முதல் பாதியில் எப்படி விளையாடினோம் என்பது முக்கியமில்லை - தப்ரைஸ் ஷம்ஸி

கரோனா பாதிப்பால் ஒத்திவைக்கப்பட்ட 14ஆவது சீசன் ஐபிஎல் தொடர், நாளை முதல் ஐக்கிய அரபு அமீரகத்தில் மீண்டும் தொடங்குகிறது. துபாயில் நடைபெறும் முதல் ஆட்டத்தில் நடப்பு சாம்பியன் மும்பை இந்தியன்ஸ்-சென்னை சூப்பா் கிங்ஸ் அணிகள் விளையாடவுள்ளன. 

ஐபிஎல் 2021 புள்ளிகள் பட்டியலில் ராஜஸ்தான் ராயல்ஸ் அணி, 5ஆவது இடத்தில் உள்ளது. இந்நிலையில் ஐபிஎல் போட்டியில் முதல் பாதியில் ஓர் அணி எப்படி விளையாடியது என்பது முக்கியமில்லை என ராஜஸ்தான் ராயல்ஸ் சுழற்பந்து வீச்சாளர் ஷம்ஸி கூறியுள்ளார்.

இதுகுறித்து பேசிய அவர், “ஓர் அணி முதலிடத்தில் உள்ளதோ, 5ஆவது இடத்தில் உள்ளதோ, போட்டியின் முதல் பாதியில் எப்படி விளையாடியது என்பது முக்கியமில்லை. 2ஆம் பாதியில் எப்படி விளையாடுகிறது என்பதைப் பொறுத்துத்தான் எல்லாமும் மாறும். நாங்கள் தற்போது நல்ல நிலையில் உள்ளோம். மிகவும் மகிழ்ச்சியாக உள்ள ஓர் அணி நன்றாக விளையாடும் என்பதில் நம்பிக்கை உள்ளவன். அணி வீரர்களுடன் நன்குப் பழகி அந்த மகிழ்ச்சியையும் நேர்மறை எண்ணங்களையும் கொண்டு வர முயற்சி செய்வேன். 

ஷார்ஜா மைதானத்தின் அளவு சிறியதாக இருப்பது பந்துவீச்சாளர்களுக்குச் சவால் அளிக்கக்கூடியது. அதேசமயம் இதைப் பயன்படுத்தி சிக்ஸர் அடிக்க பேட்ஸ்மேன்கள் முயற்சி செய்வார்கள். இதனால் விக்கெட் எடுக்க வாய்ப்பு கிடைக்கும். ஷார்ஜா போன்ற மைதானங்களில் 35-40 ரன்கள் கொடுத்தும் அணிக்கு வெற்றி தேடித் தரலாம். மற்ற மைதானங்களில் 3 அல்லது 4 விக்கெட்டுகள் எடுக்க வேண்டும். எனவே விக்கெட் எடுப்பது மட்டுமே முக்கியமில்லை” என்று தெரிவித்தார்.

உலகின் நம்பர் ஒன் டி20 பந்துவீச்சாளரான தப்ரைஸ் ஷம்ஸியை இந்த வருட ஐபிஎல் போட்டிக்குத் ராஜஸ்தான் ராயல்ஸ் அணி ஒப்பந்தம் செய்துள்ளது. மேலும் நடப்பு சீசன் புள்ளிப்பட்டியல்லில் ராஜஸ்தா ராயல்ஸ் அணி 7 போட்டிகளில் விளையாடி, 3 ஆட்டங்களில் வெற்றி பெற்று 6 புள்ளிகளுடன் 5ஆம் இடத்தில் உள்ளது குறிப்பிடத்தக்கது.

Win Big, Make Your Cricket Tales Now