ஜெயவர்தனே சாதனையை முறியடிக்க காத்திருக்கும் தசுன் ஷனகா!

வங்கதேச அணிக்கு எதிரான மூன்றாவது டி20 போட்டியின் மூலம் இலங்கை வீரர் தசுன் ஷனகா சிறப்பு சாதனை படைக்கும் வாய்ப்பை பெற்றுள்ளார்.

Dasun Shanaka Record: சர்வதேச டி20 கிரிக்கெட்டில் இலங்கை அணிக்காக அதிக ரன்களைக் குவித்த வீரர்கள் பட்டியலில் மஹேலா ஜெயவர்தனேவின் சாதனையை முறியடிக்கும் வாய்ப்பை தசுன் ஷனகா பெற்றுள்ளார். 

இலங்கையில் சுற்றுப்பயணம் செய்து வரும் வங்கதேச அணி தற்சமயம் மூன்று போட்டிகள் கொண்ட டி20 தொடரில் விளையாடி வருகிறது. இதில் நடந்து முடிந்த முதலிரண்டு டி20 போட்டிகளின் முடிவில் இரு அணியும் தலா 1-1 என்ற கணக்கில் தொடரை சமன்செய்துள்ளன. இந்நிலையில் இலங்கை - வங்கதேச அணிகளுக்கு இடையேயான டி20 தொடரின் வெற்றியாளரைத் தீர்மானிக்கும் மூன்றாவது டி20 போட்டி இன்று கொழும்புவில் நடைபெறவுள்ளது.

இப்போட்டியில் வெற்றிபெறும் அணி டி20 தொடரை கைப்பற்றும் என்பதால் இதில் எந்த அணி வெற்றிபெறும் என்ற எதிர்பார்ப்புகள் ரசிகர்கள் மத்தியில் அதிகரித்துள்ளது. இந்நிலையில் இப்போட்டியில் இலங்கை அணியின் நட்சத்திர வீரர் தசுன் ஷனகா சிறப்பு சாதனை படைக்கும் வாய்ப்பைப் பெற்றுள்ளார். அதன்படி இப்போட்டியில் அவர் 18 ரன்களைச் சேர்க்கும் பட்சத்தில் சர்வதேச டி20 கிரிக்கெட்டில் அதிக ரன்களை அடித்த வீரர்கள் பட்டியலில் ஜெயவர்தனேவின் சாதனையை முறியடிப்பார். 

தற்போது மஹேலா ஜெயவர்தனே 55 டி20 போட்டிகளில் 1493 ரன்களைச் சேர்த்து இலங்கை அணிக்காக அதிக ரன்களைக் குவித்த 5ஆவது வீரராகவுள்ளார். அதேசமயம் தசுன் ஷனகா 104 போட்டிகளில் விளையாடி 1476 ரன்களுடன் 6ஆம் இடத்தில் உள்ளார். இந்த பட்டியலில் குசால் பெரேரா 79 போட்டிகளில் 2080 ரன்களைக் குவித்து முதலிடத்திலும், குசால் மெண்டிஸ் 80 போட்டிகளில் 2001 ரன்களுடன் இரண்டாம் இடத்திலும், திலகரத்னே தில்ஷன் 1889 ரன்களுடன் மூன்றாம் இடத்திலும் உள்ளனர். 

சர்வதேச டி20 கிரிக்கெட்டில் அதிக ரன்கள் எடுத்த இலங்கை வீரர்கள்

• குசல் பெரேரா - 79 போட்டிகளில் 2080 ரன்கள்
• குசல் மெண்டிஸ் - 80 போட்டிகளில் 2001 ரன்கள்
• திலகரத்னே தில்ஷன் - 80 போட்டிகளில் 1889 ரன்கள்
• பதும் நிசங்க - 64 போட்டிகளில் 1808 ரன்கள்
• மகேல ஜெயவர்தனே - 55 போட்டிகளில் 1493 ரன்கள்
• தசுன் ஷனகா - 104 போட்டிகளில் 1476 ரன்கள்

இலங்கை டி20 அணி: பதும் நிஷங்கா, குசல் மெண்டிஸ், குசல் பெரேரா, அவிஷ்க ஃபெர்னாண்டோ, சரித் அசலங்கா (கேப்டன்), தசுன் ஷனகா, சாமிக்க கருணாரத்ன, ஜெஃப்ரி வான்டர்சே, மகேஷ் தீக்ஷன, பினுர ஃபெர்னாண்டோ, நுவான் துஷார, கமிந்து மெண்டிஸ், துனித் வெல்லலகே, மதிஷா பதிரன, இஷான் மலிங்க, தினேஷ் சண்டிமல்.