எல்பிஎல் 2023: மெண்டிஸ் அதிரடி; தம்புலாவை வீழ்த்தியது கொழும்பு!

இலங்கையில் நடைபெற்றுவரும் 4ஆவது சீசன் லங்கா பிரீமியர் லீக் தொடர் விறுவிறுப்பான கட்டத்தை எட்டியுள்ளது. இதில் இன்று நடைபெற்ற 8ஆவது லீக் ஆட்டத்தில் கொழும்பு ஸ்டிரைக்கர்ஸ் - தம்புலா ஆரா அணிகள் பலப்பரீட்சை நடத்தின. இப்போட்டியில் டாஸ் வென்ற கொழும்பு அணி முதலில் பந்துவீசுவதாக அறிவித்தது. 

அதன்படி களமிறங்கிய தம்புலா அணியில் தொடக்க வீரர் அவிஷ்கா ஃபெர்னாண்டோ 12 ரன்களில் ஆட்டமிழந்து பெவிலியன் திரும்பினார். அதன்பின் இணைந்த குசால் மெண்டீஸ் - சமரவிக்ரமா இணை அதிரடியான ஆட்டத்தை வெளிப்படுத்தி அணியின் ஸ்கோரை உயர்த்தினர். இதில் இருவரும் அரைசதம் கடந்து அசத்தினர். 

பின் 59 ரன்கள் எடுத்த நிலையில் சமரவிக்ரமா ஆட்டமிழக்க, மறுமுனையில் சதமடிப்பார் என எதிர்பார்க்கப்பட்ட குசால் மெண்டீஸ் 4 பவுண்டரி, 8 சிக்சர்கள் என 87 ரன்களை எடுத்த நிலையில் விக்கெட்டை இழந்தார். இதனால் நிர்ணயிக்கப்பட்ட 20 ஓவர்கள் முடிவில் தம்புலா ஆரா அணி 6 விக்கெட்டுகளை இழந்து 192 ரன்களைக் குவித்தது. 

அதன்பின் கடின இலக்கை நோக்கி களமிறங்கிய கொழும்பு அணிக்கு நிரோஷன் டிக்வெல்லா - பாபர் ஆசாம் இணை தொடக்கம் கொடுத்தனர். இதில் டிக்வெல்லா 16 ரன்களில் ஆட்டமிழக்க, அடுத்து களமிறங்கிய பதும் நிஷங்காவும் 22 ரன்களில் விக்கெட்டை இழந்து பெவிலியன் திரும்பினார். 

மற்றொரு தொடக்க வீரரான கேப்டன் பாபர் ஆசாம் அதிரடியாக விளையாடி 7 பவுண்டரிகளுடன் 43 ரன்களை எடுத்த நிலையில் ஆட்டமிழந்தார். அவரைத்தொடர்ந்து நுவனிந்து ஃபெர்னாண்டோ அரைசதம் கடந்துடன் இறுதிவரை போராடி 56 ரன்களைச் சேர்த்தார்.

இருப்பினும் நிர்ணயிக்கப்பட்ட 20 ஓவர்கல் முடிவில் கொழும்பு அணியால் 4 விக்கெட் இழப்பிற்கு 182 ரன்களை மட்டுமே எடுக்க முடிந்தது. இதன்மூலம் தம்புலா ஆரா அணி 10 ரன்கள் வித்தியாசத்தில் கொழும்பு ஸ்டிரைக்கர்ஸை வீழ்த்தி த்ரில் வெற்றியைப் பதிவுசெய்து அசத்தியது.