AUS vs PAK, 2nd Test: ஸ்டீவ் வாக்கின் சாதனையை முறியடித்து டேவிட் வார்னர்!

பாகிஸ்தான் அணி மூன்று போட்டிகள் கொண்ட டெஸ்ட் தொடரில் விளையாட ஆஸ்திரேலியா சென்றுள்ளது. இதில் இரு அணிகளுக்கும் இடையேயான முதல் டெஸ்டில் ஆஸ்திரேலிய அணி அபார வெற்றி பெற்ற நிலையில், இரண்டாவது டெஸ்ட் போட்டி பாக்ஸிங் டேவான இன்று மெல்போர்ன் நகரில் நடைபெற்றது.

இப்போட்டியில் டாஸ் வென்ற பாகிஸ்தான் அணி முதலில் பந்துவீச்சை தேர்வு செய்தது. இதையடுத்து முதல் போட்டியில் சதம் அடித்த டேவிட் வார்னர் இரண்டாவது போட்டியில் இரண்டு ரன்கள் எடுத்திருந்தபோது ஷாஹின் ஆஃப்ரிடி பந்துவீச்சில் எளிதான ஒரு கேட்சை கொடுத்தார். ஆனால் அதை ஸ்லிப்பில் நின்ற பாகிஸ்தான் வீரர் அப்துல்லா ஷஃபிக் தவற விட்டார். இது பாகிஸ்தான் ரசிகர்களை ஏமாற்றம் அடைய வைத்தது.

இதனை அடுத்து டேவிட் வார்னர் 83 பந்துகளில் 38 ரன்கள் எடுத்தார். இதன் மூலம் டேவிட் வார்னர் ஒரு வரலாற்று சாதனையை படைத்திருக்கிறார். அதாவது ஆஸ்திரேலிய கிரிக்கெட் வரலாற்றில் சர்வதேச கிரிக்கெட்டில் அதிக ரன்கள் எடுத்த வீரர்கள் பட்டியலில் டேவிட் வார்னர் தற்போது இரண்டாவது இடத்தை பிடித்திருக்கிறார். இதற்கு முன்பு ஸ்டீவ் வாக் அந்த இடத்தில் இருந்த நிலையில் தற்போது டேவிட் வார்னர் முறியடித்து இருக்கிறார்.

இதுவரை 667 இன்னிங்ஸில் விளையாடி 27,368 ரன்களுடன் ரிக்கி பாண்டிங் முதலிடத்திலும், டேவிட் வார்னர் 480 இன்னிங்சில் விளையாடி 18,502 ரன்களுடன் இரண்டாவது இடத்திலும் ஸ்டீவ் வாக் 548 இன்னிங்சிக் 18,496 ரன்கள் அடித்து மூன்றாவது இடத்திலும் உள்ளனர். ஆஸ்திரேலிய ஜாம்பவான் ஆலன் பார்டர் 517 இன்னிங்ஸில் விளையாடி 17,698 ரன்கள் எடுத்து நான்காவது இடத்திலும் முன்னாள் கேப்டன் மைக்கேல் கிளார்க் 449 இன்னிங்ஸில் விளையாடி 17112 ரன்கள் எடுத்து ஐந்தாவது இடத்திலும் உள்ளனர்.