WTC Final: வர்ணனையாளராக ரசிகர்கள் மத்தியில் இடம்பிடித்த தினேஷ் கார்த்திக்!

உலக டெஸ்ட் சாம்பியன்ஷிப் இறுதிப் போட்டியின் மூலம் வர்ணனையாளராக அறிமுகமாகியுள்ள இந்திய வீரர் தினேஷ் கார்த்திக்கிற்கு ரசிகர்கள் மத்தியில் பெரும் வரவேற்பு கிடைத்துள்ளது.

விராட் கோலி தலைமையிலான இந்திய கிரிக்கெட் அணி, உலக டெஸ்ட் சாம்பியன்ஷிப் இறுதிப் போட்டியில் நியூசிலாந்தை எதிர்கொண்டு விளையாடி வருகிறது. இப்போட்டியின் முதல் நாள் ஆட்டம் முற்றிலுமாக மழையால் பாதிக்கப்பட்டு ரத்து செய்யப்பட்டது. இதையடுத்து நேற்றைய தினம் இப்போட்டியின் இரண்டாம் நாள் ஆட்டம் எந்தவித சிக்கலும் இன்றி நடைபெற்றது, 

இந்த நிலையில் இப்போட்டியில் வர்ணனையாளராக அறிமுகமாகியுள்ள இந்திய வீரர் தினேஷ் கார்த்திக்கிற்கு ரசிகர்கள் மத்தியில் பெரும் வரவேற்பு கிடைத்துள்ளது.  ஒரு பேட்ஸ்மேனாக அவர் வைரல் ஆனதை விட, மிக குறுகிய காலத்தில் ஒரு வர்ணனையாளராக தனது பேச்சாற்றலால் அடிக்கடி வைரலாகி வருகிறார்.

அந்த வகையில், உலக டெஸ்ட் சாம்பியன்ஷிப் இறுதிப் போட்டியில் வர்ணனை செய்து வரும் தினேஷ், போட்டி தொடக்கிய முதல் நாளிலேயே சமூக வலைதளங்களில் ட்ரெண்டாகியுள்ளார்.

நேற்றைய போட்டியின் போது நாசர் ஹுசைனுடன் இணைந்து தினேஷ் கார்த்திக் வர்ணனனை செய்தார். அப்போது நாசர், "ரோஹித் ஷர்மா ஷார்ட் பந்தை அடிப்பதில் சிறந்தவர். சூழலுக்கு எதிராக அவர் தனது கால்களை நன்கு பயன்படுத்துகிறார். இது அவரது நேர்மறையான எண்ணத்தை காட்டுகிறது" என்று சொல்ல, அதற்கு உடனடியாக தினேஷ் கார்த்திக் "ஆமாம், அப்படியே உங்களுக்கு நேர் எதிரான வீரர்" என்று சொல்லி அவரை கலாய்த்துள்ளார். 

அதைத்தொடர்ந்து நியூசிலாந்தின் பவுலிங்கை குறிப்பிடும் விதமாக, "2019 உலகக் கோப்பையில், நியூசிலாந்துக்கு எதிரான அரை இறுதிப் போட்டியில், முதல் 6 ஓவரில் எடுத்த ஸ்கோரை விட, இந்திய அணி இப்போட்டியில் அதிக ரன்கள் எடுத்துள்ளது" என்று தினேஷ் கார்த்திக் கூறியது ரசிகர்கள் மத்தியிம் பெரும் வரவேற்பை பெற்று வைரலாகியது.