ஐபிஎல் 2024: டெல்லி கேப்பிட்டல்ஸ் vs லக்னோ சூப்பர் ஜெயண்ட்ஸ் - உத்தேச லெவன்!

இந்தியாவில் தொடங்கி விறுவிறுப்பாக நடைபெற்று வந்த ஐபிஎல் தொடரின் 17ஆவது சீசன் இறுதிக்கட்டத்தை எட்டியுள்ளது. இத்தொடரில் இன்று நடைபெறும் முக்கியமான லீக் போட்டி ஒன்றில் டெல்லி கேப்பிட்டல்ஸ் மற்றும் லக்னோ சூப்பர் ஜெயண்ட்ஸ் அணிகள் பலப்பரீட்சை நடத்தவுள்ளன. நடப்பு ஐபிஎல் தொடருக்கான பிளே ஆஃப் சுற்றுகு முன்னேறுவதற்கு இரு அணிகளுக்கும் இந்த வெற்றி மிகவும் முக்கியம் என்பதால் இப்போட்டியின் மீதாதன எதிர்பார்ப்புகளும் அதிகரித்துள்ளன. இந்நிலையில் இவ்விரு அணிகளின் கணிக்கப்பட்ட பிளேயிங் லெவன் குறித்து இப்பதிவில் பார்ப்போம்.

டெல்லி கேப்பிட்டல்ஸ்

ரிஷப் பந்த் தலைமையிலான டெல்லி கேப்பிட்டல்ஸ் அணி நடப்பு ஐபிஎல் தொடரில் 13 போட்டிகளில் விளையாடி 6 வெற்றி, 7 தோல்விகளுடன் 12 புள்ளிகள் பெற்று பட்டியலில் 6ஆவது இடத்தில் உள்ளது. மேலும் டெல்லி கேப்பிட்டல்ஸ் அணிக்கு இன்றைய போட்டி இந்த சீசனில் கடைசி லீக் ஆட்டமாகும். இன்றைய ஆட்டத்தில் டெல்லி அணிவெற்றி பெற்றாலும் பிளே ஆஃப் சுற்றுக்கு முன்னேறுவது என்பது கடினமே. இருப்பினும் அந்த அணி வெற்றிக்காக கடுமையாக போராடும் என்ற எதிர்பார்ப்புகள் அதிகரித்துள்ளன. 

அணியின் பேட்டிங்கில் ஜேக் ஃபிரேசர் மெக்குர்க், ஷாய் ஹோப், ரிஷப் பந்த், டிரிஸ்டன் ஸ்டப்ஸ் ஆகியோருடன் தற்சமயம் அக்ஸர் படேலும் சிறப்பான ஆட்டத்தை வெளிப்படுத்தி வருவது அணிக்கு சாதமான ஒன்றாக பார்க்கப்படுகிறது. அதேசமயம் பந்துவீச்சில் இஷாந்த் சர்மா, கலீல் அஹ்மத், ரஷிக் தார் ஆகியோருடன் குல்தீப் யாதவ் மற்றும் அக்ஸர் படேல் ஆகியோரும் இருப்பது அணிக்கு பெரும் பலமாக பார்க்கப்படுகிறது. 

டெல்லி கேப்பிட்டல்ஸ் உத்தேச லெவன்: ஜேக் ஃபிரேசர்-மெக்குர்க், அபிஷேக் போரல், ஷாய் ஹோப், ரிஷப் பந்த் (கேப்டன்), டிரிஸ்டன் ஸ்டப்ஸ், அக்சர் படேல்,ரசிக் சலாம், குல்தீப் யாதவ், முகேஷ் குமார், இஷாந்த் சர்மா, கலீல் அகமது.

லக்னோ சூப்பர் ஜெயண்ட்ஸ்

கேஎல் ராகுல் தலைமையிலான லக்னோ சூப்பர் ஜெயண்ட்ஸ் அணி 12 ஆட்டங்களில் விளையாடி 6 வெற்றி, 6 தோல்விகளுடன் 12 புள்ளிகள் பெற்று புள்ளிப்பட்டியலின் 7ஆவது இடத்தில் உள்ளது. பிளே ஆஃப் சுற்றுக்கு முன்னேற வேண்டுமானால் எஞ்சியுள்ள இரு ஆட்டங்களிலும் வெற்றிபெற வேண்டும் என்ற நெருக்கடியுடன் உள்ளது லக்னோ சூப்பர் ஜெயண்ட்ஸ் அணி. இந்த இரு ஆட்டங்களிலும் வெற்றி பெற்றால் மட்டுமே லக்னோ அணியால் பிளே ஆஃப் சுற்றுக்கு முன்னேற முடியும் என்பதால் அந்த அணியுன் தீவிரம் காட்டும் என எதிர்பார்க்கப்படுகிறது.

மேலும் சன்ரைசர்ஸ் அணிக்கு எதிரான படுதோல்விக்கு பிறகு அணியின் கேப்டன் கேஎல் ராகுல் சக வீரர்களுடன் இணைந்து டெல்லி பயணிக்கவில்லை என்ற தகவல்களும் வெளியாகியுள்ளன. இதனால் இன்றைய போட்டியில் அவர் விளையாடுவாரா என்ற சந்தேகம் எழுந்துள்ளது. மேற்கொண்டு அணியின் பேட்டிங் ஆர்டரும் தொடர்ந்து சொதப்பி வருவது அணிக்கு பெரும் பின்னடைவாக பார்க்கப்படுகிறது. அதேசமயம் அணியின் பந்துவீச்சை பொறுத்தவரையில் கடந்த போட்டியில் ரன்களை வாரி வழங்கியது அணிக்கு பெருன் பின்னடைவை தந்துள்ள நிலையில், இன்றைய போட்டியில் எவ்வாறு செயல்படுவார்கள் என்ற எதிர்பார்ப்பு அதிகரித்துள்ளது.

லக்னோ சூப்பர் ஜெயண்ட்ஸ் உத்தேச லெவன்: கேஎல் ராகுல் (கேப்டன்), குயின்டன் டி காக், மார்கஸ் ஸ்டோய்னிஸ், தீபக் ஹூடா, நிக்கோலஸ் பூரன், குர்னால் பாண்டியா, ஆயுஷ் பதோனி, யாஷ் தாக்கூர், ரவி பிஷ்னோய், நவீன் உல் ஹக், மொஹ்சின் கான்.