இந்தியாவின் பிரபல டி20 தொடரான ஐபிஎல் தொடரின் 16ஆவது சீசன் வரும் 2023ஆம் ஆண்டு கோடைகாலம் நடைபெறும் நிலையில் அதற்கான வீரர்கள் ஏலம் கொச்சியில் நடைபெற்ற முடிந்துள்ளது. அந்த ஏலத்தில் தங்களுக்கு தேவையான கிரிக்கெட் வீரர்களை வாங்கி அணியை முழுமைப்படுத்தியுள்ள 10 அணிகளுக்கு மத்தியில் 4 கோப்பைகளை வென்று 2ஆவது வெற்றிகரமான அணியாக திகழும் சென்னை சூப்பர் கிங்ஸ் சிறப்பாக செயல்பட்டது. 

குறிப்பாக விரைவில் தோனி ஓய்வு பெறும் நிலையில் கேப்டன்ஷிப் அனுபவம் வாய்ந்த உலகின் நம்பர் ஒன் ஆல் ரவுண்டர் பென் ஸ்டோக்ஸை 16.25 கோடி என்ற தகுதியான விலைக்கு வாங்கிய அந்த அணி நிர்வாகம் ஏற்கனவே ஓய்வு பெற்ற ட்வயன் ப்ராவோ இடத்தையும் பூர்த்தி செய்துள்ளது. அப்படி ஒரே கல்லில் 2 மாங்காய் கிடைத்த நிலையில் நியூசிலாந்தின் கைல் ஜேமிசனை வெறும் 1 கோடிக்கு வாங்கியதும் சிறந்த முடிவாகும். மொத்தத்தில் இந்த ஏலத்தில் முழுமையான 25 வீரர்களை வாங்கியுள்ள சென்னை சூப்பர் கிங்ஸ் 2020 போலவே 2022இல் பிளே ஆப் சுற்றுக்கு தகுதி பெறாமல் வெளியேறிய தோல்வியிலிருந்து பாடத்தை கற்றுக்கொண்டு 2021 சீசனில் கோப்பையை வென்றது போல் 2023இல் 5வது கோப்பையை வென்று சரித்திரம் படைக்க தயாராகியுள்ளது.

இந்த நிலையில் ஏலத்துக்கு பின் அந்த அணியின் சிறந்த 11 வீரர்கள் கொண்ட உத்தேச அணியை பற்றி பார்ப்போம். அதன்படி முதல் தொடக்க வீரராக சந்தேகமின்றி 2021இல் ஸ்பார்க்கை காட்டி ஆரஞ்சு தொப்பியை வென்று 4ஆவது கோப்பையை வெல்ல முக்கிய பங்காற்றிய ருதுராஜ் கெயிக்வாட் களமிறங்குவார். மேலும் சமீபத்திய விஜய் ஹசாரே கோப்பையில் ஒரே ஓவரில் 7 சிக்ஸர்களை பறக்க விட்டு உலக சாதனை அவர் சிறந்த பார்மிலும் உள்ளார்.

அவருடன் கடந்த வருடம் கடைசி நேரத்தில் சிறப்பாக செயல்பட்ட நியூசிலாந்தின் டேவான் கான்வே ஓப்பனிங் ஜோடியாக களமிறங்குவார். ஏனெனில் அவருக்கு பதிலாக சிவம் துபே, ராபின் உத்தப்பா போன்றவர்களை சோதித்த சென்னைக்கு ஏமாற்றமே மிஞ்சியது. 3ஆவது இடத்தில் ரெய்னாவுக்கு பதிலாக வாய்ப்பு பெற்று நல்ல செயல்பாடுகளை வெளிப்படுத்தி நிலையான இடத்தை பிடித்துள்ள இங்கிலாந்தின் சுழல் பந்து வீச்சு ஆல் ரவுண்டர் மொயின் அலி தகுதியானவர். 4ஆவது இடத்தில் வழக்கம் போல அனுபவமிக்க அம்பத்தி ராயுடு விளையாடுவார்.

5 மற்றும் 6 ஆகிய இடங்களில் அஜிங்கியா ரஹானே மற்றும்  உலகில் தற்சமயத்தில் மிகச்சிறந்த வேகப் பந்துவீச்சு ஆல் ரவுண்டராக இருக்கும் பென் ஸ்டோக்ஸ் ஆகியோர் சூழ்நிலைக்கேற்றார் போல் களமிறங்குவார்கள் என்று உறுதியாக நம்பலாம். அப்படி டாப் 6 பேட்ஸ்மேன்களில் 2 பேர் ஆல் ரவுண்டர்களாக இருப்பது சென்னைக்கு வரப்பிரசாதமாகும்.

அதேசமயம் 7ஆவது இடத்தில் நட்சத்திர வீரர் ரவீந்திர ஜடேஜா களமிறங்குவார் என உறுதியாக நம்பலாம். அவரைத் தொடர்ந்து கேப்டன் எம் எஸ் தோனி களமிறங்குவார். இதில் தோனியின் ஃபார்ம் சற்று சந்தேகமாக இருப்பினும் 2022 சீசனில் ஃபார்முக்கு திரும்பி ஒரு சில போட்டிகளை வெற்றிகரமாக முடித்த அவர் அடுத்த வருடமும் தன்னுடைய சிறந்த செயல்பாடுகளை வெளிப்படுத்துவார் என்று நம்பலாம்.

வேகப்பந்து வீச்சு துறையில் 14 கோடிக்கு வாங்கப்பட்ட தீபக் சஹார் லோயர் ஆர்டரில் கணிசமாக அதிரடியாக ரன்களை குவிப்பவராக இருப்பதால் 9வது இடத்தில் களமிறங்க தகுதியானவர். அவருடன் கடந்த சீசனில் மிரட்டிய இளம் இடது கை வேகப்பந்து வீச்சாளர் முகேஷ் சவுத்ரி களமிறங்குவார். இவர்களைத் தாண்டி சுழற்பந்து வீச்சாளராக கடந்த வருடம் அசத்திய இலங்கையின் மஹீஸ் தீக்சனா விளையாடுவார்.

சிஎஸ்கேவின் உத்தேச லெவன்: ருதுராஜ் கெயிக்வாட், டேவான் கான்வே, மொயின் அலி, அம்பத்தி ராயூடு, அஜிங்கியா ரஹானே, பென் ஸ்டோக்ஸ், ரவீந்திர ஜடேஜா, எம்எஸ் தோனி (கேப்டன் – கீப்பர்), தீபக் சஹார், முகேஷ் சௌத்ரி மகீஷ் தீக்ஷனா.