சர்வதேச கிரிக்கெட்டிலிருந்து ஓய்வு பெற்றார் மெக் லெனிங்!

ஆஸ்திரேலிய மகளிர் அணி கேப்டன் மெக் லெனிங் அனைத்து வகையான சர்வதேச கிரிக்கெட்டிலிருந்தும் ஓய்வு பெறுவதாக அறிவித்துள்ளார்.

ஆஸ்திரேலிய மகளிர் கிரிக்கெட் அணியின் வெற்றிகரமான கேப்டனாக வலம் வந்த மெக் லெனிங் திடீரென தனது ஓய்வு முடிவை அறிவித்துள்ளார். 31 வயதான அவர், ஆஸ்திரேலிய அணிக்காக 182 சர்வதேச போட்டிகளில் கேப்டனாக செயல்பட்டுள்ளார். 2010ஆம் ஆண்டு தனது 18 வயதில் ஆஸ்திரேலிய அணிக்காக அறிமுகமான மெக் லெனிங் 13 ஆண்டு கால சர்வதேச கிரிக்கெட் வாழ்க்கைக்கு இன்று ஓய்வு அறிவித்துள்ளார்.

கடந்த 2014இல் ஆஸ்திரேலியாவை முதன்முதலில் வழிநடத்திய லெனிங், மகளிர் கிரிக்கெட்டில் வெற்றிகரமான கேப்டன்களில் ஒருவராக வலம் வருகிறார். 78 ஒருநாள் போட்டிகளில் 69 வெற்றிகள், 100 டி20 போட்டிகளில் 76 வெற்றிகள் மற்றும் 4 டெஸ்ட் போட்டிகளில் ஒரு வெற்றி என ஆஸ்திரேலியாவை வெற்றிகரமாக வழிநடத்தி உள்ளார். 

மேலும் அவர் தனது கேப்டன்ஷிப்பில் ஆஸ்திரேலிய அணிக்கு நான்கு டி20 உலகக்கோப்பைகள், ஒரு 50 ஓவர் உலகக்கோப்பை மற்றும் கடந்த ஆண்டு காமன்வெல்த் விளையாட்டுப் போட்டியில் தங்கப்பதக்கம் வென்று கொடுத்துள்ளார். ஆஸ்திரேலிய அணிக்காக 6 டெஸ்ட் போட்டிகள், 103 ஒருநாள் போட்டிகள், மற்றும் 132 டி20 போட்டிகள் உட்பட 241 சர்வதேச போட்டிகளில் விளையாடியுள்ள அவர், 8ஆயிரத்திற்கும் மேற்பட்ட ரன்களை குவித்துள்ளார். 

ஓய்வு முடிவு குறித்து பேசிய அவர், "சர்வதேச கிரிக்கெட்டில் இருந்து விலகுவது என்பது கடினமான முடிவு. ஆனால் இப்போதுதான் எனக்கு சரியான நேரம் என்று உணர்கிறேன். 13 ஆண்டுகால சர்வதேச கிரிக்கெட் வாழ்க்கையை அனுபவித்த நான் நம்பமுடியாத அதிர்ஷ்டசாலி. அதனால் ஓய்வு பெற இப்போது சரியான நேரம் என்று எனக்குத் தெரியும். என்னால் சாதிக்க முடிந்ததைப் பற்றி நான் பெருமைப்படுகிறேன்.

நான் விரும்பும் விளையாட்டை விளையாட அனுமதித்த எனது குடும்பத்தினர், எனது அணியினர், கிரிக்கெட் ஆஸ்திரேலியா மற்றும் ஆஸ்திரேலிய கிரிக்கெட் வீரர்கள் சங்கம் ஆகியோருக்கு நன்றி தெரிவிக்க விரும்புகிறேன். சர்வதேச கிரிக்கெட் வாழ்க்கையில் எனக்கு ஆதரவாக இருந்த அனைத்து ரசிகர்களுக்கும் எனது நன்றியைத் தெரிவித்துக் கொள்கிறேன்” என்று கூறியுள்ளார்.

ஆஸ்திரேலியா அடுத்த மாதம் இந்தியாவில் சுற்றுப்பயணம் செய்ய உள்ள நிலையில் ஆஸ்திரேலிய கிரிக்கெட் விரைவில் அடுத்த கேப்டனை தேர்வு செய்ய வேண்டிய கட்டாயத்தில் உள்ளது. தற்போதைய துணை கேப்டனான அலிசா ஹீலி, மகளிர் பிக் பாஷ் லீக் லீகின் போது ஏற்பட்ட காயத்தால் சிகிச்சை பெற்று வருகிறார். அதனால், வேறு ஒருவரை கேப்டனாக்க ஆஸ்திரேலியா கிரிக்கெட் முடிவு செய்துள்ளதாக கூறப்படுகிறது.