1st Test, Day 1: உஸ்மான் கவாஜா, ஸ்டீவ் ஸ்மித் அசத்தல் சதம்; வலிமையான நிலையில் ஆஸி!
ஆஸ்திரேலிய அணி இலங்கையில் சுற்றுப்பயணம் செய்து இரண்டு போட்டிகள் கொண்ட டெஸ்ட் தொடரில், இரண்டு போட்டிகள் கொண்ட ஒருநாள் தொடரிலும் விளையாட இருக்கிறது. அதன்படி இவ்விரு அணிகளுக்கும் இடையேயான இந்த டெஸ்ட் தொடரின் முதல் போட்டி இன்று (ஜனவரி 29) கலேவில் உள்ள சர்வதேச கிரிக்கெட் மைதானத்தில் தொடங்கியது. இப்போட்டியில் டாஸ் வென்ற ஆஸ்திரேலிய அணி முதலில் பேட்டிங் செய்வதாக அறிவித்தது.
இப்போட்டிக்கான ஆஸ்திரேலிய அணியில் அறிமுக வீரர் ஜோஷ் இங்கிலிஷுக்கு பிளேயிங் லெவனில் வாய்ப்பு வழங்கப்பட்டுள்ள நிலையில், பெரிதும் எதிர்பார்க்கப்பட்ட சாம் கொன்ஸ்டாஸ், ஸ்காட் போலண்ட் ஆகியோர் பிளேயிங் லெவனில் இருந்து நீக்கப்பட்டுள்ளார். இதனையடுத்து பேட்டிங் செய்ய களமிறங்கிய ஆஸ்திரேலிய அணிக்கு உஸ்மான் கவாஜா மற்றும் டிராவிஸ் ஹெட் இணை தொடக்கம் கொடுத்தனர். இதில் டிராவிஸ் ஹெட் முதல் ஓவரில் இருந்தே தனது அதிரடியான ஆட்டத்தின் மூலம் அடுத்தடுத்து பவுண்டரிகளை விளாசி அணியின் ஸ்கோரை மளமளவென உயர்த்தினார்.
அவருடன் இணைந்து உஸ்மான் கவாஜாவும் பொறுப்பான ஆட்டத்தை வெளிப்படுத்தியதன் மூலம் முதல் விக்கெட்டிற்கு இருவரும் இணைந்து முதல் விக்கெட்டிற்கு 92 ரன்கள் பார்ட்னர்ஷிப் அமைத்தும் அசத்தினர். இதில் அபாரமாக விளையாடி வந்த டிராவிஸ் ஹெட் தனது அரைசதத்தைப் பதிவுசெய்து அசத்தினார். அதன்பின் 10 பவுண்டரி, ஒரு சிக்ஸர் என 57 ரன்களைச் சேர்த்த நிலையில் டிராவிஸ் ஹெட் தனது விக்கெட்டை இழந்து பெவிலியனுக்கு திரும்பினார். அதன்பின் களமிறங்கிய லபுஷாக்னேவும் நிதானமாக விளையாடிய நிலையில், மற்றொரு தொடக்க வீரரான உஸ்மான் கவாஜாவும் தனது அரைசதத்தைப் பதிவுசெய்தார்.
அதன்பின் 20 ரன்களை எடுத்திருந்த நிலையில் மார்னஸ் லபுஷாக்னே தனது விக்கெட்டை இழக்க, அடுத்து களமிறங்கிய கேப்டன் ஸ்டீவ் ஸ்மித்தும் அபாரமாக விளையாடி சர்வதேச டெஸ்ட் கிரிக்கெட்டில் தனது 10ஆயிரம் ரன்களைப் பதிவுசெய்து அசத்தினார். அதன்பின் உஸ்மான் கவாஜா மற்றும் ஸ்டீவ் ஸ்மித் இருவரும் பொறுப்புடன் விளையாடி அணியின் ஸ்கோரை மளமளவென உயர்ந்தது. இதில் உஸ்மான் கவாஜா சர்வர்தேச டெஸ்ட் கிரிக்கெட்டில் தனது 16ஆவது சதத்தைப் பதிவுசெய்த நிலையில், மறுமுனையில் ஸ்டீவ் ஸ்மித் தனது 35ஆவது சதத்தைப் பூர்த்தி செய்தார்.
Also Read: Funding To Save Test Cricket
மேற்கொண்டு இருவரும் இணைந்து மூன்றாவது விக்கெட்டிற்கு 195 ரன்கள் பார்ட்னர்ஷிப் அமைத்த நிலையில் மழை குறுக்கிட்டத்தன் காரணமாக முதல்நாள் ஆட்டம் முன்கூட்டியே முடிவடைந்ததாக அறிவிக்கப்பட்டது. அந்தவகையில் முதல்நாள் ஆட்டநேர முடிவில் ஆஸ்திரேலிய அணி இரண்டு விக்கெட் இழப்பிற்கு 330 ரன்களைக் குவித்துள்ளது. இதில் உஸ்மான் கவாஜா 10 பவுண்டரி, ஒரு சிக்ஸர் என 147 ரன்களையும், ஸ்டீவ் ஸ்மித் 10 பவுண்டரி ஒரு சிக்ஸர் என 104 ரன்களுடனும் களத்தில் உள்ளனர். இலங்கை அணி தரப்பில் பிரபாத் ஜெயசூர்யா மற்றும் ஜெஃப்ரி வண்டர்சே ஆகியோர் தலா ஒரு விக்கெட்டை கைப்பற்றியுள்ளனர்.