AUS vs WI, 2nd Test: 214 ரன்களில் சுருண்டது வெஸ்ட் இண்டீஸ் !
ஆஸ்திரேலியாவில் சுற்றுப்பயணம் செய்துவரும் வெஸ்ட் இண்டீஸ் அணி இரண்டு போட்டிகள் கொண்ட டெஸ்ட் தொடரில் விளையாடி வருகிறது. இதில் ஏற்கெனவே நடந்து முடிந்த முதல் டெஸ்ட் போட்டியில் ஆஸ்திரேலிய அணி வெற்றிபெற்று 1-0 என்ற கணக்கில் தொடரில் முன்னிலை வகிக்கிறது.
இந்நிலையில் இரு அணிகளுக்கும் இடையேயான இரண்டாவது டெஸ்ட் போட்டி பகலிரவு ஆட்டமாக நேற்று முந்தினம் பெர்த்தில் தொடங்கியது. இப்போட்டியில் டாஸ் வென்ற ஆஸ்திரேலிய அணியின் கேப்டன் ஸ்டீவ் ஸ்மித் முதலில் பேட்டிங் செய்வதாக அறிவித்தார். அதன்படி களமிறங்கிய ஆஸ்திரேலிய அணி மார்னஸ் லபுசாக்னே, டிராவிஸ் ஹெட் ஆகியோர் சதமடித்து அசத்தியதன் மூலம், முதல் இன்னிங்ஸில் 7 விக்கெட் இழப்பிற்கு 511 ரன்களைச் சேர்த்து டிக்ளர் செய்தது.
இதில் அதிகபட்சமாக மார்னஸ் லபுசாக்னே 163 ரன்களையும், டிராவிஸ் ஹெட் 175 ரன்களையும் எடுத்தனர். வெஸ்ட் இண்டீஸ் அணி தரப்பில் அல்ஸாரி ஜோசப், டெவான் தாமஸ் தல 2 விக்கெட்டுகளைக் கைப்பற்றினர்.
இதையடுத்து முதல் இன்னிங்ஸைத் தொடங்கிய வெஸ்ட் இண்டீஸ் அணியில் கேப்டன் கிரேய்க் பிராத்வையிட் 19 ரன்களிலும், ஷமாரா ப்ரூக்ஸ், ஜென்மைன் பிளாக்வுட் 3 ரன்களிலும், டெவான் தமாஸ் 19 ரன்களிலும் அடுத்தடுத்து விக்கெட்டுகளை இழந்தனர். பின்னர் ஜோடி சேர்ந்த சந்தர்பால் - ஆண்டர்சன் பிலீப் ஆகியோர் நிதான ஆட்டத்தை வெளிப்படுத்தி வருகின்றனர்.
இதன்மூலம் இரண்டாம் நாள் ஆட்டநேர முடிவில் வெஸ்ட் இண்டீஸ் அணி 4 விக்கெட் இழப்பிற்கு 102 ரன்களைச் சேர்த்தது. அதன்பின் இன்று தொடங்கிய மூன்றாம் நாள் ஆட்டத்தில் சந்தர்பால் மேற்கொண்டு ஏதும் ரன்கள் சேர்க்காமல் 47 ரன்கல் ரன் அவுட்டாகி அரைசதம் அடிக்கும் வாய்ப்பை தவறவிட்டார்.
அதனைத் தொடர்ந்து ஆண்டர்சன் பிலிப்பும் 43 ரன்களுக்கு ஆட்டமிழக்க, ஜேசன் ஹோல்டர், ஜோஷுவா டா சில்வா, அல்ஸாரி ஜோசப் ஆகியோரும் சொற்ப ரன்களுக்கு விக்கெட்டுகளை இழந்தனர். பின்னர் இறுதிவிக்கெட்டுக்கு ஜோடி சேர்ந்த ரோஷ்டன் சேஸ் - மைண்டிலி இணை அதிரடியாக விளையாடி ஸ்கோரை உயர்த்தினர்.
இருப்பினும் வெஸ்ட் இண்டீஸ் அணி முதல் இன்னிங்ஸில் 212 ரன்களைச் சேர்த்து அனைத்து விக்கெட்டுகளையும் இழந்தது. ஆஸ்திரேலிய அணி தரப்பில் நாதன் லையன் 3 விக்கெட்டுகளையும், மிட்செல் ஸ்டார்க், மைக்கேல் நேசர் தலா 2 விக்கெட்டுகளையும் கைப்பற்றினர். இதன்மூலம் ஆஸ்திரேலிய அணி முதல் இன்னிங்ஸில் 297 ரன்கள் முன்னிலைப் பெற்றுள்ளது.