அமெரிக்காவில் தொடங்கப்பட்டுள்ள மேஜர் லீக் கிரிக்கெட் தொடரின் முதலாவது சீசன் இன்று கோலாகலமாக தொடங்கியது. இத்தொடரின் முதல் போட்டியில் டெக்ஸாஸ் சூப்பர் கிங்ஸ் மற்றும் லாஸ் ஏஞ்சலஸ் நைட் ரைடர்ஸ் அணிகள் பலப்பரீட்சை நடத்தின. இப்போட்டியில் டாஸ் வென்ற நைட் ரைடர்ஸ் அணி முதலில் பந்துவீசுவதாக அறிவித்தது.
அதன்படி களமிறங்கிய டெக்ஸாஸ் சூப்பர் கிங்ஸ் அணிக்கு பேரதிர்ச்சியாக கேப்டன் ஃபாஃப் டூ பிளெஸில் முதல் பந்திலேயே விக்கெட்டை இழக்க, அடுத்து களமிறங்கிய லஹிரு மிலந்தா 17 ரன்களுக்கு ஆட்டமிழந்தார். பின்னர் ஜோடி சேர்ந்த டெவான் கான்வே - டேவிட் மில்லர் இணை அதிரடியான ஆட்டத்தை வெளிப்படுத்தி அணியின் ஸ்கோரை மளமளவென உயர்த்தினர்.
இதில் அபார ஆட்டத்தை வெளிப்படுத்திய இருவரும் அரைசதம் கடந்து, மேஜர் லீக் கிரிக்கெட் தொடரில் அரைசதம் அடித்த முதலிரண்டு வீரர்கள் என்ற சாதனையையும் படைத்தனர். பின் 55 ரன்களில் கான்வே விக்கெட்டை இழக்க, 61 ரன்களை எடுத்திருந்த டேவிட் மில்லரும் ஆட்டமிழந்தார். இறுதில் சாண்ட்னர், பிராவோ ஆகியோர் ஒருசில பவுண்டரிகளை விளாசி அணிக்கு உதவினர்.
இதன்மூலம் நிர்ணயிக்கப்பட்ட 20 ஓவர்கள் முடிவில் டெக்ஸாஸ் சூப்பர் கிங்ஸ் அணி 6 விக்கெட்டுகளை இழந்து 181 ரன்களைச் சேர்த்தது. நைட் ரைடர்ஸ் அனி தரப்பில் அலி கான், லோக்கி ஃபர்குசன் ஆகியோர் தலா 2 விக்கெட்டுகளைக் கைப்பற்றினர்.
இதையடுத்து இலக்கை நோக்கி களமிறங்கிய நைட்ரைடர்ஸ் அணிக்கு தொடக்கமே கவலைகரமானது. அணியின் டாப் ஆர்டர் வீரர்கள் மார்ட்டின் கப்தில், உன்முகுந்த் சந்த், ரைலீ ரூஸோவ், நிதிஷ் குமார் என அடுத்தடுத்து சொற்ப ரன்களுக்கு ஆட்டமிழந்து பெவிலியனுக்கு திரும்ப, அடுத்து வந்த ஜஸ்கரன் மல்ஹோத்ராவும் 22 ரன்களுக்கு ஆட்டமிழந்தார்.
பின்னர் இணைந்த ஆண்ட்ரே ரஸல் - கேப்டன் சுனில் நரைன் இணை அதிரடியாக விளையாடி ஸ்கோரை உயர்த்தினர். இதில் நரைன் 15 ரன்களுக்கு ஆட்டமிழக்க, மறுபக்கம் பவுண்டரியும் சிச்கர்களுமாக விளாசிய ஆண்ட்ரே ரஸல் அரைசதம் கடந்த கையோடு 55 ரன்களில் ஆட்டமிழந்து பெவிலியன் திரும்பினார். பின்னர் வந்த வீரர்களாலும் அணிக்கு தேவையான ரன்களை சேர்க்க முடியாமல் தடுமாறினர்.
இதனால் லாஸ் ஏஞ்சலஸ் நைட் ரைடர்ஸ் அணி 14 ஓவர்களில் அனைத்து விக்கெட்டுகளையும் இழந்து 114 ரன்களுக்கு ஆல் அவுட்டானது. சூப்பர் கிங்ஸ் தரப்பில் முகமது மோசின் 4 விக்கெட்டுகளை கைப்பற்றி அணிக்கு வெற்றியைத் தேடிக்கொடுத்தார். இதன்மூலம் சூப்பர் கிங்ஸ் அணி 69 ரன்கள் வித்தியாசத்தில் நைட் ரைடர்ஸை வீழ்த்தி வெற்றியுடன் தொடரை தொடங்கியுள்ளது.