வெஸ்ட் இண்டீஸ் மற்றும் அமெரிக்காவில் வரும் ஜூன் மாதம் நடைபெற உள்ள 2024 டி20 உலகக் கோப்பைக்கு தயாராவதற்காக இந்திய கிரிக்கெட் அணி தங்களுடைய சொந்த மண்ணில் ஆஃப்கானிஸ்தானுக்கு எதிராக 3 போட்டிகள் கொண்ட டி20 தொடரில் விளையாட உள்ளது. இத்தொடரில் இந்தியாவுக்கு சவாலை கொடுக்கும் அளவுக்கு 2023 உலகக் கோப்பையில் இங்கிலாந்து, பாகிஸ்தான் போன்ற டாப் அணிகளை தோற்கடித்த ஆஃப்கானிஸ்தான் தற்போது நல்ல திறமையுடைய அணியாக வளர்ந்துள்ளது.
இருப்பினும் ரோஹித் சர்மா தலைமையில் விராட் கோலி, சஞ்சு சாம்சன், ரிங்கு சிங் உள்ளிட்ட அனுபவம் கலந்த இளம் வீரர்களுடன் இத்தொடரில் களமிறங்கும் இந்தியா சொந்த மண்ணில் ஆஃப்கானிஸ்தானை வீழ்த்தும் என்று எதிர்பார்க்கப்படுகிறது. அதன்படி ரசிகர்களிடம் எதிர்பார்ப்பை ஏற்படுத்தியுள்ள இத்தொடரின் முதல் போட்டி நாளை (ஜனவரி 11) நடைபெறவுள்ளது. இப்போட்டிக்காக இரு அணிகளும் தீவிரமாக தயாராகியுள்ளதால் இப்போட்டியின் மீதான எதிர்பார்ப்பும் அதிகரித்துள்ளது.
போட்டி தகவல்கள்
- மோதும் அணிகள் - இந்தியா vs ஆஃப்கானிஸ்தான்
- இடம் - ஐஎஸ் பிந்த்ரா கிரிக்கெட் மைதானம், மொஹாலி
- நேரம் - இரவு 7 மணி
போட்டி முன்னோட்டம்
இந்தியா - ஆஃப்கானிஸ்தான் அணிகள் மோதும் முதல் இருதரப்பு தொடர் இது என்பதால் ரசிகர்கள் மத்தியில் எதிர்பார்ப்பு அதிகரித்துள்ளது. அத்துடன் இந்திய கிரிக்கெட் அணியின் முன்னணி வீரர்களான ரோஹித் சர்மா மற்றும் விராட் கோலி ஆகிய இருவரும் ஒரு வருடத்திற்குப் பிறகு டி20 அணிக்கு திரும்புகின்றனர். முன்னதாக ஆஸ்திரேலியாவில் நடைபெற்ற டி20 உலகக் கோப்பை இரண்டாவது அரையிறுதி ஆட்டம் தான் விராட் கோலி மற்றும் ரோஹித் சர்மா இந்தியாவுக்காக பங்கேற்ற கடைசி டி20 ஆட்டமாகும்.
அதன் பின்னர் அவர்கள் இல்லாத நிலையில் இந்திய அணி டி20 கிரிக்கெட்டில் விளையாடி வருகிறது. தற்போது ஹர்திக் பாண்டியாவும், சூர்யகுமார் யாதவும் உடற்தகுதியுடன் இல்லாததால் ரோஹித் சர்மா மீண்டும் கேப்டனாக உள்ளார். இந்திய அணி அறிவிப்பு பல ஆச்சரியங்களை அளித்தது. அதன்படி 15 பேர் கொண்ட அணியில் கேஎல் ராகுல் மற்றும் ஸ்ரேயாஸ் ஐயர், இஷான் கிஷான் ஆகியோரை தேர்வுக்குழு சேர்க்கவில்லை. அதேசமயம் சஞ்சு சாம்சன் மீண்டும் டி20 அணியில் இடம்பிடித்துள்ளார்.
மறுபுறம், ஐக்கிய அரபு எமிரேட்ஸுக்கு எதிரான டி20 தொடரை 2-1 என்ற கணக்கில் வென்ற ஆஃப்கானிஸ்தான் அதே உத்வேகத்துடன் களமிறங்கவுள்ளது. மேலும் இந்தியாவில் தங்கள் வெற்றியின் வேகத்தை தொடர எதிர்பார்க்கிறது. தற்போது ஸ்டாண்ட்-இன் கேப்டனாக இருக்கும் இப்ராஹிம் ஸத்ரான் அணிக்கு தலைமை தாங்குவார். இந்தத் தொடருக்கான ஆப்கானிஸ்தான் அணியில் ரஷித் கான் சேர்க்கப்பட்டாலும், முதுகு அறுவை சிகிச்சையில் இருந்து அவர் குணமடைந்து வருவதால் அவர் தொடரில் இருந்து விலகியுள்ளார்.
இருப்பினும் சமீப காலமாக டி20 கிரிக்கெட்டில் அசத்தி வரும் ரஹ்மனுல்லா குர்பாஸ், ஹஸ்ரதுல்லா ஸஸாய், ரஹ்மத் ஷா, முகமது நபி, நஜிபுல்லா ஸத்ரான் போன்ற பேட்டர்களும், முஜீப் உர் ரஹ்மான், நூர் அஹ்மத், நவீன் உல் ஹக், ஃபசல் ஹக் ஃபரூக்கு போன்ற பந்துவீச்சாளர்கள் இருப்பதால் இப்போட்டியில் நிச்சயம் விறுவிறுப்புக்கு பஞ்சமிருக்காது.
பிட்ச் ரிப்போர்ட்
மொஹாலி மைதானம் வரலாற்றில் பேட்டிங்கு சாதகமாக இருந்து வருகிறது. எனவே சூழ்நிலைகளைப் புரிந்து நங்கூரமாக விளையாடும் பேட்ஸ்மேன்கள் கண்டிப்பாக பெரிய ரன்கள் குவிக்க முடியும். அதனாலேயே இந்த மைதானத்தில் சராசரி முதல் இன்னிங்ஸ் ஸ்கோர் 183 ரன்களாக இருக்கிறது. அதேசமயம் போட்டி நடைபெற நடைபெற வேகப்பந்து வீச்சாளர்களும் ஸ்பின்னர்களும் இங்கே ஆதிக்கத்தை செலுத்துவார்கள்.
வரலாற்றில் இங்கு நடைபெற்ற 6 டி20 போட்டிகளில் 4 முறை சேஸிங் செய்த அணிகள் வென்றுள்ளன. மேலும் இரவு நேரத்தில் இங்கு கண்டிப்பாக பனியின் தாக்கம் இருக்கும். அதனால் இம்முறை டாஸ் வெல்லும் கேப்டன் முதலில் பந்து வீசத் தீர்மானிப்பது வெற்றிக்கு வித்திடலாம்.
நேரலை
இந்தியா - ஆஃப்கானிஸ்தான் அணிகளுக்கு இடையேயான டி20 தொடரை ஸ்போர்ட்ஸ்18 தொலைக்காட்சியில் நேரலையில் ஒளிபரப்பப்படும். மேலும் ஓடிடி தளமான ஜியோ சினிமாவிலும் இத்தொடரை நேரலையில் காணலாம்.
நேருக்கு நேர்
- மோதிய போட்டிகள் - 05
- இந்தியா - 04
- ஆஃப்கானிஸ்தன் - 0
- முடிவில்லை - 01
உத்தேச லெவன்
இந்தியா: ரோஹித் சர்மா (கே), யஷஸ்வி ஜெய்ஸ்வால், திலக் வர்மா, சஞ்சு சாம்சன், ரிங்கு சிங், ஷிவம் தூபே/ஜிதேஷ் சர்மா, அக்ஸர் படேல், குல்தீப் யாதவ், அர்ஷ்தீப் சிங், முகேஷ் குமார், அவேஷ் கான்
ஆஃப்கானிஸ்தான்: இப்ராஹிம் ஸத்ரான் (கே), ரஹ்மானுல்லா குர்பாஸ், ஹஸ்ரத்துல்லா ஸஸாய், அஸ்மத்துல்லா உமர்சாய், நஜிபுல்லா ஜத்ரான், கரீம் ஜனத், முகமது நபி, குல்பாதின் நைப், நவீன்-உல்-ஹக், ஃபசல் ஹாக் ஃபரூக்கி, முஜீப் உர் ரஹ்மான்.
ஃபேண்டஸி லெவன் டிப்ஸ்
- விக்கெட் கீப்பர்: ரஹ்மானுல்லா குர்பாஸ், சஞ்சு சாம்சன்
- பேட்டர்ஸ்: ரோஹித் சர்மா (கேப்டன்), யஷஸ்வி ஜெய்ஸ்வால், இப்ராகிம் ஸத்ரான்
- ஆல்ரவுண்டர்கள்: முகமது நபி, அக்சர் படேல், அஸ்மத்துல்லா உமர்சாய் (துணை கேப்டன்), கரீம் ஜனத்
- பந்துவீச்சாளர்கள்: குல்தீப் யாதவ், அர்ஷ்தீப் சிங்
Disclaimer:*இந்த ஃபேண்டஸி டீம் என்பது ஆசிரியரின் புரிதல், பகுப்பாய்வு மற்றும் உள்ளுணர்வை அடிப்படையாகக் கொண்டது. உங்கள் அணியை உருவாக்கும் போது குறிப்பிடப்பட்ட புள்ளிகளைக் கருத்தில் கொண்டு கவனமாக முடிவெடுக்கவும்.