கேகேஆர் அணியின் கேப்டன் குறித்து மைக்கேல் வாகன் புகழாரம்!

 ஐபிஎல் 14ஆவது சீசனில் துபாயில் நாளை நடக்கும் இறுதிப்போட்டியில் சிஎஸ்கேவும் கேகேஆரும் மோதுகின்றன. இரு அணிகளும் இதற்கு முன்பும் கோப்பையை வென்றுள்ளதால் இப்போட்டியில் வெற்றி பெற்று மீண்டுமொரு முறை யார் கோப்பையை வெல்வர் என்ற எதிர்பார்ப்பு அதிகரித்துள்ளது.

இதில் கேகேஆர் அணியின் ஒரே பிரச்னை அந்த அணியின் கேப்டன் ஈயான் மோர்கனின் மோசமான ஃபார்ம் தான். அதுமட்டுமல்லாது, அமீரகத்தில் நிறைய போட்டிகளை ஸ்லோ பிட்ச்சான ஷார்ஜாவில் ஆடியது கேகேஆர் அணி. ஷார்ஜா பிட்ச்சில் வருண் சக்கரவர்த்தி, சுனில் நரைன் ஆகியோரின் பவுலிங் பெரிய தாக்கத்தை ஏற்படுத்தியதால் தான் அந்த அணியால் தொடர் வெற்றிகளை பெற முடிந்தது.

ஆனால் இறுதிப்போட்டி துபாயில் நடக்கவுள்ள நிலையில், அணியின் நலன் கருதி, ஃபார்மில் இல்லாத தன்னைத்தானே கேப்டன் மோர்கன் அணியிலிருந்து ஒதுக்கிக்கொண்டு, ஆண்ட்ரே ரஸ்ஸலை அணியில் சேர்த்தால் கூட ஆச்சரியப்படுவதற்கில்லை என்று மைக்கேல் வாகன் தெரிவித்துள்ளார்.

இதுகுறித்து பேசிய மைக்கேல் வான், “பிட்ச்சை பொறுத்து கேகேஆர் அணி முடிவுகளை எடுக்கவேண்டும். ஷார்ஜா ஸ்லோ பிட்ச்சில் ஆடியதால் அந்த அணி காம்பினேஷன் சிறப்பாக செட் ஆகியிருந்தது. எந்த மாற்றமும் செய்வதற்கான அவசியம் ஏற்படவில்லை. ஆனால் இறுதிப்போட்டி துபாயில் நடக்கவுள்ளது. துபாய் ஆடுகளம் வேறு மாதிரி இருக்கும். எனவே அதற்கேற்ப அணி தேர்வு செய்வது அவசியம்.

Also Read: இந்திய அணியின் இங்கிலாந்து சுற்றுப்பயணம், 2021

ஆண்ட்ரே ரஸ்ஸலின் பவுலிங் மற்றும் அவர் வேகமாக 25-30 ரன்கள் அடித்தால் அது கேகேஆர் அணிக்கு பெரிய உதவிகரமாக இருக்கும். ரஸ்ஸலை சேர்த்தால் ஷகிப் அல் ஹசனோ அல்லது மோர்கனோ நீக்கப்பட வேண்டும். அணியின் நலன் கருதி ஃபார்மில் இல்லாத மோர்கன் அவரை அவரே அணியிலிருந்து ஒதுக்கிக்கொள்ள வாய்ப்பிருக்கிறது. எனக்கு மோர்கனை பற்றி நன்கு தெரியும். அணிக்கு நல்லது என்றால் எதையும் செய்ய தயங்கமாட்டார்” என்று தெரிவித்தார்.