லெஜண்ட்ஸ் லீக் டி20 கிரிக்கெட் தொடரில் இன்று நடைபெற்ற 12ஆவது லீக் ஆட்டத்தில் பில்வாரா கிங்ஸ் - அர்பன்ரைசர்ஸ் ஹைதராபாத் அணிகள் பலப்பரீட்சை நடத்தின. ஜம்மூவில் நடைபெற்ற இப்போட்டியில் டாஸ் வென்ற பில்வாரா கிங்ஸ் அணி முதலில் பேட்டிங் செய்வதாக தீர்மானித்து ஹைதராபாத் அணியை பந்துவீச அழைத்தது.
அதன்படி களமிறங்கிய பில்வாரா அணியில் சோலமன் மிர் ஒரு ரன்னில் ஆட்டமிழந்து ஏமாற்றமளித்தார். பின்னர் இணைந்த லிண்டல் சிம்மன்ஸ் - திலகரத்னே தில்சன் இணை சிறப்பான ஆட்டத்தை வெளிப்படுத்தி அணியின் ஸ்கோரை உயர்த்தினர். இதில் சிம்மன்ஸ் 21 ரன்களுக்கும், அடுத்து களமிறங்கிய அப்துல்லா 8 ரன்களுக்கும் என விக்கெட்டை இழந்தனர்.
பின் அரைசதம் கடந்து அதிரடி காட்டிய திலகரத்னே தில்சன் 53 ரன்களில் விக்கெட்டை இழக்க, பின்னர் வந்த யூசுஃப் பதான் 34 ரன்களையும், இர்ஃபான் பதான் 17 ரன்களையும் சேர்த்து அணிக்கு உதவினர். இதன்மூலம் 20 ஓவர்கள் முடிவில் பில்வாரா கிங்ஸ் அணி 6 விக்கெட்டுகளை இழந்து 144 ரன்களைச் சேர்த்தது. ஹைதராபாத் அணி தரப்பில் சுயால் 2 விக்கெட்டுகளைக் கைப்பற்றினார்.
இதையடுத்து இலக்கை நோக்கி களமிறங்கிய அர்பன்ரைசர்ஸ் அணிக்கு டுவைன் ஸ்மித் - மார்ட்டின் கப்தில் இணை அதிரடியான தொடக்கத்தைக் கொடுத்து அடித்தளம் அமைத்துக்கொடுத்தனர். பின் 18 ரன்களில் மார்ட்டின் கப்தில் விக்கெட்டை இழக்க, மற்றொரு தொடக்க வீரர் டுவைன் ஸ்மித்தும் 25 ரன்களில் ஆட்டமிழந்து பெவிலியனுக்கு திரும்பினார்.
அதன்பின் களமிறங்கிய ரிக்கி கிளார்க் முதல் பந்திலிருந்தே அதிரடியான ஆட்டத்தை வெளிப்படுத்தி மளமளவென ஸ்கோரை உயர்த்தினார். தொடர்ந்து அதிரடியாக விளையாடி கிளார்க் அரைசதம் கடந்ததுடன், 44 பந்துகளில் 2 பவுண்டரி, 7 சிக்சர்கள் என 73 ரன்களை விளாசி அணிக்கு வெற்றியைத் தேடிக்கொடுத்தார். இதன்மூலம் அர்பன்ரைசர்ஸ் அணி 17.3 ஓவர்களில் இலக்கை எட்டியதுடன் 7 விக்கெட் வித்தியாசத்தில் பில்வாரா கிங்ஸை வீழ்த்தி வெற்றிபெற்றது.