டி20 உலக கோப்பை இறுதிப்போட்டி இன்று துபாயில் நடக்கிறது. இறுதிப்போட்டியில் மோதும் நியூசிலாந்து மற்றும் ஆஸ்திரேலியா ஆகிய இரு அணிகளுமே சமபலம் வாய்ந்த அணிகள் என்பதாலும், முதல் முறையாக டி20 உலக கோப்பையை தூக்கும் வேட்கையில் இருப்பதாலும் போட்டி கண்டிப்பாக மிகக்கடுமையாக இருக்கும் என்று எதிர்பார்க்கப்படுகிறது.
கேன் வில்லியம்சன் தலைமையிலான நியூசிலாந்து அணியில் பெரிய மேட்ச் வின்னர்கள் என்று யாரும் இல்லையென்றாலும், தேவையான போது யாராவது ஒருசில வீரர்கள் பொறுப்புடன் விளையாடி அணியை வெற்றி பெறச்செய்கின்றனர். அந்த அணி வீரர்கள் அனைவரும் ஒன்றிணைந்து சிறப்பான ஆட்டத்தை வெளிப்படுத்தி அணிக்கு வெற்றியை தேடிக்கொடுக்கின்றனர்.
அதிலும் இஷ் சோதி, டிம் சௌதி, டிரெண்ட் போல்ட், டெவான் கான்வே, வில்லியம்சன், மார்டின் கப்டில், டேரில் மிட்செல், ஜிம்மி நீஷம் என ஒவ்வொரு வீரருமே அணிக்கு தேவையானபோது சிறந்த ஆட்டத்தை வெளிப்படுத்தி வருவது அணிக்கு கூடுதல் பலத்தை வழங்குகிறது.
ஆனால் காயம் காரணமாக டெவான் கான்வே இறுதிப்போட்டியில் விளையாடாதது ஒன்றே நியூசிலாந்து அணிக்கு பின்னடைவை ஏற்படுத்தும்.
ஆஸ்திரேலிய அணியில் வார்னர் ஃபார்முக்கு வந்திருப்பது நல்ல விஷயம். மிட்செல் மார்ஷ், மார்கஸ் ஸ்டோய்னிஸ் ஆகிய ஆல்ரவுண்டர்கள் இருவரும் சிறப்பாக விளையாடி வருகின்றனர். ஸ்மித்தும் அவர்களுடன் இணைந்து, மேத்யூ வேடும் அரையிறுதியில் ஆடியதுபோல் ஆடினால், ஆஸ்திரேலிய அணி அசத்திவிடும். பந்துவீச்சைப் பொறுத்தமட்டில் மிட்செல் ஸ்டார்க், கம்மின்ஸ், ஹேசில்வுட் ஆகிய மூவருமே சிறந்த ஃபாஸ்ட் பவுலர்கள். ஸ்பின்னில் ஆடம் ஸாம்பா அசத்திவருகிறார்.
இவ்வாறாக நியூசிலாந்து மற்றும் ஆஸ்திரேலியா ஆகிய இரு அணிகளுமே சமபலம் வாய்ந்த அணிகளாக திகழ்ந்தாலும், இரு அணிகளுக்கு இடையேயான பெரிய வித்தியாசமாக ஸ்பின் பவுலிங் இருப்பதற்கான வாய்ப்புள்ளது. ஸ்பின் பவுலிங்கை பொறுத்தமட்டில் நியூசிலாந்தின் இஷ் சோதி, மிட்செல் சாண்ட்னெர் ஆகிய இருவரும் மிரட்டிவருகின்றனர்.
அதுமட்டுமல்லாது துபாயை பொறுத்தமட்டில் டாஸ் மிக முக்கிய பங்கு வகிக்கும். இந்த உலக கோப்பை தொடரில் துபாயில் நடந்த அனைத்து போட்டிகளிலும் 2ஆவதாக பேட்டிங் ஆடிய அணி தான் வெற்றி பெற்றிருக்கிறது என்பதால், இன்றைய போட்டியில் டாஸ் மிக முக்கியம் பங்காக இருக்கும்,
உத்தேச அணி
நியூசிலாந்து அணி: மார்டின் கப்தில், டேரைல் மிட்செல், கேன் வில்லியம்சன் (கேப்டன்), கிளென் பிலிப்ஸ், ஜிம்மி நீஷம், டிம் சேய்ஃபெர்ட், மிட்செல் சாண்ட்னெர், டிம் சௌதி, இஷ் சோதி, ட்ரெண்ட் போல்ட், ஆடம் மில்னே.
Also Read: T20 World Cup 2021
ஆஸ்திரேலிய அணி: டேவிட் வார்னர், ஆரோன் ஃபின்ச் (கேப்டன்), மிட்செல் மார்ஷ், ஸ்டீவ் ஸ்மித், கிளென் மேக்ஸ்வெல், மார்கஸ் ஸ்டோய்னிஸ், மேத்யூ வேட், பாட் கம்மின்ஸ், மிட்செல் ஸ்டார்க், ஆடம் ஸாம்பா, ஜோஷ் ஹேசில்வுட்.