பிபிஎல் 2024-25: சிட்னி சிக்ஸர்ஸின் தொடர் வெற்றிக்கு முற்றுப்புள்ளி வைத்தது ஹோபர்ட் ஹரிகேன்ஸ்!
பிக் பேஷ் லீக் தொடரில் இன்று நடைபெற்ற 18ஆவது லீக் ஆட்டத்தில் ஹோபர்ட் ஹரிகேன்ஸ் மற்றும் சிட்னி சிக்ஸர்ஸ் அணிகள் பலப்பரீட்சை நடத்தின. இப்போட்டியில் டாஸ் வென்ற சிட்னி சிக்ஸர்ஸ் அணி முதலில் பந்துவீசுவதாக அறிவித்து ஹோபர்ட் ஹரிகேன்ஸ் அணியை பேட்டிங் செய்ய அழைத்தது.
அதன்படி களமிறங்கிய ஹோபர்ட் ஹரிகேன்ஸ் அணிக்கு மேத்யூ வேட் மற்றும் மிட்செல் ஓவன் இணை தொடக்கம் கொடுத்தனர். இதில் மேத்யூ வேட் 15 ரன்களில் விக்கெட்டை இழக்க, அடுத்து களமிறங்கிய ஷாய் ஹோப்பும் 4 ரன்களில் விக்கெட்டை இழந்தார். அதன்பின் ஜோடி சேர்ந்த மிட்செல் ஓவன் - கேப்டன் பென் மெக்டர்மோட் இணை பொறுப்புடன் விளையாடி அணியின் ஸ்கோரை உயர்த்தினர். இதில் மிட்செல் ஓவன் 33 ரன்களில் விக்கெட்டை இழக்க, மறுபக்கம் அதிரடியாக விளையாடிய பென் மெக்டர்மோட் 34 ரன்களுக்கும் என விக்கெட்டை இழந்தனர்.
இறுதியில் நிகில் சௌத்ரி அதிரடியாக விளையாடி 4 பவுண்டரி, 2 சிக்ஸர்கள் என 42 ரன்களைச் சேர்த்து ஆட்டமிழந்தார். இதன்மூலம் ஹோபர்ட் ஹரிகேன்ஸ் அணி 20 ஓவர்கள் முடிவில் 6 விக்கெட்டுகள் இழப்பிற்கு 161 ரன்களைக் குவித்தது. சிட்னி சிக்ஸர்ஸ் அணி தரப்பில் ஜேக்சன் பெர்ட் 4 விக்கெட்டுகளை வீழ்த்தினார். இதனையடுத்து இலக்கை நோக்கி களமிறங்கிய சிட்னி சிக்ஸர்ஸ் அணிக்கு தொடக்கம் சிறப்பானதாக அமையவில்லை. அணியின் டாப் ஆர்டர் வீரர்கள் ஜோஷ் பிலீப், ஜேம்ஸ் வின்ஸ் மற்றும் கர்டிஸ் பேட்டர்சன் ஆகியோர் அடுத்தடுத்து சொற்ப ரன்களில் ஆட்டமிழந்தனர்.
அதன்பின் ஜோடி சேர்ந்த ஹென்றிக்ஸ் மற்றும் ஜோர்டன் சில்க் ஓரளவு தாக்குப்பிடித்து அணியின் ஸ்கோரை உயர்த்தினர். பின் ஹென்றிக்ஸ் 22 ரன்களில் ஆட்டமிழ்க்க, அவரைத் தொடர்ந்து ஜோர்டன் சில்கும் 20 ரன்களில் விக்கெட்டை இழந்தார். பின்னர் களமிறங்கிய ஜேக் எட்வர்ட்ஸும் ஒரு ரன்னுடன் ஆட்டமிழந்தார். இதனால் அந்த அணி 64 ரன்களில் 5 விக்கெட்டுகளை இழந்து தடுமாறியது. அவர்களைத் தொடர்ந்து களமிறங்கிய ஜெய்டன் கெர் 2 ரன்களிலும், பென் துவார்ஷுயிஸ் 9 ரன்களிலும், அகீல் ஹொசின் 10 ரன்களிலும் என விக்கெட்டை இழந்தனர்.
Also Read: Funding To Save Test Cricket
இறுதியில் ஜேக்சன் பெர்ட் 3 ரன்களில் விக்கெட்டை இழந்தார். இதனால் சிட்னி சிக்ஸர்ஸ் அணி 19.3 ஓவர்களில் அனைத்து விக்கெட்டுகளையும் இழந்து 111 ரன்களை மட்டுமே எடுத்த நிலையில் அனைத்து விக்கெட்டுகளையும் இழந்து ஆல் அவுட்டானது. ஹோபர்ட் ஹரிகேன்ஸ் அணி தரப்பில் கிறிஸ் ஜோர்டன் 3 விக்கெட்டுகளையும், பில்லி ஸ்டேன்லேக் 2 விக்கெட்டுகளையும் கைப்பற்றினார். இதன்மூலம் ஹோபர்ட் ஹரிகேன்ஸ் அணி 50 ரன்கள் வித்தியாசத்தில் சிட்னி சிக்ஸர்ஸ் அணியை வீழ்த்தி வெற்றிபெற்றது.