ஐஎல்டி20 2025: டாம் அல்ஸாப் அதிரடியில் வாரியர்ஸை வீழ்த்தியது கல்ஃப் ஜெயண்ட்ஸ்!

ஐக்கிய அரபு அமீரகத்தில் நடைபெற்று வரும் ஐஎல்டி20 லீக் தொடரின் மூன்றாவது சீசன் விறுவிறுப்பான கட்டத்தை எட்டியுள்ளது. இத்தொடரில் நேற்று நடைபெற்ற 21ஆவது லீக் போட்டியில் ஷார்ஜா வாரியர்ஸ் மற்றும் கல்ஃப் ஜெயண்ட்ஸ் அணிகள் பலப்பரீட்சை நடத்தின. ஷார்ஜாவில் உள்ள ஷார்ஜா கிரிக்கெட் மைதானத்தில் நடைபெற்ற இப்போட்டியில் டாஸ் வென்ற ஜெயண்ட்ஸ் அணி முதலில் பந்துவீசுவதாக அறிவித்தது.

அதன்படி களமிறங்கிய ஷார்ஜா வாரியர்ஸ் அணிக்கு டாம் கொஹ்லர் காட்மோர் - ஜான்சன் சார்லஸ் இணை சிறப்பான தொடக்கத்தைக் கொடுத்து அணிக்கு தேவையான அடித்தளத்தை அமைத்துக் கொடுத்தனர். இருவரும் இணைந்து முதல் விக்கெட்டிற்கு 57 ரன்கள் பார்ட்னர்ஷிப் அமைத்த நிலையில் ஜான்சன் சார்லஸ் 30 ரன்களில் விக்கெட்டை இழந்தார். அவரைத்தொடர்ந்து மற்றொரு தொடக்க வீரரான டாம் கொஹ்லர் காட்மோரும் 29 ரன்களில் ஆட்டமிழக்க, அடுத்து களமிறங்கிட தசுன் ஷனகா மற்றும் டிம் செய்ஃபெர்ட் ஆகியோரும் சொற்ப ரன்களுக்கு விக்கெட்டுகளை இழந்தனர். 

இதற்கிடையில் அதிரடியாக விளையாடிய ஜேசன் ராயும் 44 ரன்களுக்கு விக்கெட்டை இழக்க, இறுதியில் ஆஷடன் அகர் அதிரடியான ஆட்டத்தை வெளிப்படுத்தியதுடன் 23 ரன்களைச் சேர்த்து அணிக்கு தேவையான ஃபினிஷிங்கைக் கொடுத்தார். இதன்மூலம் ஷார்ஜா வாரியர்ஸ் அணி 20 ஓவர்கள் முடிவில் 6 விக்கெட் இழப்பிற்கு 171 ரன்களை சேர்த்தது. ஜெயண்ட்ஸ் அணி தரப்பில் சிறப்பான பந்துவீச்சை வெளிப்படுத்திய பிளெஸிங் முசரபானி 3 விக்கெட்டுகளை கைப்பற்றி அசத்தினார்.

இதனையடுத்து இலக்கை நோக்கி விலையாடிய கல்ஃப் ஜெயண்ட்ஸ் அணிக்கு கேப்டன் ஜேம்ஸ் வின்ஸ் - டாம் அல்ஸாப் இணை அதிரடியான தொடக்கத்தைக் கொடுத்ததுடன், அணிக்கு தேவையான அடித்தளத்தை அமைத்துக் கொடுத்தனர். இதில் ஜேம்ஸ் வின்ஸ் 24 ரன்களில் விக்கெட்டை இழக்க, அடுத்து களமிறங்கிய ஜோர்டன் காக்ஸ் 8 ரன்களுக்கும், ஜெர்ஹார்ட் எராஸ்மஸ் 10 ரன்களுக்கும், ஷிம்ரான் ஹெட்மையர் 12 ரன்களுக்கும் என விக்கெட்டுகளை இழந்து பெவிலியன் திரும்பினார். அதேசமயம் அபார ஆட்டத்தை வெளிப்படுத்திய டாம் அஸ்லப் தனது அரைசதத்தைப் பதிவுசெய்து அசத்தினார். 

Also Read: Funding To Save Test Cricket

இப்போட்டியில் இறுதிவரை ஆட்டமிழக்காமல் இருந்த டாம் அஸ்லாப் 7 பவுண்டரி, 2 சிக்ஸர்கள் என 85 ரன்களையும், அவருக்கு துணையாக விளையாடிய டாம் கரண் 26 ரன்களையும் சேர்த்து அணிக்கு வெற்றியைத் தேடிக்கொடுத்தனர். இதன்மூலம் கல்ஃப் ஜெயண்ட்ஸ் அணி 19.3 ஓவர்களில் இலக்கை எட்டியதுடன் 6 விக்கெட்டுகள் வித்தியாசத்தில் ஷார்ஜா வாரியர்ஸ் அணியை வீழ்த்தி வெற்றிபெற்று அசத்தியுள்ளது. இப்போட்டியில் இறுதிவரை ஆட்டமிழக்காமல் அணிக்கு வெற்றியைத் தேடிக்கொடுத்த டாம் அஸ்லாப் ஆட்டநாயகன் விருதை வென்றார்.