ஐபிஎல் 2024: சிக்ஸர் விளாசிய ரமந்தீப்; பதிலடி கொடுத்த தீக்ஷனா!

விறுவிறுப்பாக நடைபெற்று வரும் ஐபிஎல் தொடரின் 17ஆவது சீசனில் இன்று நடைபெறும் லீக் போட்டியில் நடப்பு சாம்பியன் ருதுராஜ் கெய்க்வாட் தலைமையிலான சென்னை சூப்பர் கிங்ஸ் அணியும், ஸ்ரேயாஸ் ஐயர் தலைமையிலான கொல்கத்தா நைட் ரைடர்ஸ் அணிகளும் பலப்பரீட்சை நடத்தி வருகின்றன. இவ்விரு அணிகளுக்கும் இடையேயான இப்போட்டி சென்னை சேப்பாக்கத்தில் உள்ள எம் ஏ சிதம்பரம் கிரிக்கெட் மைதானத்தில் நடைபெற்று வருகிறது. 

இப்போட்டியில் டாஸை இழந்து முதலில் பேட்டிங் செய்த கொல்கத்தா நைட் ரைடர்ஸ் அணியானது சென்னை சூப்பர் கிங்ஸின் பந்துவீச்சுக்கு ஈடுகொடுக்க முடியாமல் அடுத்தடுத்து விக்கெட்டுகளை இழந்தனர். இதனால் அந்த அணி 20 ஓவர்கள் முடிவில் 9 விக்கெட்டுகளை இழந்து 137 ரன்களை மட்டுமே எடுத்தது. இதில் அதிகபட்சமாக கேப்டன் ஸ்ரேயாஸ் ஐயர் 34 ரன்களைச் சேர்த்தார். சிஎஸ்கே தரப்பில் ஜடேஜா, தேஷ்பாண்டே ஆகியோர் தலா 3 விக்கெட்டுகளை கைப்பற்றினர். 

இப்போட்டியில் கொல்கத்தா நைட் ரைடர்ஸ் அணி தரப்பில் 6ஆவது விக்கெட்டிற்கு களமிறங்கிய ரமந்தீப் சிங் சுழற்பந்துவீச்சாளர்களுக்கு எதிராக தடுமாறி வந்தார். அப்போது சிஎஸ்கே அணி தரப்பில் இன்னிங்ஸின் 12ஆவது ஓவரை மஹீஷ் தீக்ஷனா வீசினார். அந்த ஓவரில் 4ஆவது பந்தை ரமந்தீப் சிங் இமாலய சிக்ஸர் ஒன்றை பறக்கவிட்டு சிஸ்கே அணிக்கு சற்று அழுத்தத்தை ஏற்படுத்தினார். 

இதனால் ரமந்தீப் சிங் ஸ்பின்னர்களுக்கு எதிராக சிறப்பான ஆட்டத்தை வெளிப்படுத்துவார் என எதிபார்க்கப்பட்ட நிலையில், மஹீஷ் தீக்‌ஷனா வீசிய அடுத்த பந்திலேயே பந்தை கணிக்க தவறி க்ளீன் போல்டாகியதுடன் 13 ரன்களில் விக்கெட்டை இழந்து பெவிலியனுக்கு திரும்பினார். இந்நிலையில் சிக்சர் விளாசிய அடுத்த பந்திலேயே மஹீஷ் தீக்ஷனா, ரமந்தீப்பை க்ளீன் போல்டாக்கிய காணொளி வைரலாகி வருகிறது.