பயிற்சி ஆட்டத்தில் சிக்சரை விளாசிய ரிஷப் பந்த்; வைரலாகும் காணொளி!

இந்திய கிரிக்கெட் அணியின் இளம் நட்சத்திர வீரர் ரிஷப் பந்த். 24 வயதிலேயே சர்வதேச டெஸ்ட் கிரிக்கெட்டில் இங்கிலாந்து, ஆஸ்திரேலியா, வெஸ்ட் இண்டீஸ், தென் ஆப்பிரிக்கா என்று சுற்றுப்பயணம் மேற்கொண்ட இடத்தில் எல்லாம் சதங்களை விளாசி அசத்தியவர். இதனால் இந்திய டெஸ்ட் அணியின் வருங்கால கேப்டன் என்ற இடத்தில் ரிஷப் பந்த் பார்க்கப்பட்டார்.

ஆனால் புத்தாண்டுக்கு முன்பாக நெடுஞ்சாலை விபத்தில் சிக்கிய ரிஷப் பந்த் அதிர்ஷ்டவசமாக உயிர்தப்பினார். அதன்பின் அறுவை சிகிச்சை, ஓய்வு என்று இருந்த ரிஷப் பந்த் எப்போது மீண்டும் கிரிக்கெட் களம் திரும்புவார் என்றே தெரியாமல் இருந்தது. ஒவ்வொரு முறையும் ரிஷப் பந்த் ஸ்டிக் உதவியுடன் நடந்து வந்ததால், இந்த ஆண்டில் கிரிக்கெட் திரும்ப வாய்ப்பே இல்லை என்று சொல்லப்பட்டது.

இதனிடையே யாரின் உதவியும் இல்லாமல் ரிஷப் பந்து நடந்து தனது இன்ஸ்டாகிராமில் காணொளியை பதிவிட்டார். அதுமட்டுமல்லாமல் உடனடியாக பெங்களூருவில் உள்ள தேசிய கிரிக்கெட் அகாடமிக்கும் சென்றார். அங்கு ஏற்கனவே காயத்தில் இருந்து மீண்டு வருவதற்காக பயிற்சி மேற்கொண்டு வந்த ஸ்ரேயாஸ் ஐயர், கேஎல் ராகுல், பிரசித் கிருஷ்ணா உள்ளிட்டோருடன் ரிஷப் பந்தும் இணைந்து கொண்டார்.

ஒவ்வொரு நாளும் தீவிரமாக பயிற்சி மேற்கொண்டு வந்த ரிஷப் பந்த் வேகமாக மீண்டு வந்தார். இதனிடையே அடுத்த ஐபிஎல் தொடரில் ரிஷப் பந்த் விளையாடுவதும் சந்தேகம் என்று இஷாந்த் சர்மா கூறினார். இதனால் ரசிகர்களிடையே அதிர்ச்சி ஏற்பட்டது. ஆனால் பிசிசிஐ தரப்பில், ரிஷப் பந்த் விக்கெட் கீப்பிங் மற்றும் பேட்டிங் பயிற்சியை தொடங்கிவிட்டதாக அப்டேட் கொடுக்கப்பட்டது.

தொடர்ந்து ரிஷப் பந்த் 140 கிமீ வேகத்தில் த்ரோ டவுன் செய்யப்படும் பந்துகளை எதிர்கொண்டு வருவதாக தகவல் வெளியாகியது. இந்த நிலையில் ரிஷப் பந்த் பேட்டிங் செய்யும் காணொளி வெளியாகியுள்ளது. அந்த காணொளியில் பயிற்சி போட்டியில் களமிறங்கும் ரிஷப் பந்த், வேகப்பந்துவீச்சாளர் வீசும் பந்து ஒன்றை இறங்கி வந்து சிக்சர் அடித்துள்ளார். தற்போது அக்காணொளியானது இணையாத்தில் தீயாய் பரவி வருகிறது.