ஐபிஎல் 2023: தோனி, தூபே கேமியோ; டெல்லிக்கு 168 டார்கெட்!

16ஆவது சீசன் ஐபிஎல் தொடரின் லீக் போட்டிகள் தற்போது இறுதிக்கட்டத்தை எட்டியுள்ளது. இதில் இன்று நடைபெற்று வரும் 55ஆவது லீக் ஆட்டத்தில் சென்னை சூப்பர் கிங்ஸ் - டெல்லி கேப்பிட்டல்ஸ் அணிகள் பலப்பரீட்சை நடத்தி வருகின்றன. இப்போட்டியில் டாஸ் வென்ற சிஎஸ்கே அணி முதலில் பேட்டிங் செய்வதாக அறிவித்தது.

அதன்படி சிஎஸ்கே அணியின் தொடக்க வீரர்களாக டெவான் கான்வே - ருதுராஜ் கெய்க்வாட் இணை களமிறங்கினர். இதில் கான்வே 10 ரன்கள் எடுத்த நிலையில் அக்ஸர் படேல் பந்துவீச்சில் ஆட்டமிழக்க, அவரைத் தொடர்ந்து 24 ரன்களை எடுத்திருந்த ருதுராஜ் கெய்க்வாட்டும் அக்ஸரிடம் விக்கெட்டை இழந்தார். 

இதையடுத்து களமிறங்கிய மொயீன் அலி வழக்கம் போல சொற்ப ரன்களுக்கு ஆட்டமிழக்க, மறுபக்கம் அதிரடியாக விளையாட முன்ற அஜிங்கியா ரஹானே 21 ரன்களை எடுத்த நிலையில் லலித் யாதவ் பந்துவீச்சில் அவரிடமே கேட்ச் கொடுத்து பெவிலியனுக்கு நடையைக் கட்டினார். 

அடுத்து களமிறங்கிய் ஷிவம் தூபே தனது பங்கிற்கு 3 சிக்சர்களை பறக்கவிட்ட 25 ரன்களிலும், அவரைத் தொடர்ந்து 23 ரன்களில் அம்பத்தி ராயூடுவும் ஆட்டமிழக்க, அடுத்து களமிறங்கினார் ரசிகர்களின் நாயகன் எம் எஸ் தோனி. அவர் களமிறங்கியது முதலே சோர்ந்து கிடந்த சிஎஸ்கே ரசிகர்கள் புது உற்சாகத்துடன் கரகோஷங்களை எழுப்பு ஆரவாரப்படுத்தினர். 

ரசிகர்களின் எதிர்பார்ப்பை நிறைவேற்றும் வகையில் கலீல் அகமது வீசிய 19ஆவது ஓவரில் எம் எஸ் தோனி அடுத்தடுத்து 2 சிக்சர், ஒரு பவுண்டரியை விளாசி அசத்தினார். அதேசமயம் மறுபக்கம் அதிரடியாக விளையாடிய ரவீந்திர ஜடேஜா தனது பங்கிற்கு ஒரு பவுண்டரி, ஒரு சிக்சருடன் 21 ரன்களைச் சேர்த்து ஆட்டமிழந்தார். 

அதனைத் தொடர்ந்து அதே ஓவரில் எம் எஸ் தோனியும் 2 சிக்சர், ஒரு பவுண்டரி என 20 ரன்களைச் சேர்த்து ஆட்டமிழந்தார். இதனால் 20 ஓவர்கள் முடிவில் சிஎஸ்கே அணி 8 விக்கெட்டுகளை இழந்து 167 ரன்களைச் சேர்த்தது. டெல்லி அணி தரப்பில் மிட்செல் மார்ஷ் 3 விக்கெட்டுகளையும், அக்சர் படேல் இரண்டு விக்கெட்டுகளையும் கைப்பற்றினர்.