NZ vs ENG, 2nd Test: இரண்டாவது இன்னிங்ஸில் அதிரடி காட்டும் நியூசிலாந்து!

நியூசிலாந்தில் சுற்றுபயணம் செய்து வரும் இங்கிலாந்து அணி இரண்டு போட்டிகள் கொண்ட டெஸ்ட் தொடரில் விளையாடி வருகிறது. இத்தொடரின் முதல் போட்டியில் இங்கிலாந்து அணி அபார வெற்றியைப் பதிவுசெய்து 1-0 என்ற கணக்கில் தொடரில் முன்னிலைப் பெற்றுள்ளது.

இந்நிலையில் இரு அணிகளுக்கும் இடையேயான இரண்டாவது டெஸ்ட் போட்டி வெலிங்டன் நகரில் நடைபெற்று வருகிறது. இந்த டெஸ்ட் போட்டியில் மழையால் பாதிக்கப்பட்ட முதல் நாள் ஆட்டத்தில் இங்கிலாந்து அணி 65 ஓவர்களில் 3 விக்கெட்கள் இழப்புக்கு 315 குவித்தது. ஸாக்கிராவ்லி 2, ஆலி போப் 10, பென்டக்கெட் 9 ரன்களில் ஆட்டமிழந்தனர். 21 ரன்களுக்கு 3 விக்கெட்களை இழந்த நிலையில் ஹாரி புரூக், ஜோ ரூட் ஜோடி அபாரமாக விளையாடி பார்ட்னர்ஷிப்பை கட்டமைத்து அணியை சரிவில் இருந்து மீட்டது. ஹாரி புரூக் 184, ஜோ ரூட் 101 ரன்களுடன் ஆட்டமிழக்காமல் இருந்தனர்.

நேற்று 2ஆவது நாள் ஆட்டத்தை தொடர்ந்து விளையாடிய இங்கிலாந்து அணி 87.1 ஓவரில் 8 விக்கெட்கள் இழப்புக்கு 435 ரன்கள் குவித்த நிலையில் முதல் இன்னிங்ஸை டிக்ளேர் செய்தது. ஹாரி புரூக் 176 பந்துகளில், 24 பவுண்டரிகள், 5 சிக்ஸர்களுடன் 186 ரன்கள் எடுத்த நிலையில் மேட் ஹென்றி வீசிய பந்தில் அவரிடமே பிடிகொடுத்து வெளியேறினார். 4-வது விக்கெட்டுக்கு ஜோ ரூட்டுடன் இணைந்து 302 ரன்கள் சேர்த்தார்.

இதன் பின்னர் களமிறங்கிய கேப்டன் பென் ஸ்டோக்ஸ் 27, பென் ஃபோக்ஸ் 0, ஸ்டூவர்ட் பிராடு 14, ஆலி ராபின்சன் 18 ரன்களில் ஆட்டமிழந்தனர். ஜோ ரூட் 224 பந்துகளில், 10 பவுண்டரிகள் 3 சிக்ஸர்களுடன் 153 ரன்களும், ஜேக் லீச் 6 ரன்களும் சேர்த்து ஆட்டமிழக்காமல் இருந்தனர். நியூஸிலாந்து அணி சார்பில் மேட் ஹென்றி 4, மைக்கேல் பிரேஸ்வெல் 2 விக்கெட்கள் வீழ்த்தினர்.

இதையடுத்து பேட் செய்த நியூஸிலாந்து அணி தொடக்கத்திலேயே ஆட்டம் கண்டது. டேவன் கான்வே 0, கேன் வில்லியம்சன் 4, வில் யங் 2 ரன்களில் ஜேம்ஸ் ஆண்டர்சன் பந்தில் நடையை கட்டினர்.சற்று தாக்குப்பிடித்து விளையாடிய டாம் லேதம் 35, ஹென்றி நிக்கோல்ஸ் 30, டேரில் மிட்செல் 13 ரன்களில் ஜேக் லீச்சின் சுழற்பந்து வீச்சில் ஆட்டமிழந்தனர். அதிரடி வீரரான மைக்கேல் பிரேஸ்வெல் 6 ரன்னில் ஸ்டூவர்ட் பிராடு பந்தில் விக்கெட்டை பறிகொடுத்தார். 103 ரன்களுக்கு 7 விக்கெட்களை பறிகொடுத்த நிலையில் டாம் பிளண்டல், கேப்டன் டிம்சவுதி ஜோடி நிதானமாக விளையாடியது.

நியூஸிலாந்து அணி 42 ஓவர்களில் 7 விக்கெட்கள் இழப்புக்கு 138ரன்கள் எடுத்திருந்த போது மழைகுறுக்கிட்டது. தொடர்ந்து போட்டியை நடத்த முடியாததால் 2-வது நாள் ஆட்டம் முடித்துக் கொள்ளப்பட்டது. டாம் பிளண்டல் 25, டிம் சவுதி 23 ரன்களுடன் களத்தில் இருந்தனர். இங்கிலாந்து தரப்பில் ஜேம்ஸ்ஆண்டர்சன், ஜேக் லீச் ஆகியோர் தலா 3 விக்கெட்கள் வீழ்த்தினர்.

கைவசம் 3 விக்கெட்கள் இருக்க297 ரன்கள் பின்தங்கிய நிலையில் இன்று 3ஆவது நாள் ஆட்டத்தை தொடர்ந்த நியூசிலாந்து அணியில் அபாரமாக பேட்டிங் செய்த கேப்டன் டிம் சௌதி அரைசதம் அடித்து 73 ரன்களை விளாச, முதல் இன்னிங்ஸில் 209 ரன்கள் அடித்தது நியூசிலாந்து அணி.

முதல் இன்னிங்ஸில் முடிவில் ஃபாலோ ஆன் பெற்ற நியூசிலாந்து அணி 2ஆவது இன்னிங்ஸை தொடர்ந்தது. 2ஆவது இன்னிங்ஸில் நியூசிலாந்து வீரர்கள் சுதாரிப்புடன் பேட்டிங் செய்தனர். தொடக்க வீரர்கள் டெவான் கான்வே மற்றும் டாம் லேதம் ஆகிய இருவரும் நிலைத்து நின்று பொறுப்புடன் பேட்டிங் ஆடி அரைசதம் அடித்து முதல் விக்கெட்டுக்கு 149 ரன்களை குவித்தனர். 

கான்வே 61 ரன்களுக்கும், டாம் லேதம் 83 ரன்களுக்கும் ஆட்டமிழந்தனர்.  வில் யங் 8 ரன்களுக்கு ஆட்டமிழந்து ஏமாற்றமளித்தார். அதன்பின்னர் கேன் வில்லியம்சனும் ஹென்ரி நிகோல்ஸும் இணைந்து பேட்டிங் விளையாடிவருகின்றனர். இதன்மூலம் 3ஆம் நாள் ஆட்ட முடிவில் நியூசிலாந்து அணி 2ஆவது இன்னிங்ஸில் 3 விக்கெட் இழப்பிற்கு 202 ரன்கள் அடித்துள்ளது. கேன் வில்லியம்சன் 25 ரன்களுடனும், ஹென்ரி நிகோல்ஸ் 18 ரன்களுடனும் களத்தில் உள்ளனர்.