17ஆவது சீசன் ஐபிஎல் தொடரானது விறுவிறுப்பாக நடைபெற்றுவருகிறது. இதில் இன்று நடைபெற்ற 3ஆவது லீக் போட்டியில் ஸ்ரேயஸ் ஐயர் தலைமையிலான கொல்கத்தா நைட் ரைடர்ஸ் அணியும், பாட் கம்மின்ஸ் தலைமையிலான சன்ரைசர்ஸ் ஹைதராபாத் அணியும் பலப்பரீட்சை நடத்தின. இப்போட்டியில் டாஸ் வென்ற சன்ரைசர்ஸ் ஹைதராபாத் அணி முதலில் பந்துவீசுவதாக அறிவித்தது. இதையடுத்து பேட்டிங்கைத் தொடங்கிய கேகேஆர் அணிக்கு பில் சால்ட் - சுனில் நரைன் இணை தொடக்கம் கொடுத்தனர்.
இதில் தொடக்கம் முதலே அதிரடியாக விளையாடிய பில் சால்ட், மார்கோ ஜான்சென் ஓவரில் அடுத்தடுத்து மூன்று சிக்சர்களை விளாசி மிரட்டினார். அதேசமயம் மறுபக்கம் 2 ரன்கள் மட்டுமே எடுத்திருந்த சுனில் நரைன் தேவையில்லாமல் ரன் அவுட்டாகி பெவிலியனுக்கு நடையைக் கட்டினார். அதன்பின் களமிறங்கிய வெங்கடேஷ் ஐயர் 7 ரன்களுக்கும், கேப்டன் ஸ்ரேயாஸ் ஐயர் ரன்கள் ஏதுமின்றியும் என அடுத்தடுத்து நடராஜன் பந்துவீச்சில் விக்கெட்டை இழந்து ஏமாற்றமளித்தனர். அவர்களைத் தொடர்ந்து களமிறங்கிய நிதிஷ் ரானாவும் 9 ரன்களுக்கு தனது விக்கெட்டை இழந்தார்.
பின்னர் ஜோடி சேர்ந்த பில் சால்ட் - ரமந்தீப் சிங் இணை அதிரடியான ஆட்டத்தை வெளிப்படுத்தி அணியின் ஸ்கோரை மளமளவென உயர்த்தினர். இதில் அபார ஆட்டத்தை வெளிப்படுத்திய ரமந்தீப் சிங் தனது அரைசதத்தைப் பதிவுசெய்வார் என எதிர்பார்க்கப்பட்ட நிலையில் ஒரு பவுண்டரி, 4 சிக்சர்கள் என 35 ரன்கள் எடுத்த நிலையில் விக்கெட்டை இழக்க, மறுபக்கம் அபார ஆட்டத்தை வெளிப்படுத்தி வந்த பில் சால்ட் ஐபிஎல் தொடரில் தனது முதல் அரைசதத்தைப் பதிவுசெய்தார். அதன்பின் 3 பவுண்டரி, 3 சிக்சர்கள் என 54 ரன்களில் பில் சால்ட்டும் தனது விக்கெட்டை இழந்தார்.
இதனையடுத்து இணைந்த ரிங்கு சிங் - ஆண்ட்ரே ரஸல் இணை அபார ஆட்டத்தை வெளிப்படுத்தினர். இதில் அதிரடிக்கு பெயர்போன ஆண்ட்ரே ரஸல் வழக்கம்போல் தனது அபாரமான பேட்டிங் திறமையால் சிக்சர்களை பறக்கவிட்டு எதிரணி பந்துவீச்சாளர்களை கதிகலங்க வைத்தார். அவருக்கு துணையாக ரிங்கு சிங்கும் ஸ்டிரைக்கை மாற்றிக்கொடுக்க அணியின் ஸ்கோரும் மளமளவென உயர்ந்தது. இதில் தொடர்ந்து சிறப்பான ஆட்டத்தை வெளிப்படுத்திய ஆண்ட்ரே ரஸல் 20 பந்துகளில் தனது அரைசதத்தைப் பதிவுசெய்து மிரட்டினார்.
அதேசமயம் அதிரடியாக விளையாட முயன்ற ரிங்கு சிங் 23 ரன்களில் தனது விக்கெட்டை இழந்தாலும், அடுத்து களமிறங்கிய மிட்செல் ஸ்டார்க்கும் முதல் பந்திலேயே பவுண்டரி அடித்து அசத்தினார். இதில் இறுதிவரை ஆட்டமிழக்காமல் இருந்த ஆண்ட்ரே ரஸல் 3 பவுண்டரி, 7 சிக்சர்கள் என 64 ரன்களையும், ஸ்டார்க் 6 ரன்களையும் சேர்த்தனர். இதன்மூலம் 20 ஓவர்கள் முடிவில் கொல்கத்தா நைட் ரைடர்ஸ் அணி 7 விக்கெட் இழப்பிற்கு 208 ரன்களைக் குவித்துள்ளது. சன்ரைசர்ஸ் ஹைதராபாத் அணி தரப்பில் அபாரமாக பந்துவீசிய நடராஜன் 3 விக்கெட்டுகளையும், மயங்க் மார்கண்டே 2 விக்கெட்டுகளையும் கைப்பற்றினர்.
இதையடுத்து கடின இலக்கை நோக்கி விளையாடிய சன்ரைசர்ஸ் அணிக்கு மயங்க் அகர்வால் - அபிஷேக் சர்மா இணை தொடக்கம் கொடுத்தனர். இதில் இருவரும் அதிரடியான தொடக்கத்தைக் கொடுத்து அணிக்கு தேவையான அடித்தளத்தை அமைத்துக்கொடுத்தனர். அதன்பின் 4 பவுண்டரி ஒரு சிக்சர் என 32 ரன்கள் சேர்த்த நிலையில் மயங்க் அகர்வால் தனது விக்கெட்டை இழக்க, அவரைத் தொடர்ந்து மற்றொரு தொடக்க வீரரான அபிஷேக் சர்மாவும் 4 பவுண்டரி, இரண்டு சிக்சர்கள் என 32 ரன்களுக்கு ஆட்டமிழந்து அரைசதம் அடிக்கும் வாய்ப்பை தவறவிட்டார்.
அதன்பின் களமிறங்கிய ராகுல் திரிபாதி - ஐடன் மார்க்ரம் இணை ஓரளவு தாக்குப்பிடித்து விளையாடினர். இதில் ஐடன் மார்க்ரம் 18 ரன்களிலும், ராகுல் திரிபாதி 20 ரன்களிலும் என ஆட்டமிழக்க, அடுத்து களமிறங்கி அதிரடி காட்டிய அப்துல் சமத்தும் 15 ரன்களில் விக்கெட்டை இழந்தார். அதேசமயம் மறுபக்கம் அணியின் நம்பிக்கையாக பார்க்கப்பட்ட ஹென்ரிச் கிளாசென் வழக்கம்போல் தனது அதிரடியான ஆட்டத்தை வெளிப்படுத்தி சிக்சர்களை விளாசித்தள்ளினார். அவருக்கு துணையாக ஷாபாஸ் அஹ்மதும் அதிரடியாக விளையாடி அணியை வெற்றியை நோக்கி அழைத்துச்செல்ல உதவினார்.
இதனால் சன்ரைசர்ஸ் ஹைதராபாத் அணி வெற்றிக்கு கடைசி இரண்டு ஓவர்களில் 39 ரன்கள் தேவை என்ற நிலை ஏற்பட்டது. அதனையெல்லாம் பொருட்படுத்தாத ஹென்ரிச் கிளாசென் அடுத்தடுத்து சிக்சர்களை விளாசியதுடன் 25 பந்துகளில் தனது அரைசதத்தைப் பதிவுசெய்து அசத்தினார். இதன்மூலம் 19ஆவது ஓவரில் சன்ரைசர்ஸ் அணி 26 ரன்களைக் குவித்தது. அதன்பின் கடைசி ஓவரின் முதல் பந்திலும் ஹென்ரிச் கிளாசென் சிச்கர் அடிக்க அணியின் வெற்றிக்கு கடைசி 4 பந்துகளில் 7 ரன்கள் தேவை என்ற நிலை ஏற்பட்டது. அப்போது 16 ரன்கள் எடுத்திருந்த ஷபாஸ் அஹ்மத் தூக்கி அடிக்க முயற்சித்து தனது விக்கெட்டை இழந்தார்.
அவரைத்தொடர்ந்து 8 சிக்சர்களுடன் 63 ரன்கள் சேர்த்திருந்த ஹென்ரிச் கிளாசெனும் தனது விக்கெட்டை இழக்க, ஹைதராபாத் அணி வெற்றிக்கு கடைசி பந்தில் 5 ரன்கள் தேவை என்ற நிலையில் அடுத்து களமிறங்கிய கேப்டன் பாட் கம்மின்ஸ் பந்தை தவறவிட்டார். இதனால் 20 ஓவர்கள் முடிவில் சன்ரைசர்ஸ் ஹைதராபாத் அணி 7 விக்கெட் இழப்பிற்கு 204 ரன்களை மட்டுமே எடுத்தது. இதன்மூலம் கொல்கத்தா நைட் ரைடர்ஸ் அணி 4 ரன்கள் வித்தியாசத்தில் சன்ரைசர்ஸ் ஹைதராபாத் அணியை வீழ்த்தி த்ரில் வெற்றியைப் பதிவுசெய்து அசத்தியது.