எல்பிஎல் 2023: பாபர் ஆசாம் அபார சதம்; கலேவை வீழ்த்தியது கொழும்பு!

இலங்கையில் நடைபெற்றுவரும் லங்கா பிரீமியர் லீக் தொடரின் 4ஆவது சீசன் விறுவிறுப்பாக நடைபெற்றுவருகிறது. இதில் இன்று நடைபெற்ற 10ஆவது லீக் ஆட்டத்தில் கொழும்பு ஸ்டிரைக்கர்ஸ் - கலே டைட்டன்ஸ் அணிகள் பலப்பரீட்சை நடத்தின. இப்போட்டியில் டாஸ் வென்ற கொழும்பு அணி முதலில் பந்துவீசுவதாக அறிவித்தது. 

அதன்படி களமிறங்கிய கலே அணிக்கு க்ரூஸ்புலே - ஷெவோன் டேனியல் இணை அதிரடியான தொடக்கத்தைக் கொடுத்தனர். இதில் க்ரூஸ்புலே 36 ரன்களிலு, ஷெவோன் டேனியல் 49 ரன்களிலும் என ஆட்டமிழந்து அரைசதம் அடிக்கும் வாய்ப்பை தவறவிட்டனர். அவர்களைத் தொடர்ந்து களமிறங்கிய பனுகா ராஜபக்‌ஷாவும் 30 ரன்களுக்கு தனது விக்கெட்டை இழந்தார். 

இறுதியில் அதிரடியான ஆட்டத்தை வெளிப்படுத்திய டிம் செய்ஃபெர்ட் அரைசதம் கடதுடனது, 4 பவுண்டரி மற்றும் 3 சிக்சர்களை விளாசி 54 ரன்களைச் சேர்த்தார். இதன்மூலம் நிர்ணயிக்கப்பட்ட 20 ஓவர்கள் முடிவில் கலே டைட்டன்ஸ் அணி 3 விக்கெட் இழப்பிற்கு 188 ரன்களைச் சேர்த்தது.

இதையடுத்து இலக்கை நோக்கி களமிறங்கிய கொழும்பு அணிக்கு பதும் நிஷங்கா - கேப்டன் பாபர் ஆசாம் இணை அதிரடியான ஆட்டத்தை வெளிப்படுத்தி அணியின் ஸ்கோரை மளமளவென உயர்த்தினர். இதில் அபார ஆட்டத்தை வெளிப்படுத்திய இருவரும் அரைசதம் கடக்க இருவரது பார்ட்னர்ஷிப்பும் 111 ரன்களை எட்டியது. 

அதன்பின் 54 ரன்கள் எடுத்திருந்த பதும் நிஷங்கா விக்கெட்டை இழக்க, மறுமுனையில் அபார ஆட்டத்தை வெளிப்படுத்திய பாபர் ஆசாம் லங்கா பிரீமியர் லீக் தொடரில் தனது முதல் சதத்தைப் பதிவுசெய்து அசத்தினார். பின் 8 பவுண்டரி, 5 சிக்சர்கள் என 104 ரன்கள் எடுத்த நிலையில் பாபர் ஆசமும் விக்கெட்டை இழக்க, அடுத்து களமிறங்கிய நுவநிந்து ஃபெர்னாண்டோவும் 8 ரனகளுக்கு நடையைக் கட்டினார். 

இறுதியில் முகமது நவாஸ் பவுண்டரியும், சிக்சருமாக விளாசி அணிக்கு வெற்றியைத் தேடிக்கொடுத்தார். இதன்மூலம் கொழும்பு ஸ்டிரைக்கர்ஸ் அணி 19.5 ஓவர்களில் இலக்கை எட்டியதுடன் 7 விக்கெட் வித்தியாசத்தில் கலே டைட்டன்ஸை வீழ்த்தி வெற்றிபெற்றது. இப்போட்டியில் சதமடித்த பாபர் ஆசாம் ஆட்டநாயகனாகத் தேர்வுசெய்யப்பட்டார்.