அமெரிக்கா மற்றும் வெஸ்ட் இண்டீஸில் நடைபெற்று வரும் ஐசிசி ஆடவர் டி20 உலகக்கோப்பை கிரிக்கெட் தொடரானது நாளுக்கு நாள் ரசிகர்களின் எதிர்பார்ப்புகளை அதிகரித்து வருகின்றனர். இத்தொடரில் இன்று நடைபெறும் 16ஆவது லீக் ஆட்டத்தில் குரூப் டி பிரிவில் இடம்பிடித்துள்ள தென் ஆப்பிரிக்கா மற்றும் நெதர்லாந்து அணிகள் பலப்பரீட்சை நடத்தவுள்ளன.  நியூயார்க்கில் உள்ள நசாவ் கவுண்டி சர்வதேச கிரிக்கெட் மைதானத்தில் நடைபெறும் இப்போட்டியில் டாஸ் வென்றுள்ள தென் ஆப்பிரிக்க அணி கேப்டன் ஐடன் மார்க்ரம் முதலில் பந்துவீசுவதாக அறிவித்து நெதர்லாந்து அணியை பேட்டிங் செய்ய அழைத்துள்ளார். 

ஏற்கெனவே கடந்த முறை இவ்விரு அணிகளும் மோதிய உலகக்கோப்பை போட்டியில் நெதர்லாந்து அணி தென் ஆப்பிரிக்க அணியை வீழ்த்தி மிகப்பெரும் அதிர்ச்சியைக் கொடுத்தது. அத்தோல்வியின் மூலம் கடந்த முறை தென் ஆப்பிரிக்க அணியால் அரையிறுதிச் சுற்றுக்கு முன்னேற முடியாமல் போனதும் குறிப்பிடத்தக்கது. மேலும் நடப்பு டி20 உலகக்கோப்பை தொடரில் கடந்த சில தினங்களாகவே மிகப்பெரும் அப்செட் போட்டிகள் நடைபெற்றுள்ளன. இதனால் இன்றைய போட்டியிலும் நெதர்லாந்து அணி தென் ஆப்பிரிக்காவை அப்செட் செய்யுமா என்ற எதிர்பார்ப்புகள் அதிகரித்துள்ளன. 

நெதர்லாந்து: மைக்கேல் லெவிட், மேக்ஸ் ஓடோவ்ட், விக்ரம்ஜித் சிங், சிப்ராண்ட் ஏங்கல்பிரெக்ட், ஸ்காட் எட்வர்ட்ஸ்(கே), பாஸ் டி லீடே, தேஜா நிடமனூரு, லோகன் வான் பீக், டிம் பிரிங்கிள், பால் வான் மீகெரென், விவியன் கிங்மா

தென் ஆப்பிரிக்கா: குயின்டன் டி காக், ரீசா ஹென்ட்ரிக்ஸ், ஐடன் மார்க்ரம்(கே), டிரிஸ்டன் ஸ்டப்ஸ், ஹென்ரிச் கிளாசென், டேவிட் மில்லர், மார்கோ ஜான்சன், கேசவ் மகாராஜ், ககிசோ ரபாடா, அன்ரிச் நோர்ட்ஜே, ஒட்னீல் பார்ட்மேன்.