பிபிஎல் 2024-25: ரூதர்ஃபோர்ட் அதிரடியில் சிட்னி தண்டர் த்ரில் வெற்றி!
பிக் பேஷ் லீக் தொடரின் 14ஆவது சீசனானது நாளுக்கு நாள் ரசிகர்களின் எதிர்பார்ப்புகளை அதிகரித்து வருகிறது. இந்நிலையில் இத்தொடரில் இன்று நடைபெற்ற 22ஆவது லீக் ஆட்டத்தில் சிட்னி தண்டர் மற்றும் பெர்த் ஸ்கார்ச்சர்ஸ் அணிகள் பலப்பரீட்சை நடத்தின. பெர்த் மைதானத்தில் நடைபெற்ற இப்போட்டியில் டாஸ் வென்ற சிட்னி தண்டர் அணி முதலில் பந்துவீசுவதாக அறிவித்தது.
அதன்படி களமிறங்கிய பெர்த் ஸ்கார்ச்சர்ஸ் அணிக்கு மேத்யூ ஹர்ஸ்ட் மற்றும் ஃபின் ஆலன் இணை தொடக்கம் கொடுத்தனர். இருவரும் ஆரம்பம் முதலே அதிரடியாக விளையாடி அணியின் ஸ்கோரை உயர்த்தியதுடன், அணிக்கு தேவையான அடித்தளத்தையும் அமைத்துக் கொடுத்தனர். இருவரும் இணைந்து முதல் விக்கெட்டிற்கு 61 ரன்களை சேர்த்த நிலையில் மேத்யூ ஹர்ஸ்ட் 23 ரன்களில் தனது விக்கெட்டை இழந்தார். அவரைத் தொடர்ந்து களமிறங்கிய ஆரோன் ஹார்டியும் 10 ரன்களில் நடையைக் கட்ட, மறுபக்கம் ஃபின் ஆலன் தனது அரைசதத்தைப் பதிவுசெய்து அசத்தினார்.
அதன்பின் 6 பவுண்டரி, 5 சிக்ஸர்கள் என 68 ரன்களைச் சேர்த்த நிலையில் ஃபின் ஆலனும் தனது விக்கெட்டை இழக்க, பின்னர் களமிறங்கிய கேப்டன் ஆஷ்டன் டர்னர் முதல் பந்திலேயெ ஆட்டமிழந்தார். பின்னர் இணைந்த கூப்பர் கன்னொலி மற்றும் நிக் ஹாப்சன் இணை அதிரடியாக விளையாடி அணிக்கு தேவையான ஃபினிஷிங்கை கொடுத்தனர். இதில் கூப்பர் கன்னொலி 43 ரன்களையும், நிக் ஹாப்சன் 21 ரன்களையும் சேர்க்க 20 ஓவர்கள் முடிவில் பெர்த் அணி 4 விக்கெட்டுகள் இழப்பிற்கு 177 ரன்களை எடுத்தது. தண்டர் அணி தரப்பில் கிறிஸ் கிரீன் 3 விக்கெட்டுகளை வீழ்த்தினார்.
இதனையடுத்து சவாலான இலக்கை நோக்கி களமிறங்கிய சிட்னி தண்டர் அணியில் தொடக்க வீரர் பிளேக் ஒரு ரன்னில் ஆட்டமிழந்து ஏமாற்றமளித்தார். அதன்பின் ஜோடி சேர்ந்த கேப்டன் டேவிட் வார்னர் மற்றும் மேத்யூ கில்க்ஸ் இணை பொறுப்புடன் விளையாடி அணியின் ஸ்கோரை உயர்த்தினர். இருவரும் சிறப்பான ஆட்டத்தை வெளிப்படுத்திய நிலையில் இரண்டாவது விக்கெட்டிற்கு 89 ரன்கள் பார்ட்னர்ஷிப் அமைத்தும் அசத்தினர். இதில் இருவரும் அரைசதம் அடிப்பார்கள் என எதிர்பார்க்கப்பட்ட நிலையில் மேத்யூ கில்ஸ் 43 ரன்களில் விக்கெட்டை இழந்தார்.
Also Read: Funding To Save Test Cricket
அவரைத்தொடர்ந்து களமிறங்கிய ஒலிவியர் டேவிஸ் 3 ரன்களில் விக்கெட்டை இழக்க, கேப்டன் டேவிட் வார்னர் 49 ரன்களில் ஆட்டமிழந்து அரைசதம் அடிக்கும் வாய்ப்பை தவறவிட்டார். அதன்பின் கள்மிறங்கிய வீரர்களும் சொற்ப ரன்களுக்கு நடையைக் கட்ட, இறுதிவரை களத்தில் இருந்த ஷெர்ஃபேன் ரூதர்ஃபோர்ட் அதிரடியாக விளையாடி 39 ரன்களைச் சேர்த்து அணிக்கு வெற்றியைத் தேடிக்கொடுத்தார். இதன்முலம் சிட்னி தண்டர் அணி 4 விக்கெட் வித்தியாசத்தில் அடிலெய்ட் ஸ்டிரைக்கர்ஸ் அணியை வீழ்த்தி த்ரில் வெற்றியைப் பதிவுசெய்து அசத்தியுள்ளது.