தனக்கு பிடித்த ஒருநாள் இன்னிங்ஸ் இதுதான் - பாபர் அசாம் ஓபன் டாக்!

பாகிஸ்தானில் சுற்றுப்பயணம் செய்து வந்த நியூசிலாந்து அணி 5 போட்டிகளைக் கொண்ட ஒருநாள் மற்றும் டி20 தொடரில் விளையாடியது. இதில் டி20 தொடரில் இரு அணிகளும் தலா 2 வெற்றிகளைப் பெற்று தொடரை சமன்செய்திருந்தது. இதையடுத்து நடைபெற்ற ஒருநாள் தொடரை பாகிஸ்தான் அணி 4-1 என்ற கணக்கில் நியூசிலாந்தை வீழ்த்தி அசத்தியது. 

அதிலும் இந்த  ஒருநாள் தொடரில் அபாரமாக பேட்டிங் ஆடி பாகிஸ்தான் அணி 4-1 என ஒருநாள் தொடரை வெல்ல உதவினார். இந்த தொடரின் கடைசி ஒருநாள் போட்டிதான் அவரது 100ஆவது ஒருநாள் போட்டி. 100ஆவது ஒருநாள் போட்டியில் ஒரு ரன் மட்டுமே அடித்திருந்தாலும், 100 ஒருநாள் போட்டிகளில் 18 சதங்களுடன் 59.17 என்ற சராசரியுடன் 5089 ரன்களை குவித்துள்ளார். இதன்மூலம் முதல் 100 ஒருநாள் போட்டிகளின் முடிவில் அதிக ரன்களை குவித்த வீரர் என்ற சாதனையை பாபர் அசாம் படைத்துள்ளார். 

இந்த பட்டியலில் 2ஆம் இடத்தில் ஹாஷிம் ஆம்லா (4808) மற்றும் 3ஆம் இடத்தில் ஷிகர் தவான்(4309) ஆகிய இருவரும் உள்ளனர். ஒருநாள் கிரிக்கெட்டில் பல்வேறு சாதனைகளை படைத்து புதிய மைல்கற்களை எட்டிவரும் நிலையில், ஒருநாள் கிரிக்கெட்டில் தனக்கு மிகவும் பிடித்த இன்னிங்ஸ் எதுவென்று தெரிவித்துள்ளார் பாபர் அசாம்.

இதுகுறித்து பேசிய பாபர் அசாம், “2019 உலக கோப்பையில் நியூசிலாந்துக்கு எதிராக நான் அடித்த சதம் தான் எனக்கு மிகவும் பிடித்த இன்னிங்ஸ் ஆகும். நியூசிலாந்தை குறைவான ஸ்கோருக்கு சுருட்டிவிட்டோம். ஆனால் அந்த இலக்கை அடிப்பது சவாலாகிவிட்டது. நானும் ஹாரிஸும் சேர்ந்து பார்ட்னர்ஷிப் அமைத்து நன்றாக விளையாடினோம். டெஸ்ட் கிரிக்கெட்டை போல் ஸ்பின்னர்களை ஆடினோம். அதுதான் எனக்கு பிடித்த இன்னிங்ஸ்” என்று தெரிவித்தார்.

பாபர் அசாம் சொன்ன அந்த குறிப்பிட்ட போட்டியில் நியூசிலாந்தை 237 ரன்களுக்கு சுருட்டியது பாகிஸ்தான். 238 ரன்கள் என்ற இலக்கை விரட்டிய பாகிஸ்தான் அணியின் தொடக்க வீரர்கள் ஃபகர் ஜமான் மற்றும் இமாம் உல் ஹக் ஆகிய இருவரும் சொற்ப ரன்களூக்கு ஆட்டமிழந்துவிட்டனர். அதன்பின்னர் பாபர் அசாமும் ஹாரிஸ் சொஹைலும் சிறப்பாக விளையாடி வெற்றியை தேடிக்கொடுத்தனர். இந்த போட்டியில் சதமடித்த பாபர் அசாம் 127 பந்தில் 101 ரன்களை குவித்து கடைசிவரை ஆட்டமிழக்காமல் போட்டியை முடித்து கொடுத்தது குறிப்பிடத்தக்கது.