந்தது. முன்னதாக மத்திய பிரதேசம், சத்திஸ்கர் ஆகிய அணிகளுக்கு எதிராக ருதுராஜ் சதம் விளாசி அசத்தியிருந்தார். 

அதன்பின் 124 ரன்கள் எடுத்திருந்த கெய்க்வாட் ஆட்டமிழக்க, மறுமுனையில் சதமடிப்பார் என்று எதிர்பார்க்கப்பட் ராகுல் திரிபாதி 99 ரன்களில் ஆட்டமிழந்து நூழிலையில் சதமடிக்கும் வாய்ப்பை தவறவிட்டார். 

இதன்மூலம் 50 ஓவர்கள் முடிவில் மகாராஷ்டிரா அணி 8 விக்கெட் இழப்பிற்கு 291 ரன்களைக் குவித்தது. கேரள அணி தரப்பில் நித்தீஷ் 5 விக்கெட்டுகளைக் கைப்பற்றினார்.