ரவி சாஸ்திரி சகிப்புதன்மையற்றவர் - தினேஷ் கார்த்திக்!

இந்திய அணிக்கு 2000 முதல் 2005ஆம் ஆண்டுவரை பயிற்சியாளராக இருந்த நியூசிலாந்து அணி முன்னாள் வீரர் ஜான் ரைட், இந்திய அணியை அடுத்த கட்டத்திற்கு கூட்டிச் சென்றார். இவரது பயிற்சியின்கீழ்தான் இந்திய அணி தனது சொந்த மண்ணில் ஆஸ்திரேலியாவை 2-1 என்ற கணக்கில் வென்று வரலாறு படைத்தது. 

இதனைத் தொடர்ந்து 2003-2004ஆம் ஆண்டில் ஆஸ்திரேலிய மண்ணில் நடைபெற்ற 4 போட்டிகள் கொண்ட டெஸ்ட் தொடலை இந்தியா 1-1 என்ற கணக்கில் சமன் செய்து அசத்தியது. மேலும் 2003ஆம் ஆண்டில் ஒருநாள் உலகக் கோப்பையில் இறுதிப் போட்டி வரை முன்னேறியது.

இவருக்குப் பிறகு கேரி கிறிஸ்டன் பயிற்சியாளராக இந்திய அணியை மேலும் முன்னேற்றி காட்டினார். குறிப்பாக 2011ஆம் ஆண்டில் உலகக் கோப்பையை பெற்றுக்கொடுத்து அசத்தினார். அடுத்து ரவி சாஸ்திரி வந்தார். இவரும், கோலியும் இணைந்து இந்திய அணியை ஆளுமைமிக்க அணியாக அதாவது ஆக்ரோஷமாக செயல்படுவதில், ஆஸ்திரேலிய அணிக்கே டஃப் கொடுக்க வைத்தார்கள்.

மேலும் 2017 முதல் டெஸ்டில் 5 ஆண்டுகள் வரை நம்பர் 1 இடத்தை தக்கவைத்தனர். ரவி சாஸ்திரியின் பயிற்சியின்கீழ் இந்தியா, இரண்டுமுறை ஆஸ்திரேலியாவில் டெஸ்ட் தொடரைக் கைப்பற்றி வரலாறு படைத்தது. வீரர்களுக்கு ஊக்கமளிக்கக் கூடிய வகையில் பேசி, அவர்களை தைரியமாக விளையாட வைத்தார். 

குறிப்பாக 2021ஆம் ஆண்டில் ஆஸ்திரேலியாவில் இந்தியா முதல் டெஸ்டில் 36 ரன்களுக்கு சுருண்ட பிறகு, அடுத்தடுத்து வெற்றிகளை பெற்று தொடரைக் கைப்பற்ற ரவி சாஸ்திரியின் உரைதான் ஊக்கமாக இருந்தது என வீரர்கள் தெரிவித்திருந்தார்கள்.

இப்படிப்பட்ட வெற்றிகரமான கோச், உலகக் கோப்பையை பெற்றுக்கொடுக்காமல் சென்றது வருத்தம்தான். இருப்பினும், பல வெற்றிகளை பெற்றுக்கொடுத்திருக்கிறார்.

இந்நிலையில் 2019ஆம் ஆண்டு உலகக் கோப்பை தொடரின்போது ரவி சாஸ்திரி பயிற்சியின்கீழ் விளையாடிய தினேஷ் கார்த்திக், ரவி சாஸ்திரி எந்தெந்த விஷயத்தில் கோபப்படுவார் என்பது குறித்துப் பேசியுள்ளார். 

அதில், “பந்துகளை சரியாக எதிர்கொண்டு விளையாடாமல், ஆட்டமிழந்தால் அது ரவி சாஸ்திரிக்கு சுத்தமாக பிடிக்காது. மேலும், வலைப்பயிற்சியின்போது பயிற்சி செய்யாத ஷாட்களை, போட்டியின்போது அடிக்கடி விளையாடினால், அதுவும் அவருக்கு சுத்தமாக பிடிக்காது. வீரர்களை எப்படி வேலை வாங்க வேண்டும் என்பது அவருக்கு நன்றாக தெரியும். வீரர்களின் முழு உழைப்பையும் வாங்க நினைப்பார்” என்று தெரிவித்தார்.