AUSW vs SAW, Only Test: அதிவேக இரட்டை சதமடித்து மிரட்டிய சதர்லேண்ட்; மீண்டும் தடுமாறும் தென் ஆப்பிரிக்கா!

ஆஸ்திரேலியாவில் சுற்றுப்பயணம் மேற்கொண்டுள்ள தென் ஆப்பிரிக்க மகளிர் அணி தற்போது டெஸ்ட் போட்டியில் விளையாடி வருகிறது. அதன்படி பெர்த்தில் இன்று தொடங்கிய இப்போட்டியில் டாஸ் வென்ற ஆஸ்திரேலிய மகளிர் அணி முதலில் பந்துவீசுவதாக அறிவித்தது. அதன்படி இன்னிங்ஸைத் தொடங்கிய தென் ஆப்பிரிக்க அணி வீராங்கனைகள் எதிரணி பந்துவீச்சுக்கு ஈடுகொடுக்க முடியாமல் அடுத்தடுத்து விக்கெட்டுகளை இழந்தனர். 

அந்த அணியில் சுனே லூஸ் 26, மஸபடா கிளாஸ் 10 ஆகியோரையைத் தவிற மற்ற வீராங்கனைகள் அனைவரும் ஒற்றை இலக்க ரன்களில் விக்கெட்டை இழந்து பெவிலியனுக்கு நடையைக் கட்டினர். இதனால தென் ஆப்பிரிக்க மகளிர் அணி முதல் இன்னிங்ஸில் 31.2 ஓவர்களில் அனைத்து விக்கெட்டுகளையும் இழந்ததுடன், வெறும் 76 ரன்களில் ஆல் அவுட்டானது. ஆஸ்திரேலிய அணி தரப்பில் அபாரமாக பந்துவீசிய டார்சி பிரௌன் 5 விக்கெட்டுகளை வீழ்த்தினார். 

இதைத்தொடர்ந்து முதல் இன்னிங்ஸைத் தொடங்கிய ஆஸ்திரேலிய மகளிர் அணி பெத் மூனி மற்றும் அலிசா ஹீலி ஆகியோரது அரைசதத்தின் மூலம் முதல் நாள் ஆட்டநேர முடிவில் 5 விக்கெட் இழப்பிற்கு 251 ரன்களைச் சேர்த்தது. இதையடுத்து இன்று நடைபெற்ற இரண்டாம் நாள் ஆட்டத்தை அனபெல் சதர்லேண்ட் 54 ரன்களுடனும், ஆஷ்லே கர்ட்னர் ரன்கள் ஏதுமின்றியும் தொடர்ந்தனர். 

இருவரும் இணைந்து சிறப்பான ஆட்டத்தை வெளிப்படுத்தி அணியின் ஸ்கோரை மளமளவென உயர்த்தினர். இதில் அபார ஆட்டத்தை வெளிப்படுத்திய அனபெல் சதர்லேண்ட் சர்வதேச டெஸ்ட் கிரிக்கெட்டில் தனது முதல் சதத்தைப் பதிவுசெய்து அசத்தினார். அதேசமயம் மறுபக்கம் நிதான ஆட்டத்தை வெளிப்படுத்திய ஆஷ்லே கார்ட்னர் தனது அரைசதத்தைப் பூர்த்தி செய்தார். 

பின் 65 ரன்கள் சேர்த்த நிலையில் ஆஷ்லே கார்ட்னர் தனது விக்கெட்டை இழக்க, அடுத்து களமிறங்கிய சோஃபி மோலினக்ஸ் 33 ரன்களிலும் என விக்கெட்டை இழந்து பெவிலியனுக்கு நடையைக் கட்டினர். அதேசமயம் மறுபக்கம் அபார ஆட்டத்தை வெளிப்படுத்திய அனபெல் சதர்லேண்ட் சர்வதேச டெஸ்ட் கிரிக்கெட்டில் தனது முதல் இரட்டை சதத்தைப் பதிவுசெய்து மிரட்டினார். மேலும் மகளிர் டெஸ்ட் கிரிக்கெட்டில் அடிக்கப்பட்ட அதிவேக இரட்டை சதமாகவும் இது அமைந்தது.

பின் 27 பவுண்டரி, 2 சிக்சர்கள் என 210 ரன்கள் எடுத்த நிலையில் அனபெல் சதர்லேண்ட் ஆட்டமிழக்க, அடுத்து வந்த அலானா கிங்கும் 8 ரன்களில் விக்கெட்டை இழந்தார். இதில் ஆட்டமிழக்காமல் இருந்த கிம் கார்த் 49 ரன்களுடன் களத்தில் இருந்தார். இதன்மூலம் ஆஸ்திரேலிய மகளிர் அணி 575 ரன்களைச் சேர்த்து முதல் இன்னிங்ஸை டிக்ளர் செய்தது. தென் ஆப்பிரிக்க தரப்பில் மஸபடா கிளாஸ் மற்றும் சோலே ட்ரையான் ஆகியோர் 3 விக்கெட்டுகளை வீழ்த்தினர்.

இதையடுத்து 499 ரன்கள் பின் தங்கிய நிலையில் இரண்டாவது இன்னிங்ஸைத் தொடர்ந்த தென் ஆப்பிரிக்க மகளிர் அணியில் கேப்டன் லாரா வோல்வார்ட் 8 ரன்களுக்கும், போஷ் ரன்கள் ஏதுமின்றியும், சுனே லூஸ் 5 ரன்களுக்கும் என விக்கெட்டை இழந்தார். இதனால் இரண்டாம் நாள் ஆட்டநேர முடிவில் தென் ஆப்பிரிக்க மகளிர் அணி 3 விக்கெட் இழப்பிற்கு 67 ரன்களை மட்டுமே எடுத்துள்ளது.

தென் ஆப்பிரிக்க அணி தரப்பில் தஸ்மின் பிரிட்ஸ் 18 ரன்களுடனும், டெல்மி டக்கர் 27 ரன்களுடனும் களத்தில் உள்ளன. ஆஸ்திரேலிய அணி தரப்பில் கிம் கார்த் 2 விக்கெட்டுகளைக் கைப்பற்றியுள்ளார். இதையடுத்து 432 ரன்கள் பின் தங்கிய நிலையில் தென் ஆப்பிரிக்க அணி நாளை மூன்றாம் நாள் ஆட்டத்தை தொடரவுள்ளது.