நியூசிலாந்து அணி இந்தியாவில் சுற்றுப்பயணம் செய்து ஆஃப்கானிஸ்தானுக்கு எதிரான ஒரே ஒரு டெஸ்ட் போட்டி கொண்ட தொடரில் விளையாடவுள்ளது. அதன்படி இவ்விரு அணிகளுக்கும் இடையேயான இந்த டெஸ்ட் போட்டியானது செப்டம்பர் 09ஆம் தேதி நெய்டாவில் உள்ள ஸ்போர்ட்ஸ் காம்ப்ளெக்ஸ் மைதானத்தில் தொடங்கியது. உலக கிரிக்கெட் வரலாற்றில் இவ்விரு அணிகளும் மோதும் முதல் டெஸ்ட் போட்டி இது என்பதால் இப்போட்டியின் மீது கூடுதல் எதிர்பார்ப்புகள் இருந்தன.
அதன்படி செப்டம்பர் 9ஆம் தேதி தொடங்க இருந்த இந்த போட்டியானது ஈரப்பதம் மற்றும் மோசமான வானிலை காரணமாக டாஸ் நிகழ்வானது ஒத்திவைக்கப்பட்டிருந்தது. பின்னர் மைதானத்தில் ஈரப்பதமானது தொடர்ந்து இருந்து வந்த காரணத்தால் இப்போட்டியின் முதல் நாள் ஆட்டமானது முழுவதுமாக கைவிடப்பட்டிருந்தது. இதனையடுத்து நேற்று தொடங்க இருந்த இரண்டாம் நாள் ஆட்டமும் ஈரப்பதம் காரணமாக முழுவதுமாக கைவிடப்பட்டது.
இந்நிலையில் எஞ்சியிருந்த மூன்று நாள் ஆட்டங்களும் நடைபெறும் என ரசிகர்கள் பெரிதும் எதிர்பார்த்து காத்திருந்த நிலையில் இப்போட்டியின் மூன்றாம் நாள், நான்காம் நாள் ஆட்டங்களும் அடுத்தடுத்து தொடர் மழை காரணமாக கைவிடப்பட்ட நிலையில், இன்றைய தினம் இப்போட்டியின் ஐந்தாம் நாள் ஆட்டமும் தொடர் மழை காரணமாக கைவிடப்படுவதாக அறிவிக்கப்பட்டது. இதனால் இப்போட்டி முடிவு எட்டப்படமல் முழுவதுமாக கைவிடப்பட்டதாகவும் அறிவிக்கப்பட்டுள்ளது.
இதனையடுத்து ஆஃப்கானிஸ்தான் அணியானது அடுத்ததாக தென்ஆப்பிரிக்காவுக்கு எதிரான ஒருநாள் தொடருக்காக ஐக்கிய அரபு அமீரகம் செல்லவுள்ளது. அதே நேரத்தில் நியூசிலாந்து அணியானது இரண்டு போட்டிகளைக் கொண்ட டெஸ்ட் தொடரில் விளையாடுவதற்காக இலங்கைக்கு செய்யவுள்ளது. அதன்பின் அடுத்த மாதம் மீண்டும் இந்தியாவில் சுற்றுப்பயணம் செய்து மூன்று டெஸ்ட் போட்டிகளில் விளையாடவுள்ளது.
அதுமட்டுமின்றி சர்வதேச டெஸ்ட் கிரிக்கெட் வரலாற்றில் ஆசியாவில் நடைபெற்ற டெஸ்ட் போட்டி ஒன்று மழை காரணமாக முழுவதுமாக கைவிடப்பட்டது இதுவே முதல் முறையாகும். மேற்கொண்டு 147 ஆண்டுகால டெஸ்ட் கிரிக்கெட் வரலாற்றில், விளையாடப்பட்ட 2,548 டெஸ்ட் போட்டிகளில் ஒரு பந்து கூட வீசப்படாமல் இதுவரை ஏழு போட்டிகள் மட்டுமே முழுவதுமாக கைவிடப்பட்டுள்ளது. அதன்படி, கடந்த 1890ஆம் ஆண்டு ஆஸ்திரேலியா மற்றும் இங்கிலாந்து அணிகளுக்கு இடையிலான ஆஷஸ் டெஸ்ட் போட்டி முழுவதுமாக கைவிடப்பட்டதே முதல் முறையாகும்.
Also Read: Funding To Save Test Cricket
ஒரு பந்து கூட வீசப்படாமல் ரத்து செய்யப்பட்ட டெஸ்ட் போட்டிகளின் பட்டியல்
- டெஸ்ட் எண்: 34 – ஆஸ்திரேலியா vs இங்கிலாந்து 25-08-1890: ஓல்ட் டிராஃபோர்ட், மான்செஸ்டர்
- டெஸ்ட் எண்: 264 – ஆஸ்திரேலியா vs இங்கிலாந்து 08-07-1938: ஓல்ட் டிராஃபோர்ட், மான்செஸ்டர்
- டெஸ்ட் எண்: 675 – ஆஸ்திரேலியா vs இங்கிலாந்து 31-12-1970: மெல்போர்ன் கிரிக்கெட் மைதானம்
- டெஸ்ட் எண்: 1113 – நியூசிலாந்து vs பாகிஸ்தான் 03-02-1989: கேரிஸ்ப்ரூக், டுனெடின்
- டெஸ்ட் எண்: 1140 – இங்கிலாந்து vs வெஸ்ட் இண்டீஸ் 10-03-1990: போர்டாக்ஸ், ஜார்ஜ்டவுன், கயானா
- டெஸ்ட் எண்: 1434 – பாகிஸ்தான் vs ஜிம்பாப்வே 17-12-1998 இக்பால் ஸ்டேடியம், பைசலாபாத்
- டெஸ்ட் எண்: 1434 – நியூசிலாந்து vs இந்தியா 18-12-1998: கேரிஸ்ப்ரூக், டுனெடின்
- டெஸ்ட் எண்: 2549 – ஆப்கானிஸ்தான் vs நியூசிலாந்து 13-09-2024: கிரேட்டர் நொய்டா