முதல் ஓவரிலேயே ஹாட்ரிக் வீழ்த்திய உனாத்கட்; ரஞ்சி கோப்பை வரலாற்றில் புதிய சாதனை!

Updated: Tue, Jan 03 2023 11:31 IST
Image Source: Google

ரஞ்சிக் கோப்பை தொடர் டிசம்பர் 13ஆம் தேதிமுதல் துவங்கி நடைபெற்று வருகிறது.இதில் இன்று துவங்கியுள்ள லீக் போட்டி ஒன்றில், குரூப் பி பிரிவில் இடம்பெற்றுள்ள சௌராஷ்டிரா, டெல்லி அணிகள் மோதி வருகின்றன. இப்போட்டி மும்பையில் நடைபெற்று வருகிறது.

இப்போட்டியில் டாஸ் வென்ற சௌராஷ்டிரா அணி முதலில் பந்துவீச்சைத் தேர்வு செய்தது. பிட்ச் துவக்கத்தில் வேகத்திற்கு சாதகமாக இருந்ததால், சௌராஷ்டிரா அணி வேகப்பந்து வீச்சாளர் ஜெய்தேவ் உனாத்கட் முதல் ஓவரிலேயே அபாரமாக பந்துவீசி ஹாட்ரிக் விக்கெட்டை வீழ்த்தி கெத்து காட்டினார். ரஞ்சிக் கோப்பையில், முதல் ஓவரிலேயே ஹாட்ரிக் வீழ்த்துவது இதுதான் முதல்முறை. இதற்குமுன், இர்ஃபான் பதான் பாகிஸ்தானுக்கு எதிரான டெஸ்டில் முதல் ஓவரிலேயே ஹாட்ரிக் விக்கெட்டை வீழ்த்தியிருந்தார்.

தொடர்ந்து சிறப்பாக பந்துவீசிய உனாத்கட், தனது இரண்டாவது ஓவரில் இரண்டு விக்கெட்களை கைப்பற்றி அசத்தினார். மொத்தம் 12 பந்துகளில் 5 ரன்களை விட்டுக்கொடுத்து, 5 விக்கெட்களை கைப்பற்றி அசத்தியுள்ளார். டெல்லி அணி முதல் இன்னிங்ஸில் 10 ரன்களுகு 7 விக்கெட்களை இழந்து தடுமாற்றத்துடன் விளையாடி வருகிறது.

ஜெய்தேவ் உனாத்கட் 2010ஆம்ஆண்டில், தென் ஆப்பிரிக்காவுக்கு எதிராக ஒரு டெஸ்ட் போட்டியில் விளையாடியப் பிறகு இரண்டாவது டெஸ்ட் போட்டியை சமீபத்தில், கடந்த டிசம்பரில்தான் வங்கதேசத்திற்கு எதிராக விளையாடினார். அந்த போட்டியில் அபாரமாக பந்துவீசி அசத்திய நிலையில், மீண்டும் ரஞ்சிக் கோப்பைக்கு திரும்பி, மிரட்டலாக பந்துவீசியிருக்கிறார். இதனால், எதிர்வரும் ஆஸ்திரேலியாவுக்கு எதிரான நான்கு போட்டிகள் கொண்ட டெஸ்ட் தொடரில் இவருக்கு வாய்ப்பு கிடைக்கும் என எதிர்பார்க்கப்படுகிறது.

TAGS

தொடர்புடைய கிரிக்கெட் செய்திகள் ::

அதிகம் பார்க்கப்பட்டவை