கேஎல் ராகுல் மிகச்சிறந்த வீரர் & கேப்டன் - கவுதம் கம்பீர்!

தென் ஆப்பிரிக்காவில் சுற்றுப்பயணம் செய்த இந்திய அணி டெஸ்ட் தொடரை 2-1 என்ற கணக்கில் இழந்த நிலையில், கேஎல் ராகுல் தலைமைத் தாங்கிய இந்திய ஒருநாள் அணி 3-0 என்ற கணக்கில் ஒருநாள் தொடரை இழந்து தென் ஆப்பிரிக்காவிடம் ஒயிட்வாஷ் ஆனது.

இந்நிலையில் கேப்டன்சி குறித்த விமர்சனங்கள் சமூக வலைதளங்களில் பேசுபொருளாக மாறியுள்ளன. இதற்கிடையில் கேஎல் ராகுல் மிகச்சிறந்த வீரர் மற்றும் சிறந்த கேப்டனும் கூட என இந்திய அணியின் முன்னாள் வீரரும், லக்னோ ஐபிஎல் அணியின் ஆலோசகருமான கவுதம் கம்பீர் தெரிவித்துள்ளார்.

இதுகுறித்து பேசிய அவர், “கே.எல்.ராகுலைப் பற்றி விமர்சிக்க இது ஒரு விஷயமே இல்லை. அவர் ஒரு பேட்டர் மட்டுமல்ல, வெளிப்படையாக ஒரு தலைவரும் கூட. 

மேலும் அவர் அணில் மூன்று வகையிலான பொறுப்புகளை செய்துவருகிறார். அது விக்கெட் கீப்பர், தொடக்க வீரர் மற்றும் சிறந்த கேப்டன் என அணிக்கு தேவையான அனைத்து வகையிலும் உதவிவருகிறார். 

மேலும் கடந்த இரண்டு ஆண்டுகளாக பஞ்சாப் மற்றும் இந்திய அணிக்காக பல அற்புதமான செயல்திறனை வெளிப்படுத்தி அதிக ரன்களையும் குவித்துள்ளார்” என்று தெரிவித்தார்.

முன்னதாக ஐபிஎல்15ஆவது சீசனில் புதிதாக இணைந்துள்ள லக்னோ அணி கேஎல் ராகுலை 17 கோடிக்கு வாங்கி, அணியின் கேப்டனாகவும் நியமித்துள்ளது குறிப்பிடத்தக்கது.