ஜோகோவிச்சுடன் டென்னிஸ் விளையாடிய ஸ்டீவ் ஸ்மித் - வைரலாகும் காணொளி!

கிராண்ட்ஸ்லாம் கிரிக்கெட் தொடர்களில் முக்கிய போட்டியாக கருதப்படும் ஆஸ்திரேலியன் ஓபன் டென்னிஸ் தொடர் வரும் 14ஆம் தேதி முதல் ஆஸ்திரேலியாவிலுள்ள மெல்போர்ன் பார்க்கில் தொடங்கி வரும் 28ஆம் தேதி வரையில் நடக்கிறது. இந்த தொடரில் 10 முறை சாம்பியன் பட்டத்தை வென்ற செர்பியாவின்நோவக் ஜோகோவிச் இடம் பெற்று விளையாட இருக்கிறார்.

தற்போது இந்த தொடருக்கான தகுதி சுற்று போட்டிகள் நடந்து வரும் நிலையில், இந்த தொடரை பிரபலப்படுத்தும் விதமாக நோவக் ஜோகோவிச் மற்றும் ஆஸ்திரேலியா கிரிக்கெட் வீரர் ஸ்டீவ் ஸ்மித் இருவரும் இணைந்து டென்னிஸ் விளையாடினர். இதில், ஜோகோவிச் பந்தை சர்வீஸ் செய்ய, பேட்டிங்கில் தடுப்பது போன்று ஸ்மித் கச்சிதமாக பந்தை திருப்பி அனுப்பினார். இதைக் கண்ட ஜோகோவிச் டென்னிஸ் பேட்டை கீழே போட்டுவிட்டு தனது இரு கைகளையும் தூக்கி தலை குணைந்து ஸ்மித்திற்கு மரியாதை செய்தார்.

அதன் பிறகு டென்னிஸ் மைதானத்திலேயே ஜோகோவிச் கிரிக்கெட் விளையாடினார். ஸ்மித் பந்து வீச, ஜோகோவிச் பேட்டிங் செய்தார். முதல் பந்தை சிக்ஸருக்கு அனுப்பிய ஜோகோவிச்சைக் கண்டு ரசிகர்கள் ஆரவாரம் செய்தனர். அதன் பிறகு ரசிகர் ஒருவர் பந்து வீசினார். அவர் வீசிய 2 பந்துகளையும் பார்வையாளர் அரங்கத்திற்கு விரட்டினார். இது தொடர்பான காணொளிகள் சமூக வலைதளங்களில் வைரலாகி வருகிறது.