ஐபிஎல் 2023: சிஎஸ்கே அணி தக்கவைத்த & ஏலத்தில் வாங்கிய வீரர்களின் விவரம்!

ஐபிஎல் 16ஆவது சீசனுக்கான ஏலம், கொச்சியில் இன்று நடைபெற்றது. இதற்காக மொத்தம் 991 வீரர்கள் பதிவு செய்து வைத்திருந்தார்கள். இருப்பினும், அவர்களில் 369 வீரர்களை மட்டுமே ஐபிஎல் நிர்வாகிகள் தேர்வு செய்துள்ளனர்.

இதுதவிர 10 அணிகளும், தங்களுக்கு தேவையான இளம் வீரர்களை ஏலப் பட்டியலில் சேர்க்க கோரிக்கை விடுத்தன. அந்த வகையில் 36 பேர் பேர் கூடுதலாக சேர்க்கப்பட்டு மொத்தம் 405 பேர் மினி ஏலத்தில் பங்கேற்றனர். இதில் 273 பேர் இந்திய வீரர்களாகவும், 132 பேர் வெளிநாட்டு வீரர்களாகவும் இடம்பிடித்தனர்.

சென்னை சூப்பர் கிங்ஸ் அணியில் இருந்து டுவைன் பிராவோ, ராபின் உத்தப்பா, ஆடம் மில்னே, ஹரி நிஷாந்த், கிறிஷ் ஜோர்டன், பகத் வர்மா, கேஎம் ஆசிப், நாராயண் ஜெகதீசன் ஆகியோர் கழற்றிவிடப்பட்டுள்ளனர். இந்நிலையில், மினி ஏலத்தில் ஒன் டவுன் இடத்திற்கு உத்தப்பாவிற்கு மாற்றாக அஜிங்கிய ரஹானேவை சிஎஸ்கே 50 லட்சத்திற்கு வாங்கியுள்ளது. 

இவர் சமீபத்தில் ரஞ்சிக் கோப்பை தொடரில் இரட்டை சதம் அடித்திருந்தார். மேலும், சேப்பாக் போன்ற மைதானத்தில் ரஹானே போன்ற நிதான ஆட்டக்காரர்தான் தேவை. இதனால்தான், இவரை வாங்கியிருப்பதாக கருதப்படுகிறது. இதனைத் தொடர்ந்து சாம் கரனை வாங்க சிஎஸ்கே முயற்சி செய்தது. ஆனால், வங்க முடியவில்லை. தொடர்ந்து கேமரூன் கிரீனை மும்பை இந்தியன்ஸ் வாங்கிய நிலையில், அடுத்து பென் ஸ்டோக்ஸை சிஎஸ்கே 16.25 கோடி கொடுத்து வாங்கியிருக்கிறது.

2017ஆம் ஆண்டில் தோனியுடன் பென் ஸ்டோக்ஸ், ரஹானே ஆகியோர் புனே அணிக்காக விளையாடினார்கள். இந்நிலையில் தற்போது மீண்டும் இணைந்துள்ளது ரசிகர்களுக்கு பெரும் மகிழ்ச்சியை ஏற்படுத்தியுள்ளது. அதிலும் இதுதான் தோனியின் கடைசி ஐபிஎல் தொடர் என கூறப்படும் நிலையில், அணியின் கேப்டன் பொறுப்பை கருத்தில் கொண்டு பென் ஸ்டோக்ஸ் தேர்வு செய்யப்பட்டுள்ளதாக ரசிகர்கள் கொண்டாட்டத்தில் உள்ளனர்.

சிஎஸ்கே தக்கவைத்த வீரர்கள்: எம்எஸ் தோனி (கேப்டன்), டிவோன் கான்வே, ருதுராஜ் கெய்க்வாட், அம்பதி ராயுடு, சுப்ரான்ஷு சேனாபதி, மொயின் அலி, சிவம் துபே, ராஜ்வர்தன் ஹங்கர்கேகர், டுவைன் பிரிட்டோரியஸ், மிட்செல் சாண்ட்னர், ரவீந்திர ஜடேஜா, துஷார் தேஷ்பாண்டே, முகேஷ் சௌத்ரி, தீபக் சௌத்ரினா, சிமிர்ஜித் சிங், பிரசாந்த் சோலங்கி, மகேஷ் தீக்ஷனா.

சிஎஸ்கே ஏலத்தில் வாங்கிய வீரர்கள்: அஜிங்கியா ரஹானே ( ரூ.50 லட்சம்), பென் ஸ்டோக்ஸ் (ரூ.16.25 கோடி), ஷேக் ரஷீத் (ரூ 20 லட்சம்), நிஷாந்த் சிந்து (ரூ. 60 லட்சம்), கைல் ஜேமிசன் (ரூ. 1 கோடி), அஜய் மண்டல் (ரூ. 20 லட்சம்), பகத் வர்மா (ரூ. 20 லட்சம்).