ஐஎல்டி20 2025: நைட் ரைடர்ஸை பந்தாடியது கல்ஃப் ஜெயண்ட்ஸ்!
ஐக்கிய அரபு அமீரகத்தில் நடைபெற்று வரும் ஐஎல்டி20 லீக் தொடரின் மூன்றாவது சீசன் விறுவிறுப்பான கட்டத்தை எட்டியுள்ளது. இதில் நேற்று நடைபெற்ற 27ஆவது லீக் போட்டியில் அபிதாபி நைட் ரைடர்ஸ் மற்றும் கல்ஃப் ஜெயண்ட்ஸ் அணிகள் பலப்பரீட்சை நடத்தின. அபுதாபியில் உள்ள ஷேக் சயீத் கிரிக்கெட் மைதானத்தில் நடைபெற்ற இப்போட்டியில் டாஸ் வென்ற கல்ஃப் ஜெயண்ட்ஸ் அணி முதலில் பந்துவீசுவதாக அறிவித்தது.
அதன்படி களமிறங்கிய நைட் ரைடர்ஸ் அணிக்கு எதிர்பார்த்த தொடக்கம் கிடைக்கவில்லை. அணியின் டாப் ஆர்டர் வீரர்கள் கைல் மேயர்ஸ், ஆண்ட்ரிஸ் கஸ் ஆகியோர் தலா ஒரு ரன்னிலும், ஜோ கிளார்க் 13 ரன்களிலும், ரோஸ்டன் சேஸ் 15 ரன்களிலும் என அடுத்தடுத்து விக்கெட்டுகளை இழந்து பெவிலியன் திரும்பினர். இதனால் அந்த அணி 54 ரன்களுக்கே 4 ரன்களை இழந்து தடுமாறிய வேளையில் களமிறங்கிய டேவிட் வில்லி ஒருபக்கம் சிறப்பான ஆட்டத்தை வெளிப்படுத்தினார். அதேசமய மற்றொரு முனையில் களமிறங்கிய ஆண்ட்ரே ரஸல், ஜேசன் ஹோல்டர் ஆகியோர் சொற்ப ரன்களுக்கு நடையைக் கட்டினர்.
இதையடுத்து இப்போட்டியில் அரைசதம் அடிப்பார் என எதிர்பார்க்கப்பட்ட டேவிட் வில்லி ஒரு பவுண்டரி, 4 சிக்ஸர்கள் என 41 ரன்களில் விக்கெட்டை இழந்தார். இறுதியில் அலிஷான் ஷராஃபு 21 ரன்களையும், கேப்டன் சுனில் நரைன் 12 ரன்களையும் சேர்த்து அணிக்கு ஃபினிஷிங்கை வழங்கினர். இதன்மூலம் அபுதாபி நைட் ரைடர்ஸ் அணியானது 20 ஓவர்கள் முடிவில் 8 விக்கெட்டுகள் இழப்பிற்கு 123 ரன்களை மட்டுமே சேர்த்தது. கல்ஃப் ஜெயண்ட்ஸ் தரப்பில் மார்க் அதிர் மற்றும் கிறிஸ் ஜொர்டன் தலா 2 விக்கெட்டுகளை கைப்பற்றி அசத்தினர்.
அதன்பின் இலக்கை நோக்கி விளையாடிய ஜெயண்ட்ஸ் அணியில் கேப்டன் ஜேம்ஸ் வின்ஸ் 7 ரன்னிலும், ஜோர்டன் காக்ஸ் ரன்கள் ஏதுமின்றியும் ஆட்டமிழந்து ஏமாற்றமளித்தனர். பின்னர் இணைந்த எராஸ்மஸ் - டாம் கரண் இணை அதிரடியாக விளையாடி அணியின் ஸ்கோரை உயர்த்தினர். தொடர்ந்து அதிரடியாக விளையாடிய இருவரும் மூன்றாவது விக்கெட்டிற்கு 70 ரன்களை பார்ட்னர்ஷிப் முறையில் சேர்த்தனர். அதன்பின் இப்போட்டியில் அரைசதம் அடிப்பார் என எதிர்பார்க்கப்பட்டா எராஸ்மஸ் 47 ரன்களை எடுத்திருந்த கையோடு விக்கெட்டை இழந்தார்.
Also Read: Funding To Save Test Cricket
அதேசமயம் மறுபக்கம் இறுதிவரை ஆட்டமிழக்காமல் இருந்த டாம் கரண் 38 ரன்களையும், ஷிம்ரான் ஹெட்மையர் 20 ரன்களையும் சேர்த்து அணிக்கு வெற்றியைத் தேடிக்கொடுத்தனர். இதன்மூலம் கல்ஃப் ஜெயண்ட்ஸ் அணி 17.5 ஓவர்களில் இலக்கை எட்டியதுடன் 7 விக்கெட் வித்தியாசத்தில் அபுதாபி நைட் ரைடர்ஸ் அணியை வீழ்த்தி வெற்றிபெற்றது. இப்போட்டியில் சிறப்பான ஆட்டத்தை வெளிப்படுத்திய டேனில் வொரல் ஆட்டநாயகன் விருதை வென்றார்.