‘இலங்கை தொடரில் மிகவும் நம்பிக்கையான சஹாலை நீங்கள் பார்க்கப் போகிறீர்கள்’

இலங்கை அணிக்கெதிரான தொடரில் மிகவும் நம்பிக்கையான சஹாலை நீங்கள் பார்க்க போகிறீர்கள் என்று சுழற்பந்துவீச்சாளர் யுஸ்வேந்திர சஹால் தெரிவித்துள்ளார்.

ஷிகர் தவான் தலைமையிலான இந்திய அணி இலங்கைக்குச் சுற்றுப்பயணம் செய்து 3 ஒருநாள், 3 டி20 போட்டிகளில் விளையாடுகிறது. விராட் கோலி, ரோஹித் சர்மா போன்ற முன்னணி வீரர்கள் இங்கிலாந்து டெஸ்ட் தொடரில் பங்கேற்பதால், இலங்கைக்கு எதிரான தொடர்களுக்கு ஹர்திக் பாண்டியா, மனீஷ் பாண்டே, புவனேஷ்வர் குமா, பிரித்வி ஷா அடங்கிய அணி விளையாடவுள்ளது. 

இந்தியா - இலங்கை அணிகள் பங்கேற்கும் ஒருநாள் தொடர், ஜூலை 13ஆம் தேதி தொடங்கி, ஜூலை 18 ஆம் தேதி வரையும், டி20 தொடர் ஜூலை 21ஆம் தேதி தொடங்கி, ஜூலை 25 ஆம் தேதியுடனும் நிறைவுபெறுகிறது. இத்தொடரின் அனைத்து போட்டிகளும் கொழும்பில் நடைபெறவுள்ளன.

இந்நிலையில், இந்திய அணி தன் மீது அதிக நம்பிக்கை வைத்துள்ளதாக நட்சத்திர சுழற்பந்துவீச்சாளர் யுஸ்வேந்திர சஹால் தெரிவித்துள்ளார். 

இதுகுறித்து பேசிய சஹால்,“என்னுடைய ஆட்டத்திறமையில் குறை எதுவும் இல்லை. எல்லா ஆட்டங்களிலும் நன்றாக விளையாட முடியாது. இந்தத் தொடர் எனக்கு முக்கியமானது. பந்துவீச்சுப் பயிற்சியாளருடன் தொடர்ந்து பேசிக்கொண்டு வருகிறேன். அணி நிர்வாகத்துக்கு என் மீது நம்பிக்கை உள்ளது. அதனால்தான் இங்கு (இலங்கை) உள்ளேன். அந்த நம்பிக்கை இல்லாவிட்டால் யாரும் இங்கு இருக்க முடியாது. இந்தத் தொடரில் மிகவும் நம்பிக்கையான சஹாலை நீங்கள் பார்க்கப் போகிறீர்கள்” என்று தெரிவித்துள்ளார். 

இந்திய அணிக்காக கடந்த 2016ஆம் ஆண்டு முதல் விளையாடி வரும் யுஸ்வேந்திர சஹால் 54 ஒருநாள் போட்டிகளிலும், 48 டி20 போட்டிகளிலும் பங்கேற்று 154 விக்கெட்டுகளைக் கைப்பற்றியுள்ளார் என்பது குறிப்பிடத்தக்கது.