AUSW vs SAW, Only Test: தென் ஆப்பிரிக்காவை பந்தாடி ஆஸ்திரெலியா அபார வெற்றி!

ஆஸ்திரேலியாவில் சுற்றுப்பயணம் மேற்கொண்டுள்ள தென் ஆப்பிரிக்க மகளிர் அணி தற்போது டெஸ்ட் போட்டியில் விளையாடி வருகிறது. அதன்படி பெர்த்தில் நேற்று முந்தினம் தொடங்கிய இப்போட்டியில் டாஸ் வென்ற ஆஸ்திரேலிய மகளிர் அணி முதலில் பந்துவீசுவதாக அறிவித்தது. அதன்படி இன்னிங்ஸைத் தொடங்கிய தென் ஆப்பிரிக்க அணி வீராங்கனைகள் எதிரணி பந்துவீச்சுக்கு ஈடுகொடுக்க முடியாமல் அடுத்தடுத்து விக்கெட்டுகளை இழந்தனர். 

இதனால் தென் ஆப்பிரிக்க மகளிர் அணி முதல் இன்னிங்ஸில் 31.2 ஓவர்களில் அனைத்து விக்கெட்டுகளையும் இழந்ததுடன், வெறும் 76 ரன்களில் ஆல் அவுட்டானது. ஆஸ்திரேலிய அணி தரப்பில் அபாரமாக பந்துவீசிய டார்சி பிரௌன் 5 விக்கெட்டுகளை வீழ்த்தினார்.  இதைத்தொடர்ந்து முதல் இன்னிங்ஸைத் தொடங்கிய ஆஸ்திரேலிய மகளிர் அணி அபாரமான ஆட்டத்தை வெளிப்படுத்தி அசத்தியதது. 

அதிலும் இப்போட்டியில் அபார ஆட்டத்தை வெளிப்படுத்திய அனபெல் சதர்லேண்ட் சர்வதேச டெஸ்ட் கிரிக்கெட்டில் தனது முதல் இரட்டை சதத்தைப் பதிவுசெய்து மிரட்டினார். மேலும் மகளிர் டெஸ்ட் கிரிக்கெட்டில் அடிக்கப்பட்ட அதிவேக இரட்டை சதமாகவும் இது அமைந்தது. இதன்மூலம் ஆஸ்திரேலிய மகளிர் அணி 575 ரன்களைச் சேர்த்து முதல் இன்னிங்ஸை டிக்ளர் செய்தது. இதன்மூலம் ஆஸ்திரேலிய அணி முதல் இன்னிங்ஸில் 499 ரன்கள் முன்னிலையும் பெற்றது.

இதையடுத்து இரண்டாவது இன்னிங்ஸைத் தொடர்ந்த தென் ஆப்பிரிக்க மகளிர் அணியில் கேப்டன் லாரா வோல்வார்ட் 8 ரன்களுக்கும், போஷ் ரன்கள் ஏதுமின்றியும், சுனே லூஸ் 5 ரன்களுக்கும் என விக்கெட்டை இழந்தார். இதனால் இரண்டாம் நாள் ஆட்டநேர முடிவில் தென் ஆப்பிரிக்க மகளிர் அணி 3 விக்கெட் இழப்பிற்கு 67 ரன்களை மட்டுமே எடுத்தது. பின் இன்று தொடங்கிய மூன்றாம் நாள் ஆட்டத்தை தஸ்மின் பிரிட்ஸ் 18 ரன்களுடனும், டெல்மி டக்கர் 27 ரன்களுடனும் தொடர்ந்தனர்.

இதில் தஸ்மின் பிரிட்ஸ் 31 ரன்கள் எடுத்த நிலையில் விக்கெட்டை இழந்தார். அதன்பின் இணைந்த டெல்மீ டக்கர் - சோலே ட்ரையான் இணை பொறுப்பான ஆட்டத்தை வெளிப்படுத்தி அணியின் ஸ்கோரை மளமளவென உயர்த்தினர். இதில் டெல்மி டக்கர் 64 ரன்களில் விக்கெட்டை இழக்க, அவரைத்தொடர்ந்து 64 ரன்கள் எடுத்த நிலையில் சோலே ட்ரையானும் விக்கெட்டை இழந்தார். பின்னர் களமிறங்கிய வீராங்கனைகள் சோபிக்க தவறினர். 

இதனால் தென் ஆப்பிரிக்க மகளிர் அணி இரண்டாவது இன்னிங்ஸில் 215 ரன்களைச் சேர்த்து ஆல் ஆவுட்டானது. ஆஸ்திரேலிய தரப்பில் கிம் கார்த், டார்சி பிரௌன், ஆஷ்லே கார்ட்னர், அனபெல் சதர்லேண்ட் ஆகியோர் தலா 2 விக்கெட்டுகளை வீழ்த்தினர். இதன்மூலம் ஆஸ்திரேலிய மகளிர் அணி இன்னிங்ஸ் மற்றும் 284 ரன்கள் வித்தியாசத்தில் தென் ஆப்பிரிக்க மகளிர் அணியை வீழ்த்தி அபார வெற்றியைப் பதிவுசெய்து அசத்தினர்.