ஆஸ்திரேலிய மகளிர் கிரிக்கெட் அணியின் கேப்டன் மெக் லெனிங். இவர் ஆஸ்திரேலிய அணிக்காக இதுவரை 6 டெஸ்ட், 100 ஒருநாள், 124 டி20 போட்டிகளில் விளையாடி 8 ரன்களைக் குவித்துள்ளார். இதில் 17 சதங்களும், 35 அரைசதங்களும் அடங்கும்.
இந்நிலையில் மெக் லெனிங் தனிப்பட்ட காரணங்களுக்காக கிரிக்கெட்டிலிருந்து காலவரையின்றி ஓய்வு எடுப்பதாக அறிவித்துள்ளார். இது ரசிகர்கள் மத்தியில் பெரும் கவலையை ஏற்படுத்தியுள்ளது.
இது குறித்து ஆஸ்திரேலிய பெண்கள் கிரிக்கெட் அணியின் நிர்வாகி கூறுகையில், “ மெக் லெனிங் ஆஸ்திரேலிய கிரிக்கெட்டில் நம்பமுடியாத பங்களிப்பாளராக இருந்தார். தனித்தனியாகவும் அணியின் ஒரு பகுதியாகவும் குறிப்பிடத்தக்க சாதனைகளை சாதித்து வந்தார். மேலும் இளம் வீராங்கனைகளுக்கு ஒரு சிறந்த முன்மாதிரியாக அவர் இருந்து வருகிறார்.
எங்கள் வீரர்களின் நலன் எப்போதும் எங்கள் முதல் முன்னுரிமையாகும். மேலும் மெக் அவருக்கு தேவையான ஆதரவையும் இடத்தையும் பெறுவதை உறுதிசெய்ய நாங்கள் தொடர்ந்து பணியாற்றுவோம். உலக கிரிக்கெட்டில் ஆஸ்திரேலியா பெண்களின் ஆதிக்கத்தில் முன்னணியில் இருந்தவர் லெனிங். கடந்த இரண்டு ஆண்டுகளில், அவர் டி20 உலகக்கோப்பை மற்றும் 50 ஓவர் ஆஷஸ் தொடரை வென்றார்.
தற்போதைய நிலையில், லெனிங் எப்போது திரும்புவார் என்பது குறித்து உறுதியான தேதி எதுவும் இல்லை. ஏனெனில் அவர் தனது முடிவின் பின்னணியில் உள்ள காரணத்தை விளக்கி தனது தனியுரிமை மதிக்கப்பட வேண்டும்” என்று கூறியுள்ளார்.
தனது முடிவு குறித்து பேசிய மெக் லெனிங், “இரண்டு வருடங்கள் பிசியாக இருந்த பிறகு என் மீது கவனம் செலுத்தி நேரத்தை செலவிடுவதற்கு ஒரு படி பின்வாங்க முடிவு செய்துள்ளேன். ஆஸ்திரேலியா கிரிக்கெட் வாரியம் மற்றும் எனது அணியினரின் ஆதரவிற்கு நான் நன்றியுள்ளவளாக இருக்கிறேன். இந்த நேரத்தில் எனது தனியுரிமை மதிக்கப்பட வேண்டும் என்று கேட்டுக்கொள்கிறேன்” என்று தெரிவித்துள்ளார்.
ஆஸ்திரேலிய மகளிர் கிரிக்கெட்டில் சிறந்த பேட்டர்களில் ஒருவராக விளங்கும் மெக் லெனிங், தற்போது ஐசிசி டி20 தரவரிசையில் 2ஆவது இடத்திலும், ஒருநாள் போட்டிகளில் ஐந்தாவது இடத்திலும் உள்ளார்.
2010 இல் அறிமுகமான லானிங் 2014 இல் ஆஸ்திரேலிய அணியின் கேப்டனாக நியமிக்கப்பட்டார். அப்போது அவருக்கு 21 வயது. லானிங் ஆஸ்திரேலிய அணிக்கு 171 போட்டிகளில் கேப்டனாக இருந்து சாதனை படைத்துள்ளார். அவருக்கு முன்னால் ஆலன் பார்டர் மற்றும் ரிக்கி பாண்டிங் மட்டுமே உள்ளனர்.
மேலும் கடந்தாண்டு நடைபெற்ற மகளிர் உலகக்கோப்பை தொடர் மற்றும் தற்போது நடந்து முடிந்த காமன்வெல்த் மகளிர் கிரிக்கெட் தொடர் ஆகியோவற்றில் இவரது தலைமையிலான ஆஸ்திரேலிய அணி சாம்பியன் பட்டத்தை வென்றது குறிப்பிடத்தக்கது.