2022 உலகக்கோப்பை தொடரை இந்திய அணி வெல்வதற்கு வாய்ப்புகள் குறைவு என்று கபில்தேவ் உள்ளிட்ட இந்திய அணியின் ஜாம்பவான்களே தெரிவித்திருந்த நிலையில், பாகிஸ்தான் அணிக்கு எதிரான தன்னுடைய முதல் போட்டியில் திரில் வெற்றியுடன் இந்திய அணி தொடங்கியுள்ளது.
பாகிஸ்தான் அணிக்கு எதிராக வெல்வதற்கு வாய்ப்பே இல்லை என்று பெரும்பாலானவர்கள் நம்பிக்கை இழந்த நிலையில், விராட் கோலியின் சிறப்பான ஆட்டத்தால் இந்திய அணி பாகிஸ்தான் அணியை மிக சிறப்பாக கையாண்டு வெற்றி பெற்றுள்ளது.
இதனால் இந்திய அணியை உலகெங்கும் இருக்கும் முன்னாள் கிரிக்கெட் வீரர்கள் மற்றும் வல்லுனர்கள் இந்திய அணியை வெகுவாக பாராட்டி வருகின்றனர் மேலும் சிறப்பாக செயல்பட்ட விராட் கோலியை புகழ்ந்தும்,வாழ்த்தியும் பதிவிட்டு வருகின்றனர்.
அந்த வகையில் தென்னாபிரிக்க அணியின் முன்னாள் வீரர் கோபஸ் ஒலிவியர், உலகக் கோப்பை தொடரை வெல்வதற்கான அதிகப்படியான வாய்ப்புகள் இந்திய அணிக்குத்தான் உள்ளது என்றும், பாகிஸ்தான் அணிக்கு எதிரான முதல் போட்டியில் வெற்றி பெற்றதன் மூலம் பாதி உலக கோப்பையை இந்திய அணி ஏற்கனவே வென்று விட்டது என்றும் செய்தியாளர்கள் சந்திப்பில் இந்திய அணியை பாராட்டி பேசியுள்ளார்.
இதுகுறித்து கோபஸ் ஒலிவியர் பேசுகையில், “பாகிஸ்தான் அணிக்கு எதிரான முதல் போட்டியில் இந்தியாவின் வெற்றி பெற்றதன் மூலம் இந்திய அணி ஏற்கனவே உலகக்கோப்பை தொடரை பாதி வென்று விட்டது, இந்த வெற்றி என் மனதில் உலகக் கோப்பை தொடரை வெல்வதற்கு இந்திய அணிக்கு தான் அதிக வாய்ப்புகள் உள்ளது என தோன்றுகிறது.
இது போன்ற வெற்றியை ஒரு அணி சுவைத்து விட்டால் அந்த அணி அதே வேகத்தில் மற்றும் தன்னம்பிக்கையுடன் செயல்படும். பாகிஸ்தான் அணிக்கு எதிரான முதல் வெற்றி உண்மையிலேயே மிகவும் அருமையான ஒன்றாகும், கடைசி மூன்று ஓவரில் இந்திய அணி வெற்றி பெறுவதற்கு வாய்ப்பே இல்லை என்ற நிலை இருந்தபோது விராட் கோலி மிகச் சிறப்பான ஆட்டத்தை வெளிப்படுத்தி இந்திய அணிக்கு வெற்றியைப் பெற்றுக் கொடுத்தார். என்னைப் பொருத்தவரை உலகக் கோப்பை தொடரை வெல்வதற்கு இந்திய அணிக்கு தான் தகுதி உள்ளது” என்று தெரிவித்துள்ளார்.