தோனியைஒ போன்று ஹர்திக் போட்டியை முடித்துள்ளார் - ராபின் உத்தப்பா!

ஒட்டுமொத்த கிரிக்கெட் உலகமும் வெறித்தனமாக காத்திருந்த இந்தியா பாகிஸ்தான் இடையேயான போட்டி துபாய் சர்வதேச கிரிக்கெட் மைதானத்தில் நடைபெற்றது. இதில் இந்திய அணி 5 விக்கெட் வித்தியாசத்தில் பாகிஸ்தானை வீழ்த்தி அசத்தல் வெற்றியைப் பதிவுசெய்தது.

இந்நிலையில், இப்போட்டியில் இந்திய அணியின் ஹர்திக் பாண்டியா வெற்றி இலக்கை எட்ட, சிக்சர் அடித்து அணிக்கு வெற்றியைத் தேடிக்கொடுத்தார். பாகிஸ்தான் அணிக்கு எதிரான இந்த வரலாற்று வெற்றிக்கு காரணமாக திகழ்ந்த ஹர்திக் பாண்டியா, புவனேஷ்வர் குமார், ஜடேஜா, கோலி போன்ற வீரர்களை முன்னாள் வீரர்கள் மற்றும் கிரிக்கெட் வல்லுநர்கள் பலர் வெகுவாக பாராட்டி வருகின்றனர். 

அதே போல் என்னதான் இந்த போட்டியில் இந்திய அணி வெற்றி பெற்றிருந்தாலும், இந்த போட்டியில் இந்திய அணி செய்த சில தவறுகளையும் முன்னாள் வீரர்கள் பலர் சுட்டிக்காட்டி பேசி வருகின்றனர்.

இந்தநிலையில், இந்தியா பாகிஸ்தான் இடையேயான போட்டி குறித்து பல்வேறு விசயங்கள் பேசி வரும் முன்னாள் இந்திய வீரரான ராபின் உத்தப்பா, தோனியை போன்று போட்டியை முடிக்க வேண்டும் என விரும்பிய ஹர்திக் பாண்டியா சிக்ஸருடன் பாகிஸ்தான் அணிக்கு எதிரான போட்டியை முடித்து கொடுத்திருப்பார் என தெரிவித்துள்ளார்.

இது குறித்து பேசிய உத்தப்பா பேசுகையில், “தோனியை போன்று போட்டியை முடித்து கொடுக்க வேண்டும் என்ற நோக்கத்தில் தான் ஹர்திக் பாண்டியா சிக்ஸருடன் போட்டியை முடித்து கொடுத்திருப்பார். ஹர்திக் பாண்டியா, தோனியை மிகவும் நேசிக்கக்கூடிய ஒருவர். தோனியிடம் இருந்து தான் ஹர்திக் பாண்டியா அதிகமான விசயங்களை கற்றுள்ளார். 

எனவே எந்த விசயமாக இருந்தாலும் அதை தோனியே போன்றே செய்ய வேண்டும் என ஹர்திக் பாண்டியா விரும்புவார். தோனிக்கும், ஹர்திக் பாண்டியாவிற்கும் இடையேயான நட்பு அனைவரும் அறிந்ததே. நிச்சயமாக தோனிக்காகவே ஹர்திக் பாண்டியா சிக்ஸர் அடித்து போட்டியை முடித்திருப்பார்” என்று தெரிவித்தார்.