இந்திய அணி சமீபத்தில் தென் ஆப்பிரிக்காவில் சுற்றுப்பயணம் செய்து 4 போட்டிகள் கொண்ட டி20 தொடரில் விளையாடியது. இதில் அபாரமான ஆட்டத்தை வெளிப்படுத்திய இந்திய அணி 3-1 என்ற கணக்கில் தென் ஆப்பிரிக்க அணியை அதன் சொந்த மண்ணிலேயே வீழ்த்தி தொடரை வென்று அசத்தியது.
இந்நிலையில் சர்வதேச கிரிக்கெட் கவுன்சில் டி20 வீரர்களுக்கான தரவரிசைப் பட்டியலை இன்று வெளியிட்டுள்ளது. இதில் தென் ஆப்பிரிக்க தொடரில் சிறப்பான ஆட்டத்தை வெளிப்படுத்திய இந்திய அணியின் நட்சத்திர வீரர் ஹர்திக் பாண்டியா, டி20 ஆல் ரவுண்டர்களுக்கான தரவரிசைப் பட்டியலில் மீண்டும் முதலிடத்திற்கு முன்னேறி அசத்தியுள்ளார். முன்னதாக 4ஆம் இடத்தில் இருந்த ஹர்திக் பாண்டியா இரண்டு இடங்கள் முன்னேறி முதலிடத்தைப் பிடித்துளார்.
அதேசமயம் இந்த பட்டியலில் நேபாள் அணி வீரர் திபெந்திர சிங் ஐரீ இரண்டாம் இடத்தில் நீடிக்கும் நிலையில், முதலிடத்தில் இருந்து லியாம் லிவிங்ஸ்டோன் இரண்டு இடங்கள் பின் தங்கி 3ஆம் இடத்திற்கு தள்ளப்பட்டுள்ளார். இந்த பட்டியலில் இலங்கை வீரர் வநிந்து ஹரங்கா 5ஆம் இடத்திற்கும், தென் ஆப்பிரிக்க அணியின் ஐடன் மார்க்ரம் 10ஆம் இடத்திற்கும் முன்னேறியுள்ள நிலையில், மர்கோ ஜான்சென் 65 இடங்கள் முன்னேறி 14ஆம் இடத்தைப் பிடித்துள்ளார்.
இதுதவிர பேட்டர்களுக்கான தரவரிசையில் ஆஸ்திரேலியாவின் டிராவிஸ் ஹெட், இங்கிலாந்தின் பில் சால்ட் ஆகியோர் முதலிரண்டு இடங்களில் நீடித்து வருகின்றனர். அதேசமயம் தென் ஆப்பிரிக்க தொடரில் அடுத்தடுத்து இரண்டு சதங்களை விளாசிய இந்திய வீர்ர் திலக் வர்மா 69 இடங்கள் முன்னேறியதுடன் ஐசிசி டி20 பேட்டர்களுக்கான தரவரிசைப் பட்டியலில் 3ஆம் இடத்திற்கு முன்னேறி அசத்தியுள்ளார்.
அதேசமயம் இந்திய அணி கேப்டன் சூர்யகுமார் யாதவ் ஒரு இடம் பின் தங்கி 04ஆம் இடத்திற்கும், யஷஸ்வி ஜெய்ஸ்வால் 8ஆம் இடத்திற்கும், ருதுராஜ் கெய்க்வாட் 15ஆம் இடத்திற்கும் தள்ளப்பட்டுள்ளனர். மேற்கொண்டு தென் ஆப்பிரிக்க தொடரில் இரண்டு சதங்களை அடித்த இந்திய அணியின் மற்றொரு நட்சத்திர வீரர் சஞ்சு சாம்சன் 17 இடங்கள் முன்னேறி 21ஆம் இடத்தைப் பிடித்துள்ளார். மேலும் இந்த பட்டியலில் வெஸ்ட் இண்டீஸின் ஷாய் ஹோப் 16 இடங்கள் முன்னேறி 20ஆம் இடத்தைப் பிடித்துள்ளார்.
Also Read: Funding To Save Test Cricket
இசிசி டி20 பந்துவீச்சாளர்களுக்கான தரவரிசைப் பட்டியலில் இங்கிலாந்து வீரர் ஆதில் ரஷித் முதலிடத்திலும், இலங்கையின் வநிந்து ஹசரங்கா இரண்டாம் இடத்திலும் நீடிக்கும் நிலையில், ஆஸ்திரேலிய அணியின் ஆடம் ஸாம்பா 5 இடங்கள் முன்னேறி 3ஆம் இடத்தைப் பிடித்துள்ளார். இந்த பட்டியலில் இந்திய அணியின் ரவி பிஷ்னோய் ஒரு இடம் பின்தங்கி 8ஆம் இடத்திற்கு தள்ளப்பட்டுள்ள நிலையில், அர்ஷ்தீப் சிங் 3 இடங்கள் முன்னேறி 09ஆம் இடத்திற்கு முன்னேறியுள்ளார்.