இலங்கையில் சுற்றுப்பயணம் செய்துவரும் இந்திய அணியானது 3-0 என்ற கணக்கில் டி20 தொடரை கைப்பற்றிய நிலையில், இவ்விரு அணிகளுக்கும் இடையேயான மூன்று போட்டிகள் கொண்ட ஒருநாள் தொடரில் விளையாடவுள்ளது. அதன்படி இலங்கை - இந்திய அணிகளுக்கு இடையேயான முதல் ஒருநாள் போட்டி இன்று கொழும்புவில் நடைபெறவுள்ளது. இப்போட்டிக்காக இரு அணி வீரர்கள் தீவிரமாக தயாராகி வருகின்றன.
மேலும் கடந்த 2023 ஒருநாள் உலகக் கோப்பையின் இறுதிப் போட்டிக்குப் பிறகு கேப்டன் ரோஹித் சர்மா, விராட் கோலி ஆகியோரு இந்திய அணிக்காக மீண்டும் ஒருநாள் தொடரில் விளையாடவுள்ளதால் இப்போட்டியின் மீதான எதிர்பார்ப்புகள் அதிகரித்துள்ளன. இந்நிலையில் இந்தப் போட்டியில் குல்தீப் 6 விக்கெட்டுகளை வீழ்த்தினால், முன்னாள் ஆல்-ரவுண்டர் இர்ஃபான் பதானை பின்னுக்குத் தள்ளி, இந்தியாவுக்காக அதிக விக்கெட்டுகளை வீழ்த்தியவர்களில் பத்தாவது இடத்தை பிடிப்பார்.
அந்தவகையில், இந்திய அணிக்காக கடந்த 2017ஆம் ஆண்டு ஒருநாள் கிரிக்கெட்டில் அறிமுகமான குல்தீப் யாதவ், இதுநாள் வரை 103 ஒருநாள் போட்டிகளில் 100 இன்னிங்ஸில் விளையாடி 168 விக்கெட்டுகளை கைப்பற்றி அசத்தியுள்ளார். அதேசமயம் முன்னாள் ஆல் ரவுண்டரான இர்ஃபான் பதான் இந்திய அணிக்காக 120 ஒருநாள் போட்டிகளில் 118 இன்னிங்ஸ்களில் விளையாடி 173 விக்கெட்டுகளை கைப்பற்றியுள்ளார் என்பது குறிப்பிடத்தக்கது.
மேற்கொண்டு இந்திய அணிக்காக ஒருநாள் கிரிக்கெட்டில் அதிக விக்கெட்டுகளை கைப்பற்றிய வீரராக முன்னாள் கேப்டன் அனில் கும்ப்ளே 269 போட்டிகளில் விளையாடி 334 விக்கெட்டுகளை கைப்பற்றி முதலிடத்தில் உள்ளார். அவருக்கு அடுத்தடுத்த இடங்கலில் ஜவாகல் ஸ்ரீநாத், அஜித் அகர்கர், ஜாகீர் கான், ஹர்பஜன் சிங் மற்றும் முன்னாள் கேப்டன் கபில்தேவ் ஆகியோர் உள்ளது குறிப்பிடத்தக்கது.
இந்திய ஒருநாள் அணி: ரோஹித் சர்மா (கேப்டன்), சுப்மான் கில், விராட் கோலி, கேஎல் ராகுல், ரிஷப் பந்த், ஸ்ரேயாஸ் ஐயர், ஷிவம் துபே, குல்தீப் யாதவ், முகமது சிராஜ், வாஷிங்டன் சுந்தர், அர்ஷ்தீப் சிங், ரியான் பராக், அக்ஸர் படேல், கலீல் அகமது, ஹர்ஷித் ராணா.
இலங்கை ஒருநாள் அணி: சரித் அசலங்கா (கே), பதும் நிஷங்கா, அவிஷ்க ஃபெர்னாண்டோ, குசல் மெண்டிஸ், சதீர சமரவிக்ரம, கமிந்து மெண்டிஸ், ஜனித் லியனாகே, நிஷான் மதுஷ்க, வனிந்து ஹஸரங்கா, துனித் வெல்லலாகே, சாமிக்க கருணாரத்ன, அகிலா தனஞ்செயா, மொகம்து ஷிராஸ், மஹீஸ் தீக்ஷனா, அசித்த ஃபெர்னாண்டோ, இஷான் மலிங்கா.
இந்தியா - இலங்கை ஒருநாள் தொடர் அட்டவணை
- முதல் ஒருநாள் போட்டி - ஆகஸ்ட் 02 - கொழும்பு
- இரண்டாவது ஒருநாள் போட்டி - ஆகஸ்ட் 04 - கொழும்பு
- மூன்றாவது ஒருநாள் போட்டி - ஆகஸ்ட் 07 - கொழும்பு