கடந்த முறை கிடைத்த அனுபவம் எங்களுக்கு மிகுந்த உதவியாக இருக்கும் - டாம் லேதம்!

இந்தியாவில் சுற்றுப்பயணம் செய்து வரும் நியூசிலாந்து அணி 3 போட்டிகள் கொண்ட டெஸ்ட் தொடரில் விளைடாடுகிறது. இதில் இரு அணிகளுக்கும் இடையேயான முதலாவது டெஸ்ட் போட்டியானது நாளை பெங்களூருவில் உள்ள எம் சின்னசாமி கிரிக்கெட் மைதானத்தில் நடைபெறவுள்ளது. 

ரோஹித் சர்மா தலைமையிலான இந்திய அணி சமீபத்தில் சொந்த மண்ணில் வங்கதேச அணிக்கு எதிராக நடைபெற்ற இரண்டு போட்டிகள் கொண்ட டெஸ்ட் தொடரை முழுமையாக கைப்பற்றிய கையுடன் இத்தொடரை எதிர்கொள்கிறது. மறுபக்கம் நியூசிலாந்து அணியோ இலங்கை அணிக்கு எதிரான அடுத்தடுத்த டெஸ்ட் தோல்விகளுடன் தொடரை இழந்து கையோடு இப்போட்டியில் விளையாடவுள்ளது.

இதனால் இப்போட்டியில் எந்த அணி ஆதிக்கம் செலுத்தி வெற்றியைப் பதிவுசெய்யும் என்ற எதிர்பார்ப்புகள் ரசிகர்கள் மத்தியில் அதிகரித்துள்ளன. மேற்கொண்டு இப்போட்டிக்காக இரு அணி வீரர்களும் தீவிரமாக தயாராகியும் வருகின்றனர். இந்நிலையில் இப்போட்டிக்கு முன்னதாக செய்தியாளர்களைச் சந்தித்து நியூசிலாந்து அணி கேப்டன் டாம் லேதம் தனது கேப்டன் பதவி குறித்தும், இந்திய அணி குறித்தும் சில கருத்துகளை தெரிவித்துள்ளார்.  

இதுகுறித்து பேசிய அவர்,  “நியூசிலாந்து அணியின் கேப்டனாக செயல்படுவதை எனக்கு கிடைத்த மிகப் பெரிய கௌரவமாக கருதுகிறேன். அணியின் கேப்டனாக இருந்தாலும், இல்லாவிட்டாலும் எனது பணியை சிறப்பாக செய்ய என்னால் முடிந்த அனைத்தையும் நான் முயற்சி செய்வேன். கேப்டனாக இருப்பதால் எனது மற்ற பொறுப்புகளில் எந்த ஒரு மாற்றமும் இருக்கப் போவதில்லை. இதற்கு முன்னரும் நான் இந்திய அணிக்கு எதிரான தொடரில் நியூசிலாந்து அணியை வழிநடத்தியுள்ளேன். 

கடந்த இரண்டு முறை இந்தியாவுக்கு சுற்றுப்பயணம் மேற்கொண்டு விளையாடியதிலிருந்து எங்களுக்கு நிறைய அனுபவம் கிடைத்துள்ளது. இந்த டெஸ்ட் தொடரின்போது, அந்த அனுபவம் மிகுந்த உதவியாக இருக்கும் என நம்புகிறேன். மேலும் கடந்த 12 மாதங்களில், நிறைய அணிகள் இன்னும் கொஞ்சம் ஆக்ரோஷமாக இருப்பது மற்றும் பந்து வீச்சாளர்களை இன்னும் கொஞ்சம் அழுத்தத்திற்கு உள்ளாக்கும் அணுகுமுறையை பின்பற்றி வருகிறது.

இது நீங்கள் விளையாடும் ஆடுகளங்களைப் பொறுத்து மாறுபடும் என நினைக்கிறேம். முற்றிலும் மாறுபட்ட வழிகளில் விளையாடும் வெவ்வேறு வகையான வீரர்களை நாங்கள் பெற்றுள்ளோம். அதனால் எங்கள் வீரர்கள் தங்களால் முடிந்தவரை அணியை வெற்றிக்கு அழைத்துச் செல்வார்கள் என்று எதிர்பார்க்கிறோம். மேலும் பெங்களூருவில் தற்போது மழை பெய்து வருவதன் காரணமாக வேகப்பந்து வீச்சாளர்களுக்கு இங்கு சற்று உதவி கிடைக்கும் என்று எதிர்பார்க்கிறேன்” என தெரிவித்துள்ளார்.

Also Read: Funding To Save Test Cricket

நியூசிலாந்து டெஸ்ட் அணி: டாம் லாதம் (கேப்டன்), டாம் பிளன்டெல், மைக்கேல் பிரேஸ்வெல் (முதல் டெஸ்ட் மட்டும்), மார்க் சாப்மேன், டெவான் கான்வே, மேட் ஹென்றி, டேரில் மிட்செல், வில் ஓ'ரூர்க், அஜாஸ் படேல், கிளென் பிலிப்ஸ், ரச்சின் ரவீந்திரா, மிட்செல் சான்ட்னர், பென் சியர்ஸ், இஷ் சோதி (இரண்டாவது மற்றும் மூன்றாவது டெஸ்ட் மட்டும்), டிம் சௌதீ, கேன் வில்லியம்சன், வில் யங்