ஐபிஎல் 2022: பரத் அருணை பந்துவீச்சு பயிற்சியாளராக நியமித்தது கேகேஆர்!

ஐபிஎல் தொடரின் 15ஆவது சீசன் இந்தாண்டு ஏப்ரல் மாதம் தொடங்கும் என எதிர்பார்க்கப்படுகிறது. மேலும் நடப்பு சீசனுக்கான ஐபிஎல் தொடரில் லக்னோ, அகமதாபாத் ஆகிய நகரங்களை மையமாகக் கொண்டு இரண்டு புதிய அணிகள் உருவாக்கப்பட்டுள்ளன. 

இதனால் நடப்பு சீசனுக்கான வீரர்கள் மெகா ஏலம் அடுத்த மாதம் பெங்களூருவில் நடைபெறவுள்ளது. மேலும் ஒவ்வொரு அணியும் தாங்கள் தக்கவைக்கும் வீரர்களுக்கான பட்டியலையும் சமீபத்தில் வெளியிட்டிருந்தது.

அதேசமயம் லக்னோ மற்றும் அகமதாபாத் அணிகள் இம்மாதம் 20ஆம் தேதிக்குள் தாங்கள் தக்கவைக்கும் வீரர்களின் பட்டியலை வெளியிடும் என எதிர்பார்க்கப்படுகிறது. 

இந்நிலையில் இந்திய அணியின் முன்னாள் பந்துவீச்சு பயிற்சியாளராக இருந்த பரத் அருணை கொல்கத்தா நைட் ரைடர்ஸ் அணி தங்கள் அணியின் பந்துவீச்சு பயிற்சியாளராக நியமித்துள்ளது.

தமிழ்நாட்டைச் சேர்ந்த பரத் அருண், இந்திய அணியின் முன்னாள் வீரராகவும் ஜொலித்தவர். மேலும் உள்ளூர் கிரிக்கெட் போட்டிகளில் தமிழ்நாடு அணிக்காக பல சாதனைகளையும் படைத்துள்ளார். 

இவர் இந்திய அணியின் பந்துவீச்சு பயிற்சியாளராக செயல்பட்ட பிறகு பல வெற்றிகளை இந்திய அணி பெற்றது. இந்நிலையில் பரத் அருணை கேகேஆர் அணி பந்துவீச்சு பயிற்சியாளராக நியமித்துள்ளது அந்த அணிக்கு பெரும் பலமாக இருக்கும் என்று எதிர்பார்க்கப்படுகிறது.