வெஸ்ட் இண்டீஸுக்கு எதிரான மூன்றாவது மற்றும் கடைசி டி20 போட்டியில் இங்கிலந்து அணி 37 ரன்கள் வித்தியாசத்தில் வெற்றிபெற்றதுடன், 3-0 என்ற கணக்கில் டி20 தொடரையும் முழுமையாக கைப்பற்றி அசத்தியுள்ளது.
இங்கிலாந்து - வெஸ்ட் இண்டீஸ் அணிகளுக்கு இடையேயான மூன்றாவது டி20 போட்டி நேற்றைய தினம் சௌதாம்ப்டனில் நடைபெற்றது. இதில் டாஸை இழந்து முதலில் பேட்டிங் செய்ய களமிறங்கிய இங்கிலாந்து அணிக்கு பென் டக்கெட் மற்றும் ஜேமி ஸ்மித் இணை அதிரடியான தொடக்கத்தைக் கொடுத்து அணிக்கு தேவையான அடித்தளத்தையும் அமைத்துக் கொடுத்தனர். இதில் இருவரும் தங்களுடைய அரைசதங்களைப் பூர்த்தி செய்ததுடன், முதல் விக்கெட்டிற்கு பார்ட்னர்ஷிப் முறையில் 120 ரன்கையும் பார்ட்னர்ஷிப் அமைத்தனர். பின் 4 பவுண்டரி, 5 சிக்ஸர்களுடன் 60 ரன்களைச் சேர்த்த நிலையில் ஸ்மித் ஆட்டமிழந்தார்.
அவரைத்தொடர்ந்து களமிறங்கிய ஜோஸ் பட்லரும் 22 ரன்களில் விக்கெட்டை இழக்க, சதமடிப்பார் என எதிர்பார்க்கப்பட்ட பென் டக்கெட்டும் 10 பவுண்டரி, 2 சிக்ஸர்களுடன் 84 ரன்களுக்கு ஆட்டமிழந்தனார். இதையடுத்து ஜோடி சேர்ந்த கேப்டன் ஹாரி புரூக் 2 பவுண்டரி, 2 சிக்ஸர்களுடன் 35 ரன்களையும், ஜேக்கப் பெத்தெல் ஒரு பவுண்டரி, 4 சிக்ஸர்கள் என 36 ரன்களையும் சேர்க்க, இங்கிலாந்து அணி 20 ஓவர்கள் முடிவில் 3 விக்கெட்டுகளை மட்டும் இழந்து 248 ரன்களைக் குவித்தது. வெஸ்ட் இண்டீஸ் அணி தரப்பில் அகீல் ஹொசைன், குடகேஷ் மோட்டி, ரூதஃபோர்ட் தலா ஒரு விக்கெட்டை வீழ்த்தினார்.
அதன்பின் இமாலய இலக்கை நோக்கி களமிறங்கிய வெஸ்ட் இண்டீஸ் அணியில் தொடக்க வீரர்களாக களமிறங்கிய ஜான்சன் சார்லஸ் மற்றும் எவின் லூயிஸ் ஆகியோர் தலா 9 ரன்களிலும், அதிரடியாக விளையாடிய ஷிம்ரான் ஹெட்மையர் ஒரு பவுண்டரி, 3 சிக்ஸர்களுடன் 26 ரன்களிலும், ஷெர்ஃபேன் ரூதர்ஃபோர்ட் ஒரு ரன்னிலும் என விக்கெட்டுகளை இழந்து ஏமாற்றமளித்தனர். பின்னர் இணைந்த கேப்டன் ஷாய் ஹோப் மற்றும் ரோவ்மன் பாவெல் இணை பொறுப்புடன் விளையாடி விக்கெட் இழப்பை தடுத்து நிறுத்தியதுடன், தேவைப்படும் நேரங்களில் பவுண்டரிகளையும் விளாசி ஸ்கோரை உயர்த்தினர்.
இதில் அரைசதத்தை நெருங்கிய ஷாய் ஹோப் 3 பவுண்டரி, 3 சிக்ஸர்கள் என 45 ரன்னில் ஆட்டமிழக்க, அடுத்து களமிறங்கிய வீரர்களும் சொற்ப ரன்களுக்கு நடையைக் கட்டினர். ஒருபக்கம் விக்கெட்டுகள் சரிந்த நிலையிலும், மறுபக்கம் அதிரடியாக விளையாடி அரைசதம் கடந்த ரோவ்மன் பாவெல் இறுதிவரை போராடி 9 பவுண்டரி, 4 சிக்ஸர்கள் என 79 ரன்களைச் சேர்த்திருந்தார். இருப்பினும் வெஸ்ட் இண்டீஸ் அணி 20 ஓவர்கள் முடிவில் 8 விக்கெட்டுகளை இழந்து 211 ரன்களை மட்டுமே எடுத்தது. இங்கிலாந்து தரப்பில் லுக் வுட் 3 விக்கெட்டுகளையும், ஆதில் ரஷித் 2 விக்கெட்டுகளையும் கைப்பற்றினர்.
Also Read: LIVE Cricket Score
இதன்மூலம் இங்கிலாந்து அணி 37 ரன்கள் வித்தியாசத்தில் வெஸ்ட் இண்டீஸ் அணியை வீழ்த்தி வெற்றிபெற்றதுடன், மூன்று போட்டிகள் கொண்ட டி20 தொடரையும் 3-0 என்ற கணக்கில் கைப்பற்றி வெஸ்ட் இண்டீஸை ஒயிட்வாஷ் செய்தது. இப்போட்டியில் சிறப்பான ஆட்டத்தை வெளிப்படுத்திய பென் டக்கெட் ஆட்டநாயகன் விருதையும், தொடர் முழுவதும் அணியின் வெற்றிக்கு உறுதுணையாக இருந்த ஜோஸ் பட்லர் தொடர்நாயகன் விருதையும் வென்றது குறிப்பிடத்தக்கது.