ஐபிஎல் 2023: ராயல் சேலஞ்சர்ஸ் பெங்களுரு vs ராஜஸ்தான் ராயல்ஸ் - போட்டி முன்னோட்டம் & ஃபேண்டஸி லெவன்!

வார இறுதியான இன்று ஐபிஎல் தொடரில் இரண்டு லீக் போட்டிகள் நடைபெற உள்ளன. முதல் போட்டியில் சஞ்சு சாம்சன் தலைமையிலான ராஜஸ்தான் ராயல்ஸ் அணி, ஃபாஃப் டூ பிளெசிஸ் தலைமையிலான ராயல் சேலஞ்சர்ஸ் பெங்களூரு அணியை எதிர்கொள்கிறது. பெங்களூரு சின்னசாமி மைதானத்தில் நடைபெறும் போட்டி இந்திய நேரப்படி மாலை 3.30 மணிக்கு தொடங்குகிறது. 

போட்டி தகவல்கள் 

• மோதும் அணிகள் - ராயல் சேலஞ்சர்ஸ் பெங்களுரு vs ராஜஸ்தான் ராயல்ஸ்
• இடம் - சின்னசாமி மைதானம், பெங்களுரூ
• நேரம் - மாலை 3.30 மணி

போட்டி முன்னோட்டம்

சஞ்சு சாம்சன் தலைமையிலான ராஜஸ்தான் ராயல்ஸ் அணி நடப்பு தொடரில் 6 போட்டிகளில் விளையாடி 4 வெற்றிகளுடன் புள்ளிப்பட்டியலில் முதலிடத்தில் உள்ளது. கடைசியாக விளையாடிய லீக் போட்டியில் லக்னோ அணிக்கு எதிராக தோல்வியுற்ற நிலையில், இன்றைய போட்டியின் மூலம் மீண்டும் வெற்றிப்பாதைக்கு திரும்ப ராஜஸ்தான் அணி முனைப்பு காட்டி வருகிறது. 

ஜோஸ் பட்லர், யஷஸ்வி ஜெய்ஷ்வால், சஞ்சு சாம்சன், ஷிம்ரான் ஹெட்மையர், ஜுரெல் ஆகியோர் பேட்டிங்கில் நல்ல ஃபார்மை தொடர்கின்றனர். அஷ்வின் - சாஹல் கூட்டணி சுழலிலும், போல்ட்-சந்தீப் சர்மா-ஹோல்டர் கூட்டணி வேகப்பந்துவீச்சிலும் எதிரணிகளுக்கு நெருக்கடி கொடுத்து வருகிறது.

அதேசமயம் ஃபாஃப் டூ பிளேசிஸ் தலைமையிலான ராயல் சேலஞ்சர்ஸ் பெங்களுரூ அணி நடப்பு தொடரில் 6 போட்டிகளில் விளையாடி 3 வெற்றிகளுடன் அணி புள்ளிப்பட்டியலில் 6வது இடத்தில் உள்ளது. கடைசியாக விளையாடிய லீக் போட்டியில் பஞ்சாப் அணியை வீழ்த்திய உத்வேகத்தில் பெங்களூரு அணி களமிறங்குகிறது. 

கேப்டன் ஃபாஃப் டூ பிளெசிஸ் அதிக ரன்களை அடித்ததற்கான ஆரஞ்சு தொப்பியையும், முகமது சிராஜ் அதிக விக்கெட்டுகளை வீழ்த்தியதற்கான ஊதா தொப்பியையும் பெற்று இருப்பது கூடுதல் நம்பிக்கை அளிக்கிறது. அதேநேரம், பேட்டிங்கில் கோலி, டூ பிளெசிஸ் மற்றும் மேக்ஸ்வெல்லை தவிர மற்ற வீரர்கள் சோபிக்காதது பெங்களூரு அணிக்கு பலவீனமாக கருதப்படுகிறது. அதோடு, பந்துவீச்சாளர்களும் சற்றே கூடுதல் பொறுப்புடன் செயல்பட வேண்டியுள்ளது.

மைதானம் எப்படி?

பெங்களூரு மைதானம் வழக்கம்போல் பேட்ஸ்மேன்களுக்கு சாதகமான ஆடுகளமாகவே அமையும் என்பதில் ஐயமில்லை. இரண்டு அணிகளிலும் அதிரடி பேட்ஸ்மேன்கள் அதிகம் உள்ளதால், இன்றைய போட்டி ரசிகர்கள் இடையே பெரும் எதிர்பார்ப்பை ஏற்படுத்தியுள்ளது. டாஸ் வெல்லும் அணி முதலில் பந்துவீச்சை தேர்வு செய்யவே விரும்பும். 

நேருக்கு நேர்

• மோதிய போட்டிகள் -28
• ராயல் சேலஞ்சர்ஸ் பெங்களுரூ - 13
• ராஜஸ்தான் ராயல்ஸ் - 12
• டிரா - 03

உத்தேச லெவன்

ராயல் சேலஞ்சர்ஸ் பெங்களூரு - விராட் கோலி, ஃபாஃப் டு பிளேசிஸ், கிளென் மேக்ஸ்வெல், தினேஷ் கார்த்திக், மஹிபால் லாம்ரோர், ஷபாஸ் அகமது, சுயாஷ் பிரபுதேசய், ஹர்ஷல் படேல், வானிந்து ஹசரங்கா, வெய்ன் பார்னெல், முகம்மது சிராஜ்

ராஜஸ்தான் ராயல்ஸ் - யஷஸ்வி ஜெய்ஷ்வால், ஜோஸ் படலர், சஞ்சு சாம்சன், சிம்ரான் ஹெட்மையர், ரியான் பராக், ரவிச்சந்திரன் அஸ்வின், ஜேசன் ஹோல்டர், ட்ரெண்ட் போல்ட், சந்தீப் சர்மா, யுஸ்வேந்திர சஹால்.

ஃபேண்டஸி லெவன் டிப்ஸ்

• விக்கெட் கீப்பர்கள் - ஜோஸ் பட்லர், சஞ்சு சாம்சன்
• பேட்ஸ்மேன்கள் - விராட் கோலி, ஃபாஃப் டு பிளெசிஸ், ஷிம்ரான் ஹெட்மையர், யஷஸ்வி ஜெய்ஸ்வால்
• ஆல்-ரவுண்டர்கள் - கிளென் மேக்ஸ்வெல், வனிந்து ஹசரங்க
• பந்துவீச்சாளர்கள் - யுஸ்வேந்திர சாஹல், டிரென்ட் போல்ட், முகமது சிராஜ்.

கேப்டன்/துணை கேப்டன் - விராட் கோலி, ஃபாஃப் டூ பிளெசிஸ், ஜோஸ் பட்லர், சஞ்சு சாம்சன்